1, 2. Nkuli nkotukonzya kujana lukwabililo mazuba aano?

AMWEEZYEEZYE kuti muyaabweenda munzila noiyanda kuwa mvwula mpati yaguwo. Kujulu kwasiya mbi makumbi, mvwula yatalika kulaba akuzuma. Mpoonya yatalika kwaapoomona. Mwasola kuyandaula busena bwakuyusila. Eelo kaka mwakkomana nomwajana busena bwakuyusila ibuli kabotu alimwi buyumu!

2 Andiswe tuli mubukkale buli boobu mazuba aano. Zintu zicitika munyika ziyaabwiindila kubija. Ambweni mulibuzya kuti, ‘Nkuli nkondikonzya kujana lukwabililo?’ Sintembauzyo wamu Bbaibbele wakalemba kuti: “Ndilaambila Jehova kuti: ‘Yebo uli mayubilo amampangala aangu, Leza wangu ooyo ngondisyoma.’” (Intembauzyo 91:2) Masimpe, Jehova ulakonzya kutuvwuna kumapenzi eesu lino, alimwi utupa bulangizi butaliboteli kujatikizya ziboola kumbele.

3. Mbuti mbotukonzya kupa kuti Jehova abe mayubilo eesu?

3 Mbuti Jehova mbwakonzya kutukwabilila? Ulakonzya kutugwasya kuliyumya mumapenzi aali woonse aakonzya kutusikila, alimwi ulaanguzu zinji kapati kwiinda muntu uuli woonse uunga wayanda kutucita cibi. Nokuba kuti lino twacitikilwa cintu cimwi cibi, tulijisi lusyomo lwakuti Jehova uyakuzibambulula zintu kumbele. Bbaibbele litukulwaizya kuti: ‘Amuzumanane kukkala muluyando lwa Leza.’ (Juda 21) Tweelede kuzumanana kuba acilongwe ciyumu a Jehova kutegwa atugwasye muziindi zyamapenzi. Ino mbuti mbotukonzya kucita oobo?

AMULUTAMBULE LUYANDO LWA LEZA

4, 5. Ino mbuti Jehova mbwaatondezya kuti ulatuyanda?

4 Kutegwa tuzumanane kuba acilongwe ciyumu a Jehova,  tweelede kubona mbwatuyanda kapati walo. Amuyeeye buyo zintu zyoonse nzyaatucitila Jehova. Watupa nyika eeyi mbotu kapati akwiizuzya zintu zibotu kapati mbuli masamu, bwizu, zisyango alimwi abanyama. Alimwi watupa zyakulya zinona alimwi ameenda mabotu aakunywa. Kwiinda mu Bbaibbele, Jehova watuyiisya zina lyakwe alimwi abube bwakwe butaliboteli. Icipati kwiinda zyoonse, wakatondezya mbwatuyanda kwiinda mukutuma Mwanaakwe ngwayandisya, Jesu, kuti aboole aano aanyika kuzyikwaaba buumi bwakwe akaambo kandiswe. (Johane 3:16) Alimwi akaambo kacipaizyo eeci, tulijisi bulangizi butaliboteli bwabuumi butamani.

5 Jehova wakabikka Bwami bwa Mesiya, nkokuti mfwulumende yakujulu eeyo lino-lino iiyakumana mapenzi oonse. Bwami oobo buyoosandula nyika eeyi kuba paradaiso, oomo bantu boonse mobanookkala muluumuno alukkomano lyoonse mane kukabe kutamani. (Intembauzyo 37:29) Nzila aimbi Jehova mbwaatondezya kuti ulatuyanda nkwiinda mukutuyiisya kupona buumi bubotu kapati lino. Kunze lyaboobo, watutamba kuti katupaila kulinguwe alimwi lyoonse ulaiswiilila mipailo yesu. Masimpe Jehova watondezya luyando lwakwe kuli umwi aumwi wesu.

6. Ino ncinzi ncomweelede kucita akaambo kaluyando ndwaamutondezya Jehova?

6 Ino ncinzi ncomweelede kucita akaambo kaluyando ndwaamutondezya Jehova? Amumutondezye kuti mulamulumba akaambo kazintu zyoonse nzyaamucitila. Cilausisya kuti bantu banji mazuba aano tabalumbi pe. Oobo mbocakabede aaciindi Jesu naakali anyika. Ciindi cimwi Jesu wakaponya basicinsenda ibali kkumi, pele omwe buyo nguwakamulumba. (Luka 17:12-17) Tuyanda kuba mbuli muntu ooyo iwakalumba Jesu. Tuyanda kuti katumulumba Jehova ciindi coonse.

7. Ino Jehova tweelede kumuyanda kusika aali?

7 Kuyungizya waawo, tweelede kutondezya kuti tulamuyanda Jehova. Jesu wakaambila basikwiiya bakwe kuti beelede  kuyanda Jehova amoyo wabo woonse, abuumi bwabo boonse, alimwi amizeezo yabo yoonse. (Amubale Matayo 22:37.) Ino eeci caamba nzi?

8, 9. Mbuti mbotukonzya kumutondezya Jehova kuti tulamuyanda?

8 Sena tweelede kwaamba buyo amulomo kuti tulamuyanda Jehova? Peepe. Ikuti katumuyanda Jehova amoyo wesu woonse, abuumi bwesu boonse alimwi amizeezo yesu yoonse, tuyootondezya mbotumuyanda kwiinda muzintu nzyotucita. (Matayo 7:16-20) Cakusalazya Bbaibbele liyiisya kuti, ikuti katumuyanda Leza, nkokuti tunootobela milawo yakwe. Sena nciyumu kucita boobo? Peepe, nkaambo ‘milawo ya Jehova tiiminyi’ pe.—Amubale 1 Johane 5:3.

9 Notumumvwida Jehova, tulakkomana akukkutila mubuumi. (Isaya 48:17, 18) Pele ino ncinzi cikonzya kutugwasya kuzumanana kuba acilongwe ciyumu a Jehova? Atubone bwiinguzi mumincali iitobela.

AMUZUMANANE KUSWENA KULI JEHOVA

10. Nkaambo nzi ncomweelede kuzumanana kwiiya zinji kujatikizya Jehova?

10 Ino mbuti mbomwakaba mulongwe wa Jehova? Kwiinda mukwiiya Bbaibbele, mwamuzyiba kapati Jehova alimwi mwaba acilongwe anguwe. Cilongwe eeci cili mbuli mulilo ngomuyanda kuti uzumanane kuyaka. Mbubonya mulilo mbouyandika kusosela nkuni kutegwa uzumanane kuyaka, andinywe mweelede kuzumanana kwiiya zinji kujatikizya Jehova kutegwa cilongwe canu anguwe cizumanane kuyuma.—Tusimpi 2:1-5.

Mbubonya mulilo mbouyandika kusosela nkuni kuti utazimi, luyando ndomujisi kuli Jehova lweelede kuyumizyigwa lyoonse kuti luzumanane

11. Ino nzyomwiiya mu Bbaibbele ziyoomupa kulimvwa buti?

11 Nomuzumanana kwiiya Bbaibbele, munakwiiya twaambo tunji ituyoomunjila mumoyo. Amubone basikwiiya bamwi ba Jesu bobilo mbobakalimvwa ciindi Jesu naakabapanduluda businsimi bwamu Bbaibbele. Bakaamba kuti: “Sena myoyo yesu tiiyali kupya muzyamba zyesu ciindi  naali kwaambaula andiswe munzila, anaali kutupandulwida Magwalo?”—Luka 24:32.

12, 13. (a) Ino ncinzi cikonzya kucitika kuluyando ndotujisi kuli Leza? (b) Ino mbuti mbotukonzya kuzumanana kumuyanda Jehova?

12 Mbubonya mboyakapya myoyo yabasikwiiya ciindi nobakaamvwisya Magwalo, andinywe mweelede kuti mwakapya moyo ciindi nomwakatalika kulimvwisya Bbaibbele. Eeci cakamugwasya kuti mumuzyibe Jehova akumuyanda. Masimpe tamuyandi kuti luyando oolu lumane.—Matayo 24:12.

13 Mbokunga mwaba mulongwe wa Leza, mweelede kubeleka canguzu kuti muzumanane kuba acilongwe ciyumu anguwe. Mweelede kuzumanana kwiiya zinji kujatikizya nguwe alimwi a Jesu akukkala ansi kuyeeya nzyomwiiya alimwi ambomukonzya kuzibelesya mubuumi bwanu. (Johane 17:3) Nomubala naa kwiiya Bbaibbele, amulibuzye kuti: ‘Ino makani aaya andiyiisya nzi kujatikizya Jehova Leza?  Nkaambo nzi ncondeelede kumuyanda amoyo wangu woonse alimwi abuumi bwangu boonse?’—1 Timoteyo 4:15.

14. Ino mbuti mupailo mboutugwasya kuti tuzumanane kumuyanda kapati Jehova?

14 Ciindi nomujisi mulongwe ngomumvwana limwi kapati, mulabandika anguwe lyoonse, alimwi eeci cipa kuti cilongwe canu cizumanane kuyuma. Mbubonya buyo, ciindi notwaambaula a Jehova lyoonse mumupailo, cipa kuti tuzumanane kumuyanda kapati. (Amubale 1 Batesalonika 5:17.) Mupailo ncipego citaliboteli kuzwa kuli Taateesu wakujulu. Lyoonse tweelede kwaambaula anguwe kuzwa ansi aamoyo. (Intembauzyo 62:8) Tatweelede kupaila mipailo yakupeta naa yakuswatila buya, pele tweelede kwaamba cini cili mumoyo wesu. Inzya, ikuti twazumanana kwiiya Bbaibbele akupaila kuzwa ansi aamoyo, tulazumanana kumuyanda kapati Jehova.

KWAAMBILA BAMWI KUJATIKIZYA JEHOVA

15, 16. Ino muubona buti mulimo wakukambauka?

15 Acimbi ncotweelede kucita ikuti katuyanda kuzumanana kuba acilongwe ciyumu a Jehova, nkwaambila bamwi nzyotusyoma. Kwaambila bamwi kujatikizya Jehova ncoolwe cipati. (Luka 1:74) Alimwi ooyu mukuli Jesu ngwaakapa Banakristo bakasimpe boonse. Umwi aumwi wesu weelede kukambauka makani mabotu aa Bwami bwa Leza. Sena mwakatalika kale kucita oobo?—Matayo 24:14; 28:19, 20.

16 Mwaapostolo Paulo wakali kuubona kuti ulayandika kapati mulimo wakukambauka; wakawaamba kuti ‘ndubono.’ (2 Bakorinto 4:7) Ikwaambila bamwi kujatikizya Jehova alimwi amakanze aakwe, ngomulimo uuyandika kapati kwiinda milimo iili yoonse njomukonzya kucita. Nenzila imwi njomukonzya kumubelekela Jehova, alimwi walo ulalumba kapati akaambo kazintu nzyomumucitila. (Bahebrayo 6:10) Kunze lyaboobo, kukambauka kulakonzya kumugwasya nywebo lwanu alimwi abaabo bamuswiilila nkaambo kupa kuti nywebo alimwi abamwi mukonzye  kuswena kuli Jehova akuba aabulangizi bwabuumi butamani. (Amubale 1 Bakorinto 15:58.) Sena kuli mulimo umbi uukonzya kumukkomanisya kapati kwiinda mulimo ooyu?

17. Nkaambo nzi mulimo wakukambauka ncoubindide kapati?

17 Mulimo wakukambauka ulibindide kapati. Tweelede ‘kukambauka jwi akufwambaana kucita oobo cabusungu.’ (2 Timoteyo 4:2) Bantu beelede kumvwa makani aajatikizya Bwami bwa Leza. Bbaibbele lyaamba kuti: “Buzuba bupati bwa Jehova buli afwaafwi! Buli afwaafwi alimwi bulaboola cakufwambaana kapati!” Mamanino ‘taakoomuka pe!’ (Zefaniya 1:14; Habakuku 2:3) Inzya, lino-lino, Jehova ulainyonyoona nyika eeyi mbyaabi ya Saatani. Kacitanacitika eeci, bantu beelede kucenjezyegwa kutegwa bakonzye kusala kubelekela Jehova.

18. Nkaambo nzi ncotweelede kukomba Jehova antoomwe a Banakristoma bakasimpe?

18 Jehova uyanda kuti katumukomba antoomwe a Banakristoma bakasimpe. Bbaibbele lyaamba kuti: “Katubikkilana maano ikutegwa tukulwaizyanye kutondezya luyando akucita milimo mibotu, tutanooleki kuswaangana antoomwe, mbuli bamwi ibajisi ciyanza eeci, pele katukulwaizyanya umwi amweenzinyina, alimwi atuzumanane kucita boobo ikapati mbomubwene kuti buzuba bwaswena afwaafwi.” (Bahebrayo 10:24, 25) Tweelede kusoleka kusikila mpotugolela kujanika kumiswaangano yoonse. Miswaangano itupa coolwe cakukulwaizyanya alimwi akuyumizyanya.

19. Ncinzi cikonzya kutugwasya kubayanda Banakristoma ibakwesu abacizyi?

19 Ciindi nomujanika kumiswaangano, muyoojana balongwe babotu ibayoomugwasya kukomba Jehova. Muyoojana bakwesu abacizyi baindene-indene, ibasoleka canguzu kumukomba Jehova mbubonya mbuli ndinywe. Alimwi mbubonya mbuli ndinywe, abalo tabalondokede, aboobo balalubizya. Nobamulubizyila, amube bantu ibalibambilide kubalekelela. (Amubale Bakolose 3:13.) Lyoonse amubikkile maano kubube bubotu mbobajisi Banakristonyoko ibakwesu  abacizyi, nkaambo ikucita boobo kuyoomugwasya kubayanda alimwi akuzumanana kuyumya cilongwe canu a Jehova.

BUUMI BWINI-BWINI

20, 21. Ino “buumi bwini-bwini” ninzi?

20 Jehova uyanda kuti balongwe bakwe boonse babe abuumi bubotu kapati ibutanabwenwe mubuumi bwabo boonse. Bbaibbele lituyiisya kuti buumi mbotuyakupona kumbele bunakwiindene kapati abuumi mbotupona mazuba aano.

Jehova uyanda kuti mukapone “buumi bwini-bwini.” Sena nywebo mulayanda?

21 Kumbele, tuyakupona mane kukabe kutamani, ikutali kupona buyo myaka iili 70 naa 80 pe. Tuyakuba ‘abuumi butamani’ katulondokede, muluumuno alimwi alukkomano muparadaiso iitaliboteli. Oobo mbobuumi Bbaibbele mbolyaamba kuti “buumi bwini-bwini.” Jehova utusyomezya kutupa buumi oobu bwini-bwini, pele tweelede kucita kufwumbwa ncotukonzya kucita lino kutegwa ‘tubujatisye.’—1 Timoteyo 6:12, 19.

22. (a) Mbuti mbotukonzya ‘kubujatisya buumi bwini-bwini’? (b) Nkaambo nzi ncotutakonzyi kububelekela buumi butamani?

22 Mbuti mbotukonzya ‘kubujatisya buumi bwini-bwini’? Tweelede ‘kucita zibotu’ alimwi ‘akubeleka milimo mibotu minji.’ (1 Timoteyo 6:18) Eeci caamba kuti tweelede kuzicita nzyotwiiya mu Bbaibbele. Mubwini kujana buumi bwini-bwini takuyeeme amilimo yesu pe. Tatukonzyi kujana buumi butamani akaambo kakububelekela buya pe. Buumi butamani ncipego cizwa kuli Jehova ncabapa babelesi bakwe basyomeka, calo icitondezya ‘luzyalo lwakwe.’ (Baroma 5:15) Masimpe Taateesu wakujulu uliyandide kapati kubapa cipego eeci babelesi bakwe ibasyomeka.

23. Nkaambo nzi ncomweelede kusala kabotu lino?

23 Amulibuzye kuti, ‘Sena ndikomba Leza munzila njayanda?’ Ikuti mwabona kuti muyandika kucinca, amucite oobo ndilyonya lino. Ciindi notulanga kuli Jehova alimwi akucita kufwumbwa ncotukonzya kutegwa tumumvwide,  Jehova uyooba mayubilo eesu. Walo unoobakwabilila bantu bakwe ibasyomeka mumazuba aano aamamanino aanyika mbyaabi ya Saatani. Mpoonya Jehova uyoopa kuti tupone mu Paradaiso mane kukabe kutamani, mbubonya mbwaakasyomezya. Inzya, mulakonzya kuba abuumi bwini-bwini ikuti naa lino mwasala kabotu!