LUKA 7:36-50

  • MUKAINTU SIZIBI WANANIKA JESU MAFWUTA KUMAULU

  • KULEKELELA ZIBI KWAPANDULULWA KWIINDA MUKUBELESYA CIKOZYANYO CASIKUKWELETA

Kweelana amboibede myoyo yabo, bantu baliindene mbobacita nobamvwa nzyaamba alimwi akubona nzyacita Jesu. Eeci calibonya kuŋanda imwi mu Galilaya. Imu Farisi wazina lya Simoni waitila Jesu kucakulya, ambweni uyanda kumulangila afwaafwi muntu ooyu uucita milimo eeyi iigambya. Jesu wazumina kuunka, ambweni eeci wacibona kuba coolwe cakubakambaukila aabo baliko, mbubonya mbwaali kucita aziindi zimwi naali kuzumina kwiitilwa kucakulya kuli basimutelo alimwi abasizibi.

Nokuba boobo, Jesu tanaatambulwa camaanza obilo, mbubonya mbuli cilengwa cakutambula beenzu. Mucisi ca Palestine, mumigwagwa imwi kuli lusuko alimwi kulapya ansi cakunga muntu naenda kasamide mpato maulu alapya kunsi alimwi alabija lusuko, aboobo kuli cilengwa cakusanzya mweenzu kumaulu ameenda aatontola. Pele oobu tabusyi mbwaacitilwa Jesu. Alimwi tanaamyontwa pe mbuli mbobavwula kucitwa beenzu. Cilengwa acimbi ncakumutila mafwuta mweenzu kumutwe kacili citondezyo cabulongwe akusamausya beenzu. Acalo eeci tiicacitwa kuli Jesu. Sena mwati watambulwa ncobeni?

Beenzu boonse ibakkede kutebulu batalika kulya. Nobali mukulya, mukaintu umwi iwataitwa wanjila muŋanda cakaumuumu. Mukaintu ooyu ‘ulizyibidwe mumunzi kuti ngusizibi.’ (Luka 7:37) Bantu boonse batalondokede mbaasizibi, pele mukaintu ooyu kuboneka kuti upona buumi bwakutalilemeka, ambweni muvwuule. Kweelede kuti wakamvwa makani ngaakali kuyiisya Jesu, kubikkilizya akutamba kwakwe kwakuti ‘boonse aabo balemenwa baboole kulinguwe kuti abakatalusye.’ (Matayo 11:28, 29) Kuboneka kuti akaambo kakukulwaizyigwa amajwi alimwi amilimo ya Jesu, waboola kuzyikumubona.

Waboola kusyule lya Jesu kutebulu akufwugama kumaulu aakwe. Misozi yakwe yeenda akulokela amaulu aa Jesu, mpoonya waipukuta amasusu aakwe. Waamyonta maulu aa Jesu akwaananika mafwuta aanunkilila ngaaletelezya. Simoni walanga cakutakkomana akutalika kulyaambauzya mumoyo wakwe kuti: “Ikuti muntu ooyu naali musinsimi naazyiba kuti nguni alimwi ambwabede mukaintu ooyu uumuguma, ikuti ngusizibi.”—Luka 7:39.

Akaambo kakuzyiba ncayeeya Simoni, Jesu wamwaambila kuti: “Simoni, kuli nceyanda kukwaambila.” Simoni wati: “Omwiiyi, kondaambila!” Mpoonya Jesu waamba kuti: “Kwakali bantu bobilo bakakweletede mali kumuntu umwi; umwi wakakweletede madinari aali 500, pele umwi aali 50. Nibakabula cintu cakubbadela cikwelete eeco, boonse bobilo wakabalekelela amoyo woonse. Aboobo nguni akati kabo uuyoomuyanda kapati?” Ambweni katabikkilide amaano, Simoni wavwiila kuti: “Ndasyoma ngooyo ngwaakalekelela mali manji.”—Luka 7:40-43.

Jesu wati mbombubo. Kumane kalangide mukaintu ooyu, waambila Simoni kuti “Sena wamubona mukaintu ooyu? Ndanjila muŋanda yako pele tonoondipa maanzi aakusamba kumaulu aangu. Pele mukaintu ooyu watesya maulu aangu amisozi yakwe akwaapukuta amasusu aakwe. Yebo tonoondimyonta pe, pele mukaintu ooyu kuzwa ciindi ncaanjila tanaaleka kumyonta maulu aangu. Yebo tonoondinanika mafwuta kumutwe, pele mukaintu ooyu wandinanika kumaulu mafwuta aanunkilila.” Jesu wabona kuti mukaintu ooyu wapa bumboni bwakuti weempwa kuzwa ansi amoyo akuleka buumi bwakwe bwakutalilemeka. Aboobo Jesu wamanizya amajwi aakuti: “Ndikwaambila kuti zibi zyakwe zyalekelelwa nokuba kuti nzinji, nkaambo watondezya luyando lupati. Pele ooyo uulekelelwa kusyoonto utondezya luyando lusyoonto.”—Luka 7:44-47.

Aawa Jesu tazumizyi buvwuule pe. Pele utondezya kuti ulabafwida lubomba akubeengelela bantu ibacita zibi zipati pele ibatondezya kuti beempwa akujokela kuli Kristo kuti abakatalusye. Eelo kaka mukaintu ooyu walimvwa kwaanguluka ciindi Jesu naamba kuti: “Zibi zyako zyalekelelwa. . . . Lusyomo lwako lwakufwutula; koya muluumuno.”—Luka 7:48, 50.