MATAYO 20:17-28 MARKO 10:32-45 LUKA 18:31-34

  • JESU ALIMWI WASINSIMA LUFWU LWAKWE

  • KULANGANYA MAKANI AABAAPOSTOLO AAKUYANDA KUBA AMPUWO

Jesu abasikwiiya bakwe nobasika kumamanino aalweendo lwabo kumusanza mu Pereya kugama ku Jerusalemu, bazabuka Mulonga wa Jordano munsi-munsi amunzi wa Jeriko. Beendela antoomwe abantu bamwi ibaunka ku Pobwe Lyakwiindilila lyamu 33 C.E.

Jesu uleenda kumbele lyabasikwiiya, kakanzide kusika mumunzi Pobwe Lyakwiindilila kalitanatalika. Pele basikwiiya baliyoowede. Musyule oomu ciindi Lazaro naakafwa alimwi Jesu naakali kuyanda kuunka ku Judaya kuzwa ku Pereya, Tomasi wakaambila beenzinyina kuti: “Atuunke andiswe kutegwa tukafwe anguwe.” (Johane 11:16, 47-53) Aboobo cilalimvwisya kuti basikwiiya baliyoowede kuunka ku Jerusalemu akaambo kantenda eeyi iiliko.

Kutegwa abagwasye kulibambila zili kumbele, Jesu wabatola kumbali baapostolo akubaambila kuti: “Tuunka ku Jerusalemu, eelyo Mwanaamuntu uyakwaabwa kuli basilutwe babapaizi abalembi. Bayoomupa mulandu wakuti ajaigwe akumwaaba kubantu bamasi kuti bakamusampaule akumukwibbaula akumujaya aacisamu; mpoonya mubuzuba bwatatu uyoobusyigwa.”—Matayo 20:18, 19.

Eeci nciindi catatu Jesu ncaambila basikwiiya bakwe kujatikizya lufwu lwakwe alimwi akubusyigwa. (Matayo 16:21; 17:22, 23) Pele aciindi eeci waamba kuti uyakujaigwa aacisamu. Balimuswiilide pele tabazyi ncapandulula. Ambweni balangila kubukulusyigwa kwabwami bwa Israyeli anyika kutegwa babe abulemu alimwi ampuwo mubwami bwaanyika antoomwe a Kristo.

Banyina babaapostolo bobilo, nkokuti Jakobo alimwi a Johane, balo balangilwa kuti mbaa Salome, bali akati kabasilweendo. Jesu wakapa baapostolo aaba bobilo zina ilyaamba kuti “Bana ba Muzumo,” cakutadooneka akaambo kabusungu bwabo. (Marko 3:17; Luka 9:54) Kwaciindi cili mbocibede, aaba bobilo bali kuyandisya kuba  acuuno caatala mu Bwami bwa Kristo. Banyina balaazyi makani aaya. Lino kabaiminina bana babo, baboola kuli Jesu, bamufwugamina akumulomba cintu cimwi. Jesu wababuzya kuti: “Ino muyanda nzi?” Bavwiila kuti: “Kolailila kuti bana bangu aaba bobilo bakakkale umwi kujanza lyako lyalulyo uumbi kujanza lyako lyalumwensyi mu Bwami bwako.”—Matayo 20:20, 21.

Mubwini kulomba ooku kuzwa kuli Jakobo alimwi a Johane. Mbokunga wazwa aakwaamba mbwayakusampaulwa akupenzyegwa, Jesu wabaambila kuti: “Tamucizyi ncomulomba. Sena mulakonzya kunywa nkapu njendiyanda kunywa?” Bavwiila kuti: “Tulakonzya.” (Matayo 20:22) Kuboneka kuti ambuliino, tabanamvwisya cini ncocaamba eeci kulimbabo.

Nokuba boobo, Jesu wabaambila kuti: “Masimpe muyoonywa nkapu yangu, pele kujatikizya makani aakukkala kujanza lyangu lyalulyo alyalumwensyi tandili ndime ndisala pe, pele masena aaya ngabaabo mbaakabambila Taata.”—Matayo 20:23.

Nobamvwa makani aaya aajatikizya cintu ncobalomba ba Jakobo a Johane, baapostolo bamwi bali kkumi banyema. Sena nkaambo kakuti musyule oomu ba Jakobo a Johane mbabakali kumbele ciindi baapostolo nobakakazyanya kujatikizya mupati kwiinda boonse? (Luka 9:46-48) Kufwumbwa mbocibede, kulomba ooku kutondezya kuti aaba bali Kkumi Ababili tabanalubelesya lulayo Jesu ndwaakapa kujatikizya kucita zintu mbuli muniini. Baciyanda kuba ampuwo.

Jesu wasala kumana mazwanga aaya alimwi amapenzi aali mukucitika akaambo kangawo. Waita bali Kkumi Ababili akubapa lulayo caluyando, ulaamba: “Mulizyi kuti aabo babonwa kuti mbaleli bamasi balabadyaaminina bantu, alimwi bapati akati kabo balabeendelezya calunya. Oobu tabusyi mboceelede kuba akati kanu pe; pele kufwumbwa uuyanda kuba mupati akati kanu weelede kuba mubelesi wanu, alimwi kufwumbwa uuyanda kuba wakusaanguna akati kanu weelede kuba muzike waboonse.”—Marko 10:42-44.

Jesu waamba cikozyanyo ncibeelede kwiiya, nkokuti cikozyanyo cakwe. Wapandulula kuti: “Mbubonya Mwanaamuntu mbwaakaboola, ikutali kuzoobelekelwa, pele kuzoobeleka akupa buumi bwakwe kuti bube cinunuzyo cakununuzya banji.” (Matayo 20:28) Kwamyaka iisika kuli yotatwe, Jesu wali kubelekela bamwi. Alimwi ucicita oobo mane buya kusikila nkwayakufwida bantu! Basikwiiya bakwe boonse beelede kuba amizeezo njoonya ya Kristo yakuyanda kubelekela bamwi muciindi cakuyanda kubelekelwa, ikuba muniini kuli boonse muciindi cakuyanda kuba acuuno caatala alimwi ampuwo.