LUKA 2:40-52

  • JESU WABABUZYA MIBUZYO BAMAYI KAJISI MYAKA IILI KKUMI AIBILI

  • JESU WAAMBA JEHOVA KUTI “TAATA”

Lino ncilimo. Aboobo, eeci nciindi cakuti mukwasyi wa Josefa antoomwe abeenzinyina abasizinyina batalike lweendo ndobacita mwaka amwaka lwakuya ku Jerusalemu. Inga balaunka ku Jerusalemu kuyakusekelela Pobwe Lyakwiindilila, kweelana ambowaamba Mulawo wa Musa. (Deuteronomo 16:16) Lweendo oolu lwakuzwa ku Nazareta kuunka ku Jerusalemu lulampa makkilomita aatandila ku 120. Aciindi eeci bantu boonse inga bajisi bubi alimwi inga balikkomene kapati. Jesu, lino uujisi myaka yakuzyalwa iili 12 kweelede kuti ulalilangila kapati pobwe eeli alimwi acoolwe cakuyakuba afwaafwi atempele alimwi.

Kuli Jesu amukwasyi wakwe, Pobwe Lyakwiindilila tacili cintu cabuzuba bomwe buyo pe. Buzuba butobela buzuba bwa Pobwe Lyakwiindilila, nkokuti “buzuba bwakusaanguna bwa Zinkwa Zitajisi Bumena,” ngamatalikilo aa Pobwe lya Zinkwa Zitajisi Bumena ilitola mazuba aali ciloba. (Marko 14:12) Pobwe eeli libonwa kuti ncibeela caciindi ca Pobwe Lyakwiindilila. Lweendo loonse kuzwa kumunzi nkobazwa ku Nazareta kubikkilizya aciindi ncobakkala mu Jerusalemu, alimwi aciindi ncobatola kupiluka kumunzi nkobazwa lutola mazuba aatandila kunsondo zyobilo. Pele uuno mwaka, akaambo kacintu cimwi cacitika icijatikizya Jesu, lwatola ciindi cilamfwu kwiinda waawo. Cintu eeco cijatikizya penzi ndyobazyiba nobali munzila kabapiluka kuzwa ku Jerusalemu.

Nobayabweenda, Josefa a Mariya bayeeya kuti Jesu uyaabweendela antoomwe ankamu yabasazinyina abeenzinyina ibapiluka kwabo kulubazu lwakunyika. Pele masiku nobakkala kuti boone akulyookezya, babona kuti tako akati kabo. Aboobo baunka kuyabumuyandaula muli basilweendonyina, pele tiibamujana pe. Basoleka kumuyandaula koonse-koonse, pele tiibamujana! Aboobo Josefa a Mariya bapilukila ku Jerusalemu kuyakumuyandaula.

Bamuyandaula buzuba boonse, pele tiibamujana. Abuzuba bwabili tiibamujana pe. Limwi buzuba bwatatu bamujana ngooyu mwanaabo mutempele eelyo ilijisi maanda mapati manji aamukati. Bamubona Jesu ulikkede akati kabamayi bamwi iba Juda. Ulaswiilila akubabuzya mibuzyo, alimwi wabagambya akaambo kabusongo bwakwe.

Mariya wamubuzya kuti: “Mwanaangu, nkaambo nzi ncootucitila boobu? Mebo abauso twapenga kukuyandaula.”​—Luka 2:48.

Jesu wagambwa kuti tiibalikuzyi kwakumujana. Wababuzya kuti: “Ino mwali kundiyandawida nzi? Sena tiimwalizyi kuti ndeelede kuba muŋanda ya Taata?”​—Luka 2:49.

Pele mbwaanga baba antoomwe alimwi, Jesu wapiluka kwabo ku Nazareta antoomwe a Josefa a Mariya alimwi wazumanana kubamvwida. Wazumanana kuyaabukomena mubusongo aciimo. Nokuba kuti ucili muniini, ulayandwa kapati a Leza alimwi abantu. Inzya, kuzwa kubwana bwakwe, Jesu wapa citondezyo cibotu kutali buyo mukubikka zintu zyakumuuya kumbele pele alimwi amukulemeka bazyali bakwe.