SIKUFWIDWA umwi ulalemba ategwa: “Kubwana mu-England, ndakayiisyigwa kutalitondezya mbuli mbwelimvwide mubuleya. Ndilabayeeya bataata, balo bakazwide mubusilumamba, kabati kuli ndime mujwi lyabukali, ‘Utalili yawe!’ iciindi nokwaba cimwi cindicisa. Nsekonzi kuyeeya kuti naa baama kuli nobakamyontede antela kujatilila umwi wesu tobana (twakali tone swebo). Ndakalaamyaka 56 ciindi nindakababona kufwa bataata. Ndakalimvwa kusweekelwa kupati. Pele, ikusaanguna, cakandikakila kulila.”

Mumisyobo imwi, bantu balakutondezya kulimvwa kwabo caantangalala. Kuti naa baliboteledwe antela balyuuside, ibambi balaziba kuti balimvwide boobo. Pele mumasena amwi aanyika, kapati mu-Europe nkwiili kunyika amu-Britain, ibantu, kapati baalumi, balizibizidwe kusisikizya kulimvwa kwabo, akudyaaminina zili mumyoyo yabo, ikujata camba alimwi akutaba amoyo musyoonto. Pele ciindi mwazimininwa muyandwa wenu, sena kuli mbocilubide ikutondezya buumba bwenu? Ino Bbaibbele lyaambanzi?

Aabo Bakalila mu-Bbaibbele

Ibbaibbele lyakalembwa aba-Hebrayo bakucisi cakujwe cina-Mediterranean, balo bakali bantu balitondezya. Lijisi zikozyanyo zinji zyabantu bakatondezya buumba bwabo caantangalala. Mwami Davida wakamulila mwanaakwe Amnoni iwakajaigwa. Atwaambe kuti, ‘wakalila kulila kupati loko.’ (2 Samuele 13:28-39) Wakamulila naba mwana wakwe mumpelenge Abisalomu, ooyo walo wakasolede kunyanzya bwami. Imakani aali mu-Bbaibbele alatwaambila: “Mpawo mwami wakakankama, wakatanta kuŋanda yakujulu kumulyango, wakaya bulila, nkabela mbuboobo mbwaakaamba naakali kuya, wakati, Maawe mwanaangu Abisalomu! Mwanaangu! Abisalomu! Nindakafwa ndemwini mucibaka cako! Abisalomu mwanaangu! Mwanaangu!” (2 Samuele 18:33) Davida wakalila bunga bwalila usyi bana uuli oonse uuluzi. Alimwi nziindi zyongaye ibazyali nobalombozya kuti kubota bafwa mbabo mubusena bwamwana! Cilibonya kuba ceenzu boobo ikuti mwana wafwa muzyali katana.

Ino Jesu wakalutambula buti lufu lwamulongwaakwe Lazaro? Wakalila naakavula munsi lyacuumbwe cakwe. (Johane 11:30-38) Nokwakainda ciindi, Mariya Magadalene wakalila naakavula munsi lyacuumbwe ca-Jesu. (Johane 20:11-16) Masimpe, Imunakristo uubuteelela bulangizi bwabubuke buli mu-Bbaibbele tausi cakutaumuzika, mbuli bucita bamwi balo batajisi ntalisyo yamu-Bbaibbele iisalala yalusyomo  lwabo ikujatikizya bube bwabafu. Pele mbuli muntu uulimvwa bulimvwa muntu woonse uuluzi, Imunakristo wamasimpe, naba abulangizi bwabubuke, ulaba mubuumba alimwi ulaumbilwa bayandwa nobazimina.—1 Ba-Tesalonika 4:13, 14.

Ikulila naa Kutalila

Mbuti ino swebo mbotulutambula sunu? Sena mucijana kuba cintu cikatazya antela cijazya nsoni kulitondezya mbuli mbomulimvwide? Ino basikulaya bakulwaizya kutyani? Imizeezo yabo yamazubaano kanji kanji yiindulula buyo busongo bwaciindi buyoyeledwe bwa-Bbaibbele. Balati tweelede kubutondezya buumba bwesu, kutali kubudyaaminina. Eeci cituyeezya bamaalumi bensiku basyomeka mbuli Jobu, Davida, a-Jeremiya, aabo balo kulila kwabo kujanika mu-Bbaibbele. Tabakwe nobakakusinkila kulimvwa kwabo pe. Aboobo, tabuli busongo pe ikulizandula kuzwa kubantu. (Tusimpi 18:1) Aino, kulila kutondezegwa munzila ziindene  mumisyobo yiindene, alimwi ciya mbuli bubede zisyomwa mukukomba kuzizilwe loko ooko. *

Ino kuti mwalimvwa kuti muyandoolila? Ikulila ncibeela cabulengwaleza bwabuntu. Amwiibaluke Jesu alimwi ciindi calufu lwa-Lazaro kuti “moyo wakwe wakalenda, . . . Jesu wakalila.” (Johane 11:33, 35) Munzila eeyi wakatondezya kuti kulila nenzila iluzi iiletwa alufu lwamuyandwa.

Sena kuumbilwa akulila ciindi lifwa muyandwa nzintu zinyinzi

Eeci cilazuminana acakacitikila mutumbu, Anne, wakafwidilidwe mwana Rachel akaambo ka-SIDS (Sudden Infant Death Syndrome). Mulumaakwe wakaamba ategwa: “Icintu cigambya ncakuti kunyina mebo naba Anne nitwakalila kudilwe. Boonse bambi bakali kulengula.” Ooko Anne wakaingula wati: “Inzya, pesi mebo kulila nkwendalikulila kulatukkwana toonse tobile. Ndabona mebo ndakazoocimvwa bwini bwini kakwiindide nsondo zili mbozibede kuzwa lyantenda, nindakazooba endike muŋanda bumwi buzuba. Ndakalila buzuba boonse. Ndasyoma eeci cakandigwasya. Ndakalimvwaanga mbubo mbubo kuzwaawo. Ndakali kweelede kuti ndikulile kuzimina kwamwanaangu. Ndasyoma loko loko kuti mweelede kubalekela kulila aabo baumbilwa. Nokuba kuti kwiingula kunyinzi nkwakuti bambi bateeti, ‘Umuna,’ incobeni eeco tacigwasyi pe.”

Mbobalutambula Bamwi

Ino bamwi bacitambula buti ciindi nobanyonganizigwa akuzimininwa muyandwa? Mucikozyanyo, amuyeeyele Juanita. Ulikuzi mbokulimvwisya kuzimininwa mwana. Ulisowede kale ziindi zyosanwe. Lino wakaliminsi alimwi. Aboobo ciindi ntenda yamootokala noyakamunjizya mucibbadela, mbuli mbomunga mwazumina wakayoowa. Nokwakainda nsondo zyobile wakanjila mukumyongwa—kiitanazyulila myezi. Mukaindiindi kakazyalwa nkaanga Vanessa—kakaindainda buyo amakilogramu aali 0.9 kulema. “Ndakabotelwa loko,” Juanita ulaibaluka. “Mpaawo limwi ndakaba mutumbu!”

Pele kukondwa kwakwe kwakali kwakaindi kasyoonto. Nokwakainda mazuba one Vanessa  wakafwa. Juanita ulaibaluka ategwa: “Ndakalimvwa kumaninwa loko. Ibutumbu bwangu ndakanyanzigwa. Ndakalimvwa kutazyulila. Cakalikucisa kupiluka kumunzi kukaanda ako nkindakamubambilide Vanessa akubona tubaki ntundakamuulilide. Myezi yobile yakatobela, ndabwiindulula mumizeezo buzuba mbwaakazyalwa. Nsikwe nindakayanda kuba acakucita amuntu woonse.”

Sena nkwiindilizya buumba oku? Inga caba cintu ciyumu kubantu bambi kumvwisya, pele aabo, mbuli Juanita, ibaindide mulincico balapandulula kuti bakamulila mwanaabo mbubona mbobanga balila kufumbwa muntu uuponede ciindi cili mbocibede. Iciindi cilamfu kataninga zyalwa mwana ulayandwa abazyali bakwe, mbobaamba. Kuli kujatana kulibedelede abanyina. Iciindi afwa mwana ooyo, banyina balimvwa kuti muntu mwini wazimina. Alimwi eeci ncobeelede kumvwisya ibambi.

Mbokunga Kwamucita Ikunyema Akulipa Mulandu

Aumbi mutumbu ulapandulula mbuli mbwaakalimvwa naakaambilwa kuti mwanaakwe mulombe wamyaka iili cisambomwi wafwa akaambo kabulwazi bwamoyo bwakuzyalwa abwalo. “Ndakainda mukulimvwa kwiindene indene—ikufweluka, kukaka kusyoma, kulipa mulandu, akunyemena mulumaangu adokotela akaambo kakutabona mbuli mbubwakasinizizye bulwazi bwakwe.”

Ikunyema kulakonzya kuba citondezyo cimbi cabuumba. Kulakonzya kuba kunyemena bamadokotela abamanesi, ikulimvwa kuti balikweelede kwiinda awo kusola kugwasya sikuzaya. Antela inga kwaba kunyemena balongwe abasimukowa balo babaanga baide kwaamba akucita zitaluzi. Bamwi balamunyemena sikwaazwa akaambo kakubucitila butaka buzumi bwakwe. Stella ulaibaluka ategwa: “Ndilaliyeeya kumunyemena mulumaangu nkaambo ndakalizi kuti nocatakasika waawa mpocakazootaana. Wakali cisidwe loko, pele wakacita muuzyamvwide kukucenjezya kwabamadokotela.” Zimwi ziindi ulanyemenwa sikwaazwa akaambo kaziminyo ziletwa alufu lwakwe kuli baabo basikucaala.

Bamwi balalipa mulandu akaambo kakunyema—nkokwaamba kuti, balalisinganya akaambo kakuti balimvwa kunyema. Bamwi balalitamikizya alufu lwamuyandwa wabo. “Naatakafwa pe,” balalizula beni, “kuti nindakafwambaana kumusinikizya kuya kuli dokotela” antela “kumusinikizya kubona umbi dokotela”  antela “kumusinikizya kububambilila buzumi bwakwe kwiinda bobuya.”

Ikuzimina kwamwana manyongwe aayoosya—ilweetelelo lwini lwini ankumbu zilakonzya kubagwasya bazyali

Kubambi kulipa mulandu kulaindilila awa, kapati kuti naa muyandwa wabo wafwa mpoona mpoona, cakutalangilwa. Balatalika kwiibaluka ziindi nobakamunyemena sikwaazwa antela nobakazwangana anguwe. Antela inga balimvwa kuti tabakwe nobakamulanga sikuzaya mbuli mbobakali kweelede.

Inzila ndamfu yakuumbilwa kwabamatumbu yilacizuminizya eeco bahaazibwene banji ncobaamba, ikuti kuzimina kwamwana kusiya mwaako utamani mubuumi bwabazyali, kapati muli banyina.

Iciindi Wasweekelwa Mukaako

Ikuzimina kwamuntu ngomukwatene limwi musyobo umbi wamanyongwe, kapati kuti naa boonse bakakkede buumi bwamilimo-limo antoomwe. Cilakonzya kwaamba mamanino aanzila yabuumi buzyulide mbobapona limwi, bwakweenda, bwamilimo, bwazikondelezyo, akugwasyanya.

Eunice ulapandulula cakacitika ciindi mulumaakwe naakafwa campoona-mpoona abulwazi bwamoyo. “Insondo yakusaanguna ndakali kufwelukide, mbuli kuti taakwe cakali kubeleka. Nsikwe nindakali kukonzya kulabila nokuba kununsya. Pele, maanu aangu akacaala  kaalekene. Akaambo kakuti ndakali limwi amulumaangu ciindi nobakali kusola kumusitikizya kubelesya CPR alimwi amisamu, teendakainda mukukaka kusyoma okuya kufwini kuba. Nokubaboobo, ndakali kulimvwide kutyompokelwa loko, mbuli kuti ndakali kweebelela mootokala uuwida kunkomwe pele kakutakwe ancendakali kukonzya kucita.”

Sena wakalila? “Aino ndakalila, ikapati nindakabala myaanda yamakaadi aalweetelo aayo ngendakatambwide. Ndakalila ali imwi aimwi. Cakandigwasya kwiinda muciindi cakaceede mubuzuba oobo. Pele kwiina cakakonzya kugwasya nindakali kubuzigwa ciindi aciindi mbuli mbundakalimvwide. Aino ndakalipengede we.”

Ninzi cakamugwasya Eunice kwiinda mubuumba bwakwe? “Kakutakwe akuziba, ndakalisalila cakutayeeya ikuti ndiyaambele abuumi bwangu,” ulaamba. “Nokubaboobo, icintu cicindicisa kwiibaluka ncakuti mulumaangu, walo wakali kubuyanda loko buumi, ulabwiindwa lino mbwatawo.”

“Mutalekeli Bambi Kumusinikizya . . .”

Ibalembi ba Leavetaking—When and How to Say Goodbye balalailila ategwa: “Mutalekeli bambi kumusinikizya mbuli mbomutilimvwe antela mbomuticite. Ibantu boonse balaumbilwa munzila ziindene. Ibambi inga bamwaambila mbobayeeya—kuti mwabwiindilizya buumba antela kuti mwabulezya. Amubalekelele akuciluba. Ikusola kulyaatikizya munkombole iibambidwe abambi naa abuleya boonse, mulalidyaaminina buyo kuti mutafwambaani kuzibila.”

Aino, bantu baindene ibuumba bwabo babweenzya munzila ziindene. Tatusoli kupa muzeezo wakuti nzila imwi ilainda ali imbi kumuntu woonse. Nokubaboobo, ipenzi lilakonzya kuba ciindi muntu muumba nakkalilila muciimo comwe, iciindi nakakilwa kubusyoma bwini bwazeezyo zicitikide. Kwaba boobo ilugwasyo ndiza luyooyandika kuzwa kubalongwe basilweetelelo. Ibbaibbele lyaamba kuti: “Muzwalani ulayandisya kuziindi zyoonse, alimwi munyina wazyalilwa mapenzi.” Aboobo mutayoowi pe kuyandaula lugwasyo, kwaambaula, akulila.—Tusimpi 17:17.

Ibuumba ninzila nyinzi yakutambula kuzimina, alimwi tacili cintu cilubide kuti buumba bwenu bwaba antangalala kubambi. Pele mibuzyo aimbi iyandika kwiingula: ‘Ino inga ndapona buti abuumba bwangu? Sena ncintu cinyinzi kulimvwa kubaamulandu akunyema? Mbubuti mbwenga ndakweendelezya kulimvwa ooku? Ninci cinga candigwasya kucikonzya kwiinda mukusweekelwa amubuumba?’ Icibeela citobela cilayiingula mibuzyo eeyi alimwi aimbi.

^ munc. 8 Mucikozyanyo, ibantu Bayoruba bana-Nigeria balaalusyomo lwabunsiyansiya mukuzyalululwa kwabuumi. Aboobo ciindi mutumbu nafwidwa mwana, kulaba buumba bupati pele kwakaindi kafwiifwi buyo. Nkaambo mbuli bwaamba kaimbo kamwi mu-Ciyoruba: “Imaanzi alike ngaatika. Inongo yalo tiipwaikede.” Mbuli bwaamba Bayoruba, eeci caamba kuti inongo iiyumwide maanzi, banyina, balakonzya kuzyala umbi mwana—ambweni kuzyalululwa kwayooyo ufwide. Bakamboni ba-Jehova tabatobeli tunsiya nsiya ooto tutalikila muzyaano zitawo zyalo zizwa amizeezo yakubeja yakutafwa kwabuumi alimwi akuzyalululwa yalo iitakwe ntalisyo mu-Bbaibbele.—Mukambausi 9:5, 10; Ezekiele 18:4, 20.