MATAYO 8:28-34 MARKO 5:1-20 LUKA 8:26-39

  • MADAIMONA WAATANDILA MUNGULUBE

Basikwiiya nobasika kunkomwe musyule lyakucitikilwa cintu ciyoosya mulwizi, babona cintu cimwi ceenzya mubili. Baalumi bobilo ibayoosya kapati, ibanjidwe madaimona, bazwa kunamaumbwe aalaafwaafwi akuboola kuli Jesu kabazyaabubalika! Umwi wabaalumi aaba nguwaambwa kapati ambweni akaambo kakuti mukali kapati kwiinda mweenzinyina alimwi walikweendelezyegwa amadaimona kwaciindi cilamfwu.

Muntu ooyu iweetezya walikweendeenda amantanda. Masiku amasyikati ‘uloongolola kunamaumbwe amumalundu, alimwi ulalinengaula amabwe.’ (Marko 5:5) Mukali kapati cakunga bantu balayoowa kwiinda nzila eeyo. Bamwi bakasoleka kumwaanga, pele ulazidunsaula nketani akutyolaula nsimbi izyaangidwe kumaulu aakwe. Kunyina uukonzya kumukoma.

Mwaalumi ooyu naasika kuli Jesu akuvwuntama kumaulu aakwe, imadaimona aamweendelezya amupa kukwiila kuti: “Ino ndijisi kaambo nzi anduwe Jesu, O Mwana wa Leza Mupatikampatila? Kokonka muzina lya Leza kuti tokoondipenzya.” Jesu watondezya kuti ulaanguzu zyakutanda madaimona, aboobo waamba kuti: “Kozwa mumuntu ooyu, yebo omuuya uusofweede.”—Marko 5:7, 8.

Mubwini, mwaalumi ooyu unjidwe madaimona manji. Jesu naabuzya kuti, “Nduwe ni zina?” waingula kuti: “Ndime Makamu [“Legioni,” bupanduluzi buyungizyidwe], nkaambo tuli banji kapati.” (Marko 5:9) Nkamu yabasikalumamba yaba Roma iitegwa Legioni ijisi zyuulu-zyuulu zyabasikalumamba; aboobo, madaimona manji amuzinga mwaalumi ooyu, alimwi amvwa kabotu kumupenzya. Amukombelezya Jesu “kuti ataatandili mumulindi uutagoli.” Cilisalede kuti alicizyi cisubulo ncaayakupegwa kumbele alo antoomwe amusololi wangawo, Saatani.—Luka 8:31.

Munsi-munsi awaawa kuli butanga bwangulube zitandila ku 2,000 izicela; ngulube tazisalali kweelana a Mulawo alimwi ba Juda tabeelede buya kuzivwuba. Madaimona aamba kuti: “Kotutandila mungulube kutegwa tunjile mulinzizyo.” (Marko 5:12) Jesu waambila madaimona kuti aunke, eelyo azwa akuyakunjila mungulube. Mpoonya aawo ngulube zyoonse zili 2,000 zyabalika akusotokela mujeleele akunyikila mulwizi.

 Beembezi bangulube eezyi nobabona boobu, baunka cakufwambaana mumunzi amutunzi kuyakwaamba cacitika. Bamvwe boobo bantu baboola kuzyikubona cacitika. Nobasika, babona kuti muntu ooyo iwagusyigwa madaimona lino uli kabotu alimwi ulibateme. Taaku buya waba muntu, ulisamide alimwi ulikkede kumaulu aa Jesu!

Bantu aabo ibamvwa cacitika naa kubona muntu ooyu bayoowa citaambiki, tabazyi citiibacitikile. Bamukombelezya Jesu kuti azwe mucooko cabo. Jesu nali mukutanta bwato kuti aunke, muntu ooyo iwagusyigwa madaimona wamulomba kuti baunke limwi. Pele Jesu wamwaambila kuti: “Koya kumunzi kuli bamukwasyi wako, ukabaambile zintu zyoonse Jehova nzyaakucitila ambwaakufwida luzyalo.”—Marko 5:19.

Kanji-kanji Jesu ulailila bantu mbaponya kuti bataambili muntu umbi nkaambo tayandi kuti bantu bamuzyibe kwiinda mumamvwaamvwa buyo. Pele aciindi eeci, mwaalumi ooyu iwagusyigwa madaimona waba bumboni busalede butondezya nguzu nzyajisi Jesu alimwi ulakonzya kukambaukila bantu aabo Jesu lwakwe mbatalangilwi kusikila. Alimwi bumboni bwakwe bulakonzya kumana matongoosi aali woonse aakonzya kuba akaambo kakusweekelwa ngulube. Aboobo, mwaalumi ooyu waunka akutalika kwaambilizya nzyaamucitila Jesu mucooko coonse ca Dekapole.