1, 2. (a) Nkucinca kuli buti Josefa amukwasyi wakwe nkobakeelede kucita? (b) Makani nzi mabi Josefa ngaakeelede kwaambila mukaakwe?

AMWEEZEEZYE Josefa kabikka cibbudu acimbi amusana wambongolo. Amweezeezye kuti mulimubwene kalanga-langa munzi wa Betelehemu masiku alimwi kauma-uma mbongolo yakwe. Kweelede kuti wakali kuyeeya musinzo mulamfwu ngwaakeelede kweenda kuya ku Egepita. Wakali kuunka kucisi ceenzu, nkobakali kwaambaula mwaambo uumbi alimwi nkobakali kutobela zilengwa zimbi—ino mukwasyi wakwe musyoonto wakali kuyakuzyibila buti kucinca ooku?

2 Tiicakali cuuba-uba kulinguwe kwaambila Mariya makani aaya mabi, mukaakwe ngwaakali kuyanda kapati, pele Josefa wakaliyumya akumwaambila. Wakamwaambila ciloto eeco icakali kujatikizya mungelo mbwaakamuletela mulumbe iwakazwa kuli Leza, wakuti: Mwami Heroda wakali kuyanda kujaya mwanaabo musyoonto! Bakeelede kulonga mpoonya-mpoonya. (Amubale Matayo 2:13, 14.) Mariya wakalibilika kapati. Ndiza wakalibuzya kuti: Nkaambo nzi ncayanda kujaya mwanaangu uutakwe mulandu? Mariya a Josefa tiibakali kukonzya kukamvwisya kaambo. Nokuba boobo, bakasyoma Jehova, aboobo bakalibambila lweendo.

3. Amupandulule lweendo lwa Josefa amukwasyi wakwe kuzwa ku Betelehemu mbolwakabede. (Amubone acifwanikiso.)

3 Ciindi bantu bamu Betelehemu nobakali koona alimwi kabatazyi cakali kucitika, Josefa, Mariya alimwi a Jesu bakazwa mumunzi akutalika kweenda kakucisiya. Kabaya kumusanza, alimwi kakuyaabuca, cakutadooneka Josefa wakali kulibuzya kujatikizya zyintu zyakali kuyakucitika kumbele. Mbuti mubezi mucete mbwaakali kukonzya kukwabilila mukwasyi wakwe kuli Heroda alimwi a Saatani ibakajisi nguzu kapati? Sena wakali kuyakucikonzya kulanganya mukwasyi wakwe lyoonse? Sena wakali kuyakucikonzya kuliyumya mukucita mulimo ooyu mupati ngwaakapegwa aa Jehova Leza wakulanganya akukomezya mwana ooyu uulibedelede? Josefa wakajana buyumuyumu bulibilisya. Notulanga-langa mbwaakazunda buyumuyumu bumwi abumwi, tulabona kaambo  bamataata mazuba aano, kubikkilizya andiswe toonse, ncotweelede kwiiya lusyomo lwa Josefa.

Josefa Wakaukwabilila Mukwasyi Wakwe

4, 5. (a) Mbuti buumi bwa Josefa mbobwakacincila limwi? (b) Mbuti mungelo mbwaakakulwaizya Josefa kutegwa atambule mulimo mupati ooyo?

4 Kakwiindide myezi iili mbwiibede, kali mumunzi ookwabo ku Nazareta, buumi bwa Josefa bwakacinca kuzwa naakatalika kweebana amwana musimbi wa Heli. Josefa wakalimuzyi Mariya kuti wakali musimbi uuli kabotu alimwi uusyomeka. Pele aciindi eeci, wakazyiba kuti wakalimitide! Wakayanda kuti amuleke cakusisikizya kutegwa atamuusyi nsoni, akumukwabilila kumasampu. * Nokuba boobo, mungelo wakaambila Josefa muciloto kuti Mariya wakamita kwiinda mumuuya uusalala wa Jehova. Mungelo wakayungizya kuti mwana musankwa ngwaakali kuyakuzyala wakali ‘kuyoofwutula bantu bakwe kuzibi zyabo.’ Alimwi wakasyomezya Josefa kuti: “Utayoowi kumubweza Maliya mukaintu wako akumutola kuŋanda.”—Mt. 1:18-21.

5 Josefa, muntu mululami alimwi iwakali kumvwida, wakacita mbubwenya oobo. Wakazumina mulimo mupati: kukomezya alimwi akulanganya mwana iwatakali wakulizyalila pele iwakali kuyandwa kapati aa Leza. Kumane, kwiinda mukumvwida mulawo wamwami, Josefa amukaakwe iwakamitide bakaunka ku Betelehemu kuyoolilembya. Ooko nkonkuko mwana nkwaakazyalilwa.

6-8. (a) Nzyintu nzi zimbi izyakapa kuti buumi bwa Josefa amukwasyi wakwe bucince? (b) Mbumboni nzi butondezya kuti Saatani ngowakatuma “nyenyeezi”? (Amubone amajwi aamunsi.)

6 Josefa kunyina naakatola bamukwasyi wakwe ku Nazareta alimwi. Muciindi caboobo, bakakkala mu Betelehemu, musinzo mufwaafwi buyo kuzwa ku Jerusalemu. Nokuba kuti bakali bacete, Josefa wakacita zyoonse nzyaakali kukonzya kukwabilila Mariya alimwi a Jesu akubajanina nzyobakali kuyandika. Kakutanainda ciindi cilamfwu, bakajana ŋanda yakukkala iitasumpukide. Mpoonya ciindi Jesu naakakomena-komena, pele kacili mwana, ambweni kaindide amwaka omwe, buumi bwabo bwakacinca alimwi cakutayeeyela.

7 Kwakasika kabunga kabaalumi, basikupandulula bweende bwanyenyeezi bazwa Kujwe, ibalangilwa kuti bakazwida ku Babuloni busena ibwakali kule. Bakali kutobela “nyenyeezi” kuya kuŋanda ya Josefa a Mariya alimwi bakali kuyaabuyandaula mwana iwakali kuyakuba mwami waba Juda. Baalumi aaba bakajisi bulemu kapati.

8 Kufwumbwa naa bakalizyi naa pe, basikupandulula bweende bwanyenyeezi bakabikka buumi bwa Jesu wakacili mwana muntenda mpati. ‘Inyenyeezi’ njobakabona yakasaanguna kubasololela ku Jerusalemu, mpoonya yakabasololela ku Betelehemu. * Nobakasika ooko bakaambila Mwami Heroda  mubyaabi kuti bakali kuyandaula mwana iwakali kuyakuba mwami waba Juda. Eeci cakapa kuti Heroda anyeme kapati akaambo kamunyono.

9-11. (a) Muunzila nzi nguzu izyakali kubeleka mozyakali kwiinda nguzu zya Heroda naa zya Saatani? (b) Mbuti lweendo lwakuya ku Egepita mbolwiindene aloolo lwaambidwe mumabbuku aatwaano twakubeja?

9 Nokuba boobo, cikkomanisya ncakuti kwakali nguzu zyakali kubeleka kwiinda nguzu zya Heroda naa Saatani. Munzila nzi? Beenzu nobakasika kuŋanda ikwakali Jesu akumubona kali abanyina, bakaleta zipego kakunyina akulomba kupilusyilwa cintu nociba comwe. Eelo kaka Josefa a Mariya bakagambwa kupegwa zyintu zidula kapati “zyangolida, atununkilizyo tutegwa libano amulo” cakutayeeyela! Basikupandulula bweende bwanyenyeezi bakali kuyanda kuyakwaambila Mwami Heroda kubusena nkobakamujana mwana ngobakali kuyandaula. Nokuba boobo, Jehova wakacita cintu cimwi. Kwiinda muciloto, Leza wakalailila basikupandulula bweende bwanyenyeezi kupiluka kwabo kwiinda mukubelesya nzila imbi.—Amubale Matayo 2:1-12.

10 Mbobakazwida buyo basikupandulula bweende bwanyenyeezi, mungelo wa Jehova wakacenjezya Josefa kuti: “Buka, bweza mwana abanyina utijile ku Egepita, ukakkale okuya kusikila nkakwaambile kuti upiluke, nkaambo Heloda uyanda kutalika kuyandaula mwana kutegwa amujaye.” (Mt. 2:13) Aboobo, mbubwenya mbuli mbotwabona kumatalikilo, Josefa wakaatobela malailile mpoonya-mpoonya. Wakabikkila kapati maano kukukwabilila mwanaakwe akubweza mukwasyi wakwe kuya ku Egepita. Akaambo kakuti basikupandulula bweende bwanyenyeezi aaba bakapa mukwasyi wakwe zipego zidula, Josefa lino wakalijisi zyintu izyakali kukonzya kugwasya mukwasyi wakwe mulweendo lwabo.

Josefa wakacita zyintu cabusongo alimwi kakunyina kuliyanda kutegwa akwabilile mwanaakwe

11 Mukuya kwaciindi, mabbuku aajisi twaano twakubeja akazootondezya kuti lweendo lwabo lwakuya ku Egepita tiilwakajisi buyumuyumu. Twaano tuli mumabbuku aaya twaamba kuti munzila yamaleele mwana, Jesu, wakapa kuti musinzo ufwiimpe, zigwebenga zitabalwani, alimwi akupa mikunka kooka kutegwa banyina bacele micelo yayo. * Pele masimpe ngakuti, lweendo oolu lwakali lulamfwu lukatazya lwakuya kubusena nkobatakazyi.

Josefa wakali kubikkila kapati maano kumukwasyi wakwe

12. Ncinzi bazyali ibakomezya bana munyika iino mbyaabi ncobakonzya kwiiya kuzwa kuli Josefa?

12 Bazyali balakonzya kwiiya ziiyo zinji kuli Josefa. Wakalilibambilide kuuleka mulimo wakwe alimwi akuliimya buumi bubotu kutegwa akwabilile mukwasyi wakwe kuntenda. Mubwini, mukwasyi wakwe wakaubona kuti ncipego ciyandika kapati kuzwa kuli Jehova. Mazuba aano, bazyali bakomezya bana babo munyika mbyaabi iizwide zyintu zikonzya kuleta ntenda, kunyonganya, naa kunyonyoona baabo ibacili bana-bana. Eelo kaka balalumbwa  bazyali aabo babweza ntaamu cakufwambaana mbuli Josefa mbwaakacita, ikubeleka canguzu kukwabilila bana babo kuntenda zili boobu!

Josefa Wakaulanganya Mukwasyi Wakwe

13, 14. Nkaambo nzi Josefa a Mariya ncobakapilukila ku Nazareta akuyakukomezyela nkuku mukwasyi wabo?

13 Kulibonya kuti mukwasyi ooyu tiiwakakkala ciindi cilamfwu mu Egepita nkaambo tiilyakalampa mungelo wakaambila Josefa kuti Heroda wakafwa. Josefa wakapiluka amukwasyi wakwe kuya kucisi cokwabo. Businsimi bwakaindi bwakaambide kuti Jehova uyakwiita Mwanaakwe “kuzwa mu Egepita.” (Mt. 2:15) Josefa wakagwasyilizya mukuzuzikizya businsimi oobu, pele ino nkuuli nkwaakeelede kutola mukwasyi wakwe lino?

14 Josefa wakacita zyintu cakucenjela. Cabusongo, wakayoowa simulyazyina wa Heroda, Arkelao, awalo iwakajisi lunya alimwi iwakali mujayi. Leza wakasololela Josefa kubweza mukwasyi wakwe kuya kunyika, kupiluka kumunzi wakwe ku Nazareta mu Galilaya, ikule a Jerusalemu alimwi amakanze mabi oonse aakali mumo. Ooku walo a Mariya nkobakakomezyezya mukwasyi wabo.—Amubale Matayo 2:19-23.

15, 16. Ino mulimo wa Josefa wakali mulimo uuli buti, alimwi kweelede kuti wakali kubelesya zibelesyo nzi?

15 Bakali kupona buumi butayandiki zyintu zinji—pele bwakupenga-penga. Ibbaibbele lyaamba Josefa kuti wakali mubezi, ibbala lijatikizya nzila zinji nzyabelesya mubezi mbuli kugonka zisamu, kuzinyamuna, kuzibamba kutegwa abelesye kuyasya maanda, mato, amabbiliki masyoonto-syoonto, zikkocci, mavwili, majoko, alimwi azibelesyo ziindene-indene zibelesyegwa afaamu. (Mt. 13:55) Wakali mulimo muyumu uukatazya kapati. Kanji-kanji mubezi iwakali kupona ciindi Bbaibbele nolyakali kulembwa, wakali kubelekela munsi-munsi amulyango waŋanda yakwe naa mukaanda kakubezela kabambene aŋanda yakwe.

16 Josefa wakali kubelesya zibelesyo zisiyene-siyene, ambweni zimwi mbaausyi bakamupa. Kulangilwa kuti wakali kubelesya sikkweya, cipimyo, pensulo, kambezyo, isaha, nsando yacibulo, nsando yacisamu, ncezulo, cakudonkozya tupulo, guluu wiindene-indene, alimwi ambweni ampikili nokuba kuti zyakali kudula.

17, 18. (a) Ncinzi Jesu ncaakaiya kuzwa kuli bausyi bakujana? (b) Nkaambo nzi Josefa ncaakeelede kubeleka canguzu mumulimo wakwe?

17 Amweezeezye buyo Jesu kacili mulombe kalangilila bausyi bakujana kababeleka. Kalangilila zyoonse nzyobakali kucita bausyi, ba Josefa,  tacidoonekwi kuti wakali kulombozya kuba anguzu akucizyiba milimo njobakali kucita bausyi cabusongo. Kulangilwa kuti Josefa wakatalika kumutondezya mwanaakwe mbuli mbokucitwa tulimo tusyoonto-syoonto tuli mbuli kubotya mapulanga kwiinda mukubelesya cikanda canswi yakayuma. Alimwi kulangilwa kuti wakamutondezya Jesu masamu aasiyene-siyene aakali kubelesyegwa, mbuli masamu aamukuyu, amasamu mapati, naa aamaolifa.

Josefa wakayiisya mwanaakwe musankwa mulimo wakufwala mapulanga

18 Jesu alimwi wakalizyi kuti maanza aalya mayumu aakali kugonka zisamu, kwaandula mapulanga, akugagaila, ngamaanza ngamunya aakali kumukumbata akumuumbulizya walo, banyina, alimwi abanabokwabo. Masimpe, mukuya kwaciindi mukwasyi wa Josefa a Mariya wakakomena nkaambo bakazooba abana bali cisambomwe kunze aa Jesu. (Mt. 13:55, 56) Josefa wakeelede kubeleka canguzu kapati kutegwa abalanganye akubasanina boonse.

Josefa wakalizyi kuti kulanganya mukwasyi wakwe kujatikizya zyintu zyakumuuya ncecintu icakali kuyandika kapati

19. Mbuti Josefa mbwaakali kulanganya nzyobakali kuyandika kumuuya bamukwasyi wakwe?

19 Nokuba boobo, Josefa wakalizyi kuti kulanganya mukwasyi wakwe munzila yakumuuya ncecintu icakali kuyandika kapati. Aboobo, wakali kujana ciindi cakuyiisya bana bakwe kujatikizya Jehova Leza alimwi amilawo yakwe. Walo a Mariya bakali kubatola bana babo lyoonse kucikombelo kwalo Mulawo nkowakali kubalwa cakupozya alimwi akupandululwa. Ambweni Jesu wakali kuba amibuzyo minji bazwa kucikombelo alimwi Josefa wakali kusoleka kapati kwiingula mibuzyo yamwanaakwe iijatikizya Jehova amilawo yakwe. Josefa alimwi wakali kuunka amukwasyi wakwe kumapobwe aabukombi ku Jerusalemu. Kutegwa baunke ku Pobwe lya Kwiindilila lyamwaka, Josefa wakali kuyandika nsondo zyobilo zyakweenda musinzo uulampa makkilomita aali 120 kutegwa bakasekelele pobwe, mpoonya akupiluka.

Josefa lyoonse wakali kuunka amukwasyi wakwe kuyakukomba ku Jerusalemu kutempele

20. Mbuti basilutwe bamikwasyi Banakristo mbobakonzya kwiiya cikozyanyo ncaakasiya Josefa?

20 Basilutwe bamikwasyi Banakristo mazuba aano batobela cikozyanyo nciconya eeci. Balajana ciindi cakuyiisya bana babo zyintu zyakumuuya, alimwi eeci balacibikka mubusena bwakusaanguna kwiinda zyintu zyoonse kubikkilizya azyintu zyakumubili. Balabeleka canguzu kutegwa basololele mukukomba kwamumukwasyi aŋanda, alimwi akubatoleezya bana babo kumiswaangano ya Bunakristo, mipati amisyoonto. Mbubwenya mbuli Josefa, abalo balizyi kuti taakwe lubono lwiinda loolu ndobakonzya kubambila bana babo.

“Twapenga”

21. Ino ciindi ca Pobwe Lyakwiindilila lyakali buti kuli Josefa amukwasyi wakwe, alimwi ndilili Josefa a Mariya nobakazyiba kuti Jesu tanaakali aambabo?

21 Ciindi Jesu naakajisi myaka iili 12 yakuzyalwa, Josefa wakaunka  amukwasyi wakwe ku Jerusalemu mbuli lyoonse. Cakali ciindi ca Pobwe lya Kwiindilila, alimwi mikwasyi mipati minji yakali kweendela antoomwe munzila iyakali kwiinda musyokwe imwakali bwizu bulamfwu. Nobakali afwaafwi kusika ku Jerusalemu, banji bakali kwiimba ntembauzyo zizyibidwe zyabasikutanta. (Int. 120-134) Munzi weelede kuti wakazula azyuulu-zyuulu zyabantu. Kumane, mikwasyi yakatalika kupiluka kumaanda. Josefa a Mariya, ambweni akaambo kakujata bubi, bakayeeya kuti Jesu wakali kweendela antoomwe abanamukwasyi bambi. Nobakeenda musinzo weendwa buzuba bomwe kuzwa ku Jerusalemu, nceciindi nobakazyiba kuti Jesu tanaakali ambabo pe.—Lk. 2:41-44.

22, 23. Ino Josefa a Mariya bakacita nzi nobakazyiba kuti mwanaabo musankwa wasweeka, alimwi ncinzi Mariya ncaakaamba ciindi nobakamujana mwanaabo?

22 Kabayoowede, bakapiluka ku Jerusalemu kabayaabuyandaula Jesu moonse mobakainda. Amuyeeyele buyo mbokwakaumwine mumunzi lino  nobakali kuyaabweenda mumigwagwa kabayaabwiita zyina lyamwanaabo. Ino mwana ooyu wakali kuli? Kuzikusika mubuzuba bwatatu kabamuyandaula, sena Josefa wakatalika kuyeeya kuti waalilwa kuuzuzikizya mukuli uusetekene ooyu ngwaakapegwa aa Jehova? Kumamanino, bakazikuunka kutempele. Okuya bakamuyandaula mane bakasika muŋanda mobakabungene bamaalumi banji bayiide, ibakauzyi kabotu Mulawo—a Jesu uucili mwana kakkede akati kabo. Amuyeeye buyo Josefa a Mariya mbobakakatalusyigwa!—Lk. 2:45, 46.

23 Jesu wakali kuswiilila kubamaalumi aaba bakayiide akubabuzya mibuzyo cabusungu. Bamaalumi bakagambwa mbwaakali kutumvwisya twaambo mwana ooyu alimwi abwiinguzi bwakwe. Nokuba boobo, Mariya a Josefa bakagambwa kapati. Cibalo camu Bbaibbele aawa tacijisi majwi a Josefa. Pele majwi aa Mariya atondezya kuti ngaabo boonse bobilo aakuti: “Mwanaangu, nkaambo nzi ncootucitila boobu?  Mebo abauso twapenga kukuyandaula.”—Lk. 2:47, 48.

24. Mbuti Bbaibbele mbolitondezya bwini mboubede mukuli wakuba muzyali?

24 Aboobo, mumajwi buyo masyoonto, Jwi lya Leza lilatondezya bwini ncocaamba kuba muzyali. Cilakonzya kukatazya—nokuba kuti mwana ulilondokede. Kukomezya bana munyika eeyi mbyaabi mazuba aano kulakonzya kupa bazyali ‘kupenga’ kapati, pele bazyali balakonzya kuumbulizyigwa kwiinda mukuzyiba kuti Bbaibbele lilabwaamba buyumuyumu mbobaswaanganya.

25, 26. Mbuti Jesu mbwaakaingula bazyali bakwe, alimwi mbuti Josefa mbwaakalimvwa kujatikizya majwi aamwanaakwe?

25 Cikkomanisya ncakuti, Jesu wakakkala buyo mubusena mwalo mwaakalimvwa kuba munsi a Usyi wakujulu, Jehova, kwiiya zyoonse nzyaakali kukonzya. Aboobo, wakaingula bazyali bakwe kuzwa ansi aamoyo kuti: “Ino mwali kundiyandawida nzi? Sena tiimwalizyi kuti ndeelede kuba muŋanda ya Taata?”—Lk. 2:49.

26 Cakutadooneka, Josefa wakali kwaayeeya majwi aayo ziindi zinji. Ambweni wakaakkomanina kapati majwi aaya. Wakabeleka canguzu kuyiisya mwanaakwe wakujana kutegwa kalimvwa boobo kujatikizya Jehova Leza. Aciindi eeco mubuumi bwakwe kacili muniini, Jesu wakali kulikkomanina bbala lyakuti “taata”—kulimvwa kuli boobu kwakaboola akaambo kakukkala a Josefa.

27. Mbwaanga muli usyi bana, ncoolwe nzi ncomujisi, alimwi nkaambo nzi ncomweelede kuyeeya cikozyanyo ca Josefa?

27 Kwiinda mukuba usyi siluyando alimwi uukwabilila, mulakonzya kugwasya bana banu kubona Jehova kuti mbaba Usyi bakujulu alimwi akubayiisya kuti ulabayanda alimwi ulabakwabilila. Mbubwenya buyo, kuti kamujisi bana bakujana naa bakulela, mweelede kuyeeya cikozyanyo ca Josefa akubona mwana umwi aumwi kuti ulilibedelede alimwi akuti ulayandika kapati. Amubagwasye kuba acilongwe a Usyi wabo wakujulu, Jehova Leza.Amubale  Baefeso 6:4.

Josefa Wakazumanana Kusyomeka

28, 29. (a) Ino majwi aalembedwe mulugwalo lwa Luka 2:51, 52 atondezya nzi kujatikizya Josefa? (b) Mulimo nzi Josefa ngwaakacita kutegwa agwasye mwanaakwe kuyaambele mubusongo?

28 Ibbaibbele lyaamba buyo twaambo tusyoonto kujatikizya buumi bwa Josefa, pele tulagwasya kutulanga-langa cakusitikila. Tubala kuti Jesu  “wakazumanana kubamvwida” bazyali bakwe. Alimwi tujana kuti “Jesu wakali kuyaabukomena mubusongo aciimo, kayandwa kapati a Leza alimwi abantu.” (Amubale Luka 2:51, 52.) Ino majwi aaya atondezya nzi kujatikizya Josefa? Atondezya zyintu zinji. Twiiya kuti Josefa wakazumanana kusololela mukwasyi wakwe nkaambo mwanaakwe uulondokede wakali kubulemeka bweendelezi bwabausyi alimwi wakazumanana kulibombya.

29 Alimwi twiiya kuti Jesu wakazumanana kukomena mubusongo. Kweelede kuti Josefa wakabeleka canguzu kutegwa mwanaakwe akomene munzila eeyi. Mumazuba aayo, kwakali kaambyo kakaindi nkobakali kubelesya kapati ba Juda. Kaambyo aako kalakonzya kujanwa amazuba aano. Kakali kwaamba kuti balikke bantu bakali kukkala kabotu mbabakali kukonzya kuba basongo ncobeni, pele basambazi mbuli babezi, balimi, alimwi abafuzi “tabakonzyi kubeteka cabululami; alimwi tabeelede kujanika abusena aabandikilwa twaano.” Mukuya kwaciindi, Jesu wakatondezya kuti kaambyo aaka takagwasyi. Naakacili muniini, kanji-kanji wakali kubamvwa bausyi bakujana kabayiisya kabotu kujatikizya “bululami alimwi alubeta” lwa Jehova nokuba kuti bakali babezi. Alimwi tulakonzya kuba masimpe kuti Josefa wakali kucita oobo ziindi zinji.

30. Ncikozyanyo nzi Josefa ncaakasiila basilutwe bamikwasyi bamazuba aano?

30 Alimwi tulakonzya kubona bumboni butondezya Josefa mbwaakamukomezya Jesu. Kali mwana uubikkilwa maano, Jesu wakakomena akuba muntu muyumu alimwi uukkomene. Kuyungizya waawo, Josefa wakamuyiisya mwanaakwe kuba munkutwe mumilimo yakwe yakumubili. Jesu taakwe naakazizilwe buyo kuba mwana wasikufwala mapulanga, pele awalo wakali “sikufwala mapulanga.” (Mk. 6:3) Aboobo, Josefa wakazwidilila mukumuyiisya kwakwe. Basilutwe bamikwasyi cabusongo balaiya cikozyanyo ca Josefa, kulanganya bana babo akubona kuti balakonzya kulibelekela.

31. (a) Ino bumboni buliko butondezya nzi kujatikizya lufwu lwa Josefa? (Amubikkilizye akabbokesi.) (b) Ncikozyanyo nzi Josefa ncaakasiya ncotweelede kwiiya?

31 Twasika mucibalo camu Bbaibbele icaamba kubbapatizyigwa kwa Jesu kajisi myaka iili 30 yakuzyalwa, tujana kuti Josefa taambidwe pe mucibalo. Kweelana abumboni buliko, kulibonya kuti Mariya wakali mukamufwu ciindi Jesu naakatalika mulimo wakwe. (Amubone kabbokesi kakuti  “Ino Josefa Wakafwa Lili?”) Nokuba boobo, Josefa wakasiya cikozyanyo cibotu, cikozyanyo causyi iwakakwabilila mukwasyi wakwe, iwakalanganya alimwi iwakazumanana kusyomeka kusikila kumamanino. Kufwumbwa usyi bana, silutwe wamukwasyi naa Munakristo uuli woonse, inga wacita kabotu kwiiya lusyomo lwa Josefa.

^ munc. 4 Mumazuba aayo, kusinkilila kwakali kubonwa buyo mbuli kuti ncikwati.

^ munc. 8 “Nyenyeezi” eeyi tiiyakali cintu buyo cilicitikila cigambya icakali kulangilwa pe; alimwi tiiyakatumwa a Leza. Cakutadooneka, Saatani wakabelesya cintu eeci cigambya kaali makanze aakwe mabi aakujaya Jesu.

^ munc. 11 Bbaibbele caantangalala lilatondezya kuti maleele aakusaanguna ngaakacita Jesu kaali “citondezyo cakwe cakusaanguna,” akacitika ciindi kabbapatizyidwe kale.—Joh. 2:1-11.