Ciindi Jesu nobamwaanga mumuunda wa Getesemane, baapostolo bamusiya akutija kabayoowede. Nokuba boobo, bobilo akati kabo kumbele baima. Baapostolo aaba ngu Petro “asikwiiya uumbi,” walo uulangilwa kuti mwaapostolo Johane. (Johane 18:15; 19:35; 21:24) Kuboneka kuti bamusangana Jesu ciindi natolwa kuŋanda ya Anasi. Ciindi Anasi naatuma Jesu ku Mupaizi Mupati Kayafa, Petro a Johane batobela kabeendela alaale. Kulangilwa kuti kuli zintu zyobilo zibakatazyide mumizeezo, bayoowa kujaigwa alimwi balilibilikide azyeezyo ziyanda kucitikila Simalelaabo.

Johane ulizyibidwe kumupaizi mupati, aboobo wacikonzya kunjila mulubuwa lwaŋanda ya Kayafa. Petro wasyaala anze kumulyango kusikila ciindi Johane naajokela akwaambaula amubelesi musimbi uulinda mulyango. Eelyo Petro wazumizyigwa kunjila.

Masiku aaya kulatontola, aboobo aabo bali mulubuwa bakunka mulilo wamalasya. Petro wakkala ambabo kayota mulilo ciindi nalindila “kuti abone citiicitike” nabetekwa Jesu. (Matayo 26:58) Lino mumumuni wamulilo, mulindizi wamulyango iwazumizyide Petro kunjila wamulangisya. Musimbi ooyo wati: “Sena ayebo toli umwi wabasikwiiya bamuntu ooyu?” (Johane 18:17) Musimbi ooyo tali alikke wamuzyiba Petro akumwaamba kuti wakali limwi a Jesu.—Matayo 26:69, 71-73; Marko 14:70.

Eeci camucima kapati Petro. Wasola kulisisa, mane limwi waunka kumanjililo. Aboobo Petro wakaka kuti ulimuzyi Jesu, aciindi cimwi waamba kuti: “Tandimuzyi alimwi tandicizyi ncoamba.” (Marko 14:67, 68) Kumane buya watalika “kulisinganya akukonka,” calo icaamba kuti ulisinizyide kuti waamba masimpe alimwi ulizuminide kucitikilwa cintu cibi ikuti majwi aakwe kaali aakubeja.—Matayo 26:74.

Kulubazu lumwi, Jesu uli mukubetekwa, ambweni mucibeela caŋanda ya Kayafa icili atala lyalubuwa. Kweelede kuti Petro alimwi abamwi ibalindila ansi babona bakamboni baindene-indene ibaitwa kuti bape bumboni kabanjila akuzwa.

Ŋambawido ya Petro yaku Galilaya ipa bumboni busalede bwakuti ulabeja naamba kuti tamuzyi Jesu. Kuyungizya waawo, muntu umwi munkamu mubbululu wa Maliko, ooyo Petro ngwaakoswede kutwi. Aboobo, wamugama Petro akumubuzya kuti: ‘Sena toli nduwe yebo ngundabwene koli anguwe mumuunda?’ Petro naakaka ciindi catatu, mukombwe walila, mbubonya mbwaambide Jesu.—Johane 13:38; 18:26, 27.

Kuboneka kuti aciindi eeci Jesu uli mukkoce lyaŋanda yamujulu ililangene alubuwa. Mwami wacenguluka akulanga Petro, calo cilangilwa kuti camuyasa kumoyo Petro. Wayeeya ncaamwaambilide Jesu mawoola masyoonto buyo aayinda muŋanda yamujulu mobabede. Amuyeeye buyo mbwaalimvwa Petro naazyiba ncicaamba ncaacita! Petro waunka anze akulila kapati.—Luka 22:61, 62.

Ino cacitika-citika buti eeci? Ino wabaanzi Petro, ncinzi camupa kuti amukake Simalelaakwe nokuba kuti wali kulimvwa kuti muyumu kumuuya alimwi ulasyomeka? Kasimpe kali mukuyabaizyigwa, alimwi Jesu uli mukwaambwa kuti ncigwebenga cibyaabi kapati. Muciindi cakuti Petro amwiiminine muntu ooyo uutakwe mulandu, wamukaka Ooyo uujisi “majwi aapa buumi butamani.”—Johane 6:68.

Eeci icakamucitikila Petro citondezya kuti naba muntu uulaalusyomo luyumu alimwi uulyaabide ulakonzya kuwa ikuti naa tanaalibambila kabotu kulwana mapenzi naa masunko aaboola cakutayeeyela. Eeci icakamucitikila Petro ncicenjezyo kubabelesi ba Leza boonse!