LUKA 10:38–11:13

  • JESU WASWAYA MARTA A MARIYA

  • KUZUMANANA KUPAILA KULAYANDIKA

Kumungenyu wakujwe wa Cilundu ca Maolifa, ikulampa makkilomita aatandila kuli otatwe kuzwa ku Jerusalemu, kuli munzi wa Betaniya. (Johane 11:18) Jesu waunka ooko akunjila muŋanda yabanabunyina bobilo, Marta a Mariya. Balo alimwi amwanookwabo musankwa, Lazaro, mbalongwe ba Jesu, alimwi bamutambula amaanza obilo.

Ncoolwe cipati kuswaigwa a Mesiya. Marta uliyandide kapati kumusamausya Jesu, aboobo watalika kubamba budodoodo. Ciindi Marta nakutauka, mwanookwabo, Mariya, walo ulikkede kumaulu aa Jesu akuswiilila nzyali mukwaamba. Kabe kaindi, Marta waambila Jesu kuti: “Mwami, sena tokwe makani kuti mwanookwesu wandilekelezya kucita zintu? Komwaambila aboole azoondigwasye.”—Luka 10:40.

Muciindi cakumutongooka Mariya, Jesu wapa Marta lulayo akaambo kakubikkila maano kapati kuzintu zyakumubili, ulaamba: “Marta, Marta, ulalibilika akunyonganizyigwa azintu zinji. Pele nzintu buyo zisyoonto ziyandika naa kuti ncomwe buyo. Mariya walo wasala cibeela cibotu, alimwi takanyangwi ncico pe.” (Luka 10:41, 42) Inzya, Jesu watondezya kuti taciyandiki kutola ciindi cinji kapati mukubamba zyakulya zinji. Zyakulya zisyoonto buyo inga zyazulila.

Marta ulaamakanze mabotu. Uyanda kusamausya mweenzu. Pele ikulibilika kapati akaambo kazyakulya kumupa kwiindwa malailile aayandika kapati aazwa ku Mwana wa Leza! Jesu wakankaizya kuti Mariya wasala cintu cibotu, calo citiimuletele mpindu iitamani walo, alimwi akutupa ciiyo swebo toonse ncotweelede kuyeeya.

Aciindi cimbi, Jesu wayiisya ciiyo acimbi iciyandika mbuli ceeci. Sikwiiya umwi wamubuzya kuti: “Mwami, kotuyiisya kupaila mbubonya Johane awalo mbwaakayiisya basikwiiya bakwe.” (Luka 11:1) Jesu wakacita kale oobo imwaka omwe acisela wainda mu Mulumbe wakwe Waacilundu. (Matayo 6:9-13) Nokuba boobo, sikwiiya ooyu ambweni tanaakaliko aciindi eeco, aboobo Jesu wainduluka twaambo tupati-pati. Mpoonya wapa cikozyanyo kutegwa akankaizye mbociyandika kuzumanana kupaila.

Waamba kuti: “Atwaambe kuti umwi akati kanu kajisi mweenzinyina eelyo akati kamasiku waunka kulinguwe akumwaambila kuti, ‘Kondigwasya zinkwa zyotatwe musa, nkaambo lino aawa ndaswaigwa mweenzuma umwi uuli mulweendo, pele ndinyina cakumupa.’ Pele ooyo kali muŋanda wamwiingula kuti: ‘Koleka kundikatazya. Mulyango wajalwa kale, alimwi mebo abana bangu basyoonto toona kale. Tandikonzyi kubuka akukupa cintu cili coonse.’ Ndimwaambila kuti, masimpe ulabuka natayandi akumupa zyoonse nzyayanda ikutali akaambo kakuti mweenzinyina, pele akaambo kakuti wazumanana kumukombelezya.”—Luka 11:5-8.

Aawa Jesu taambi kuti Jehova tayandi kuswiilila kulomba kwabantu, mbuli mweenzinyina wamuntu waambwa mucikozyanyo eeci. Pele utondezya kuti, ikuti mweenzinyina ooyu nokuba kuti tayandi, ulamupa mweenzinyina eeco ncaalomba akaambo kakuzumanana kwakwe, nkokuti masimpe kuti Taateesu wakujulu siluyando uyoobamvwa babelesi bakwe basyomeka nobamulomba camoyo woonse! Jesu wazumanana kuti: “Amuzumanane kulomba, eelyo muyoopegwa nzyomulomba; amuzumanane kuyandaula, eelyo muyoojana; amuzumanane kukonkomona, eelyo muyoojalwidwa. Nkaambo muntu uuli woonse uulomba ulatambula, ooyo uuyandaula ulajana, ayooyo uukonkomona ulajalwidwa.”—Luka 11:9, 10.

Mpoonya Jesu wakatonkomeka kaambo kwiinda mukupa cikozyanyo causyi mwana, ulaamba: “Sena nkwali usyi akati kanu uunga ikuti mwanaakwe wamulomba nswi, ulamupa nzoka muciindi canswi? Naa ikuti walomba ji, sena ulamupa kabanze? Aboobo ikuti nywebo nokuba kuti muli babi, mulicizyi kubapa zipego zibotu bana banu, nkokuti Taata uuli kujulu uyakwiinda kubapa muuya uusalala aabo ibamulomba!” (Luka 11:11-13) Eelo kaka taciliboteli cisyomezyo eeci cakuti Taateesu uliyandide kutumvwa akutupa nzyotuyandika!