EZEKIELI 1:1

MAKANI AALI MUCIBALO: Makani mubufwaafwi aali mucilengaano ca Ezekieli cankalaki yakujulu

1-3. (a) Amupandulule Ezekieli ncaakabona akumvwa. (Amubone cifwanikiso icili kumatalikilo aacibalo.) (b) Ino ninguzu nzi izyakali kubeleka kuli ceeco icakacitikila Ezekieli, alimwi ino wakajatikizyigwa buti?

EZEKIELI wakalanga kali alaale kwaciindi cili mbocibede, kumwi kasolekesya kubona icili kunkomwe mpati yamusenga. Meso aakwe akajaluka asyoonto, mpoonya akajaluka kapati. Wakagambwa kapati kujatikizya ncaakabona. Kwakali guwo lyuungisya ilyakali kuboola. Pele tiilyakali guwo buyo pe. Ciindi guwo liyoosya nolyakaungisya kuzwa kunyika kumwi masusu aakwe azisani kazipepeluka, wakabona kkumbi lipati. Mulindilyo kwakayaka mulilo uuvwilima, mpoonya kuyaka kwamulilo kwakamuyeezya cintu cilibonya mbuli ngolida iyakavweledwe ansiliva. Ciindi kkumbi nolyakaunka cakufwambaana kuli Ezekieli, wakamvwa kuvwuuma kwalo ikwakali kuyaabukomena, kuyobeka ikwakali mbuli kwampi mpati iyakali kweenda.—Ezk. 1:4, 24.

2 Kajisi myaka iibalilwa ku 30, ciindi cakusaanguna imwaalumi ooyu iwakacili mwana-mwana wakacitikilwa zintu izitalubiki. Wakalimvwa kuti “janza lya Jehova” lyakali aalinguwe, nguzu zya Jehova zyamuuya uusalala izitakonzyi kukazyigwa. Muuya ooyo ncowakali kuyoomupa kubona akumvwa cilakkomanisya kapati, cilagambya kwiinda zintu zyakuyeeyela nzyobabikka mumafilimu  mazuba aano basikupanga mafilimu. Cilengaano ncaakabona Ezekieli cakamupa kuvwuntama ansi, kagambidwe kapati.—Ezk. 1:3, 28.

3 Nokuba boobo, Jehova wakajisi zintu zinji mumizeezo kutali buyo kupa kuti Ezekieli agambwe. Cilengaano cakusaanguna ncaakabona Ezekieli, bubwenya mbuli zilengaano zyoonse izilembedwe mubbuku lyabusinsimi, cakalijisi bupanduluzi bugwasya, kulinguwe alimwi akubabelesi ba Jehova basyomeka mazuba aano. Aboobo atubikkile maano kuzintu Ezekieli nzyaakabona akumvwa.

Bukkale Mbobwakabede

4, 5. Ino bukkale bwakali buti mucilengaano ncaakabona Ezekieli?

4 Amubale Ezekieli 1:1-3. Atusaangune kubona bukkale mbobwakabede. Mwakali mumwaka wa 613 B.C.E. Kweelana ambotwakaiya mucibalo cainda, Ezekieli wakali mu Babuloni, kakkala antoomwe abazikenyina mumunzi iwakali kumbali aamulonga wa Kebara, kulibonya kuti mato akali kukonzya kwiinda mumulonga ooyu iwakabambwa abantu kwiinda mukunyona maanzi amwi kuzwa kumulonga wa Firate mpoonya alimwi kumbele milonga eeyi yobilo yakali kuswaangana.

Ezekieli wakali kukkala antoomwe abazikenyina munsi-munsi amulonga wa Kebara (Amubone muncali 4)

5 Munzi wabazike, Jerusalemu, wakali kulamfwu, musinzo uulampa makkilomita aali 800 kuzwa ku Babuloni. * Tempele, mwalo bausyi Ezekieli mobakali kubelekela kabali bapaizi, lyakasofwaazyigwa alimwi bwakaba busena bwamituni. Cuuno cabwami mu Jerusalemu, mwalo Davida a Solomoni mobakali kulela cabulemu, wakaba munzi wamasampu. Mwami Jehoyakini uutajisi lusyomo wakali mu Babuloni antoomwe abazike. Sikulyazina wakwe acuuno cabwami, Zedekiya, wakali kweendelezyegwa amwami wa Babuloni alimwi wakali mwaalumi mubyaabi.—2Bam. 24:8-12, 17, 19.

6, 7. Ino nkaambo nzi ncokweelede kuti Ezekieli wakalimvwa kuti ukkala muziindi zikatazya kapati?

 6 Kumwaalumi uusyomeka mbuli Ezekieli, eeci cakali kulibonya kuba ciindi cikatazya kapati mubuumi bwakwe. Bazikenyina bamwi ambweni bakali kulibuzya kuti: ‘Sena Jehova watulekelezya mane kukabe kutamani? Sena Babuloni ooyu mubyaabi uujisi nguzu abaleza bakwe bakubeja banji uyoobumanizya ncobeni bukombi busalala bwa Jehova akugusya bweendelezi bwakwe anyika?’

7 Kamujisi twaambo ootu mumizeezo, sena tamukonzyi kutalika kucita ciiyo canu nobeni kujatikizya makani aaya kwiinda mukubala bupanduluzi bulimvwisya bwacilengaano cakusaanguna ncaakabona Ezekieli? (Ezk. 1:4-28) Mwanoocita boobo, amusole kulibikka mubusena bwa Ezekieli, kubona nzyaakabona alimwi akumvwa nzyaakamvwa.

Mulonga wa Firate mubusena buli afwaafwi a Karikemesi (Amubone muncali 5-7)

Nkalaki Iindene Ankalaki Zyoonse

8. Ino ncinzi ncaakabona Ezekieli mucilengaano, alimwi ino cakali kwiiminina nzi?

8 Coonse antoomwe, ino ncinzi Ezekieli ncaakabona? Cakali kulibonya mbuli nkalaki mpati iigambya, yalo iipandululwa kuti ninkalaki. Yakali kubikkilizya amavwili mapati ajisi zilenge zyakumuuya zyone zigambya, mukuya kwaciindi izyakazoozyibwa kuba bakerubi. (Ezk. 10:1) Atala aabakerubi kwakali cibumbili cipati, mbuli maanzi aangene, mpoonya atala aacibumbili eeco kwakali cuuno cabulemu ca Leza, mpaakakkede Jehova lwakwe! Aboobo ino nkalaki eeyo yakali kwiiminina nzi? Cakweelela, cilengaano ncaakabona Ezekieli cilakonzya kwiiminina cintu comwe buyo: cibeela  cakujulu cambunga ya Jehova yabulemu yabubumbo boonse. Ino nkaambo nzi ncotwaambila boobo? Atulange-lange twaambo totatwe itupa kwaamba boobo.

9. Ino mbuti cilongwe ncajisi Jehova azilenge zyakwe zyakujulu mboceendelana amboipandululwa nkalaki?

9 Cilongwe ncajisi Jehova azilenge zyakwe zyakujulu. Amubone kuti mucilengaano eeci, cuuno cabwami ca Jehova cili atala aabakerubi. Muzibeela zimwi zya Jwi lya Leza, Jehova ulapandululwa mbubwenya kuti ukkede acuuno cabwami cili atala naa akati kabakerubi. (Amubale 2 Bami 19:15; Kul. 25:22; Int. 80:1) Pele eeci tacaambi kuti ukkede ncobeni atala aabakerubi, mbuli kuti uyandika kuti kanyamunwa azilenge eezyo zyamuuya zijisi nguzu, mbubwenya mbwatayandiki kutanta munkalaki iini buya. Pele bakerubi balabugwasyilizya bweendelezi bwakwe, alimwi ulakonzya kubatuma kuli koonse mububumbo kutegwa bacite nzyayanda mubweendelezi bwakwe. Bakerubi aaba, mbubwenya mbuli bangelo ba Leza basalala boonse, balamubelekela Jehova kabali babelesi bakwe, naa batumwa. (Int. 104:4) Munzila eeyi, Jehova ulitantide atala lyabo boonse, ulabasololela kali mweendelezi wabo, cili mbuli kuti babamba nkalaki yomwe mpati iikamantene.

10. Ino ncinzi citondezya kuti nkalaki yakujulu ibikkilizya zilenge zinji kapati kwiinda abakerubi bone?

10 Nkalaki taibikkilizyi buyo bakerubi pe. Bakerubi aabo Ezekieli mbaakabona bakali bone. Mweelwe ooyo ulabelesyegwa kanji-kanji mu Bbaibbele ikutondezya kuti cintu cimwi cilizulide cakumaninina, naa kupandulula cintu cimwi icibikkilizya boonse kakunyina uusyeede. Aboobo cileelela kuti, bakerubi bone aabo  batondezya kuti boonse bana bamuuya ba Jehova ibasyomeka balibikkilizyidwe. Kuyungizya waawo, amubone kuti zingelengele alimwi buya abakerubi bazwide meso, ikutondezya kuti mbanji ibabikkilide maano cakupakamana ikutali buyo zilenge zyamuuya zyone eezyo zitondezyedwe. Kunze lyaboobo, Ezekieli mbwaakaipandulula nkalaki citondezya kuti nimpati kapati, calo cipa kuti nobaba bakerubi ibakondelezya kabalibonya kuceya. (Ezk. 1:18, 22; 10:12) Mbubwenya buyo, cibeela cakujulu cambunga ya Jehova ncipati, cibikkilizya zilenge zinji kapati kwiinda abakerubi bone aabo.

Ezekieli wakagambwa acilengaano ncaakabona cankalaki ya Jehova mpati (Amubone muncali 8-10)

11. Ino ncilengaano nzi cikozyenye ncaakabona Daniele, alimwi ino citupa kwaamba nzi?

11 Cilengaano cakujulu icikozyenye ancaakabona Daniele. Musinsimi Daniele wakapona myaka minji kali muzike mumunzi wa Babuloni, alimwi awalo wakapegwa cilengaano cakujulu. Cikkomanisya ncakuti, mucilengaano eeco acalo, cuuno cabwami ca Jehova cakalijisi mavwili. Cilengaano ncaakabona Daniele, cakabikkila kapati maano kukukomena kwamukwasyi wakumuuya wa Jehova kujulu. Daniele wakabona “cuulu cazyuulu . . . abali zyuulu zili kkumi iziyungizyidwe ziindi zili zyuulu zili kkumi” zyabana ba Leza kabaimvwi kumbele lya Jehova. Bakalikkede mbuli Nkuta yakujulu, umwi aumwi ulangilwa kuti wakali mubusena bwakwe mbwapedwe. (Dan. 7:9, 10, 13-18) Aboobo ncamaano ikwaamba kuti cilengaano ncaakabona Ezekieli ciiminina nkamu yabulemu yazilenge zyamuuya njiyona eeyi.

12. Ino nkaambo nzi ncoluli lukwabililo kulindiswe kulanga-langa zibalo mbuli cacilengaano ncaakabona Ezekieli cankalaki yakujulu?

12 Jehova ulizyi kuti ndukwabililo kulindiswe tobantu kubikkila maano kuzintu zyakumuuya mbozibede, “zintu zitalibonyi,” kweelana amwaapostolo Paulo mbwaakazyaamba. Nkaambo nzi? Akaambo kakuba zilenge zyamibili yanyama, inga tubikkila kapati maano ‘kuzintu zilibonya,’ izijatikizya buumi bwakumubili, izyakaindi kaniini buyo. (Amubale 2 Bakorinto 4:18.) Kanji-kanji Saatani ulasola kupa kuti katucita boobo alimwi ulatuyunga kutegwa tube bantu bayeeya buyo zyakumubili. Kutegwa atugwasye kukaka kuyungwa kuli boobo, caluyando Jehova watupa zibalo mbuli ceeci icili kubusinsimi bwa Ezekieli, kutupa ziyeekezyo zikkomanisya zyabupati bwamukwasyi wa Jehova wakujulu uugambya!

“Amweende Nomavwili!”

13, 14. (a) Mbuti Ezekieli mbwaakaapandulula mavwili ngaakabona? (b) Nkaambo nzi ncoceelela kuti nkalaki ya Jehova ijisi mavwili?

13 Cakusaanguna, Ezekieli wakabikkila maano kuli bakerubi bone, aboobo mu Cibalo 4 cabbuku eeli, tuyoobona zilenge eezyo alimwi anzila iigambya mboziboneka ncozituyiisya kujatikizya Jehova. Nokuba boobo, Ezekieli wakabona zingelengele zyone kumbali kwini kwabakerubi aabo, kulangilwa kuti zyakali mumasena one, mbuli cibeela cijisi mbazu zyone zyeelene kulampa. (Amubale Ezekieli 1:16-18.) Zyakali kulibonya kuti zipangidwe abbwe lyakulusolito, ibbwe liyandisi kapati eelyo zimwi ziindi ililibonya kubalangala alimwi ilyamubala wamungunga waji naa wanyanzabili uuvwelene awamungunga waji. Zintu eezyi zibotu zyakali kumweka-mweka.

 14 Cilengaano ca Ezekieli cakabikkila maano kapati kumavwili aankalaki eeyi. Kuswaanganya mavwili kucuuno cabwami ncintu cigambya, tee kai? Cuuno cabwami icijisi mavwili! Cileelela kuyeeyela cuuno cabwami kuba mubusena bomwe buyo bugaminide, mbwaanga mami aamunyika kuli mpaagolela buya kweendelezya. Pele bweendelezi bwa Jehova buliindene kapati abulelo bwabantu ibuli boonse. Mbubwenya Ezekieli mbwaakali kuyakwiiya, nguzu zyabweendelezi bwa Jehova kunyina mpozigolela. (Neh. 9:6) Mubwini, Mweendelezi ooyu ulakonzya kutondezya nguzu zyakwe kubusena buli boonse!

15. Ino ncinzi Ezekieli ncaakabona kujatikizya kukomena kwamavwili alimwi ambwaakapangidwe?

15 Ezekieli wakagambwa akukomena kwamavwili. Wakalemba kuti: “Zingelengele zyangawo zyakali zilamfwu kapati cakuti zyakali kugambya.” Tulakonzya kweezyeezya kubona Ezekieli kalungumana alimwi kulanga zingelengele zipati izimweka-mweka kazili mujulu. Alimwi wakayungizya kaambo aaka ikagambya kakuti: “Zingelengele zyangawo [mavwili] zyoonse zyone zyakazwide meso koonse-koonse.” Ambweni cintu cikkomanisya kapati azintu zyoonse, mbupange bugambya ibwamavwili. Wakapandulula kuti: “Mbwaakali kulibonya alimwi ambwaakapangidwe akali mbuli vwili lili muvwilinyina kaaingene.” Ino eeco cakali kupandulula nzi?

16, 17. (a) Ino muunzila ili buti nkalaki moyakajisi mavwili mumavwilinyina? (b) Ino mavwili ayubununa nzi kujatikizya mboyeenda nkalaki ya Jehova?

16 Cakutadooneka, vwili limwi alimwi ndyaakabona Ezekieli, mubwini akali mavwili obilo aaswaanganizyidwe, vwili lyomwe kaliingene alyeenzinyina akati eeni. Eeci cakali kukonzya kupandulula kaambo mavwili aaya ncaakali kweenda munzila mbwaakapandulula Ezekieli kuti: “Naakali kweenda, akali kukonzya kugama kumabazu aangawo oonse one kakunyina kunyona naakali kweenda.” Ino mavwili aaya atondezya nzi kujatikizya nkalaki yakujulu Ezekieli njaakabona?

17 Mavwili malamfwu kapati boobu akali kukonzya kweenda musinzo mulamfwu nociba ciindi naazinguluka buyo ciindi comwe. Mubwini, cilengaano citondezya kuti inkalaki yakali kweenda cakufwambaana mbuli kulaba kwakalabo! (Ezk. 1:14) Kuyungizya waawo, mavwili one aagambya aakali kukonzya kweenda mumabazu oonse one atondezya nzila yalo basyaabupampu mukupanga zintu njobakonzya kuyanda kutobela mukupanga mavwili aali mbuli yaaya pele tacikonzyeki pe. Nkalaki eeyi yakali kukonzya kulanga kumabazu amwi kakunyina kuyozya-yozya naa kunyona! Pele tayeendi munzila eeyi kakunyina kuzyiba nkoiya. Meso aazingulukide zingelengele apa muzeezo wakuti nkalaki eeyi ilizyizyi kabotu-kabotu zintu zyoonse ziizungulukide mumabazu oonse.

Mavwili akali mapati kapati, alimwi akali kubalika kapati (Amubone muncali 17)

18. Ino ncinzi ncotwiiya kubupati bwamavwili alimwi ameso manji ngaajisi?

18 Aboobo ino ncinzi Jehova ncaakali kuyiisya Ezekieli alimwi abantu boonse ibasyomeka kujatikizya cibeela cakujulu cambunga yakwe? Amubone twaambo ntotwalanga-langa kusikila waawa. Ileelela kulemekwa alimwi ilayoosya, kweelana ambokutondezya kumweka-mweka kwamavwili alimwi ambwaali mapati.  Ilizyi zyoonse zicitika, kweelana ambwaatondezya meso manji aali kumavwili. Meso aa Jehova kumugama alabona zintu zyoonse. (Tus. 15:3; Jer. 23:24) Kuyungizya waawo, ulijisi babelesi bakwe bangelo banji mbakonzya kutuma kucibeela cili coonse cabubumbo bwakwe, aboobo aaba balakonzya kwaalanga makani cakubikkila maano alimwi akutola makani ku Mweendelezi wabo wabubumbo boonse.—Amubale Bahebrayo 1:13, 14.

Mbwaabambidwe mavwili cakali kutondezya mbwaakali kukonzya kweenda mumabazu oonse kakunyina buyumuyumu (Amubone muncali 17 a 19)

19. Ino kubalika akweenda kwankalaki ya Jehova kumabazu oonse kutuyiisya nzi kujatikizya Jehova acibeela cambunga yakwe yakujulu?

19 Kunze lyaboobo, tujana kuti nkalaki eeyi ilabalika citaambiki alimwi ilakonzya kweenda kumabazu oonse. Amuyeeye buyo kwiindana ikuliko akati kacibeela cambunga ya Jehova yakujulu alimwi amfwulumende zyabantu, ambunga! Kanji-kanji zilabeleka kakunyina kubona izili kumbele, akwaalilwa kujana nzila zimbi akaambo kakucinca kwabukkale kusikila limwi zyanyonyooka naa kubula mulimo. Pele cuuno cabwami cankalaki ya Jehova cakulondoka citondezya kunyoneka kwa Leza walo uuli mukuyeendelezya. Mbubwenya mbolitondezya izina lyakwe, ulakonzya kuba kufwumbwa ciyandika kutegwa azuzikizye makanze aakwe. (Kul. 3:13, 14) Mucikozyanyo, mukulaba kwaliso ulakonzya kuba Sikalumamba singuzu uuvwuna bantu bakwe, pele mukaindi kasyoonto ulakonzya kucinca akuba Sikulekelela zibi uujisi luse walo uulanganya akubukulusya nobaba basizibi ibeempwa ibatyompedwe kapati mumoyo.—Int. 30:5; Is. 66:13.

20. Ino nkaambo nzi ncotweelede kwiilemeka nkalaki ya Jehova?

20 Kusika waawa, cilengaano ncaakabona Ezekieli, ambweni cilakonzya kutupa kulibuzya kuti, ‘Sena ndilatondezya bulemu ncobeni kujatikizya nkalaki ya Jehova?’ Ncotweelede kuyeeya ncakuti nkalaki ili mukweenda lino. Tatweelede kuyeeya naaceya kuti Jehova, Mwanaakwe, alimwi abangelo boonse tabaabwene mapenzi amwi aatutyompya. Tatweelede kulibilika kuti Leza wesu uyoomuka kutupa nzyotuyandika naa kuti mbunga yakwe iyakwaalilwa kucinca kweelana abuyumuyumu bupya ibuboola munyika iituzungulukide. Tweelede kuyeeya kuti mbunga ya Jehova, ilabeleka, lyoonse ileenda. Mubwini, Ezekieli wakamvwa jwi kuzwa kujulu ilyakoompolola kuti: “Amweende nomavwili!,” cakutadooneka mulawo wakuti mavwili atalike kweenda. (Ezk. 10:13) Sena tacigambyi kuzinzibala kuyeeya nzila Jehova mbwayendelezya mbunga yakwe? Nokuba boobo, ngotweelede kulemeka kapati ngu Jehova kumugama.

Ooyo Weendelezya Nkalaki

21, 22. Mbuti mbotukonzya kucipandulula icipa kuti zibeela zyankalaki kazili mubusena bwanzizyo?

21 Lino Ezekieli wakagamika meso aakwe kuzintu zyakali aatala aamavwili, ooko nkwaakabona “cintu cakali kulibonya mbuli cibumbili icakali kubalangala mbuli maanzi aangene.” (Ezk. 1:22) Aatala amitwe yabakerubi, cibumbili eeci cakaliyalidwe, kacimweka-mweka munzila iibalangala cabulemu. Nokuba boobo, aawa sikubala uuzyi mboibeleka mincini ulakonzya kuba amibuzyo minji kujatikizya nkalaki eeyi. Mucikozyanyo, ibamwi balakonzya kulibuzya kuti: ‘Ino ncinzi cijisi cibumbili eeco aawo mpocibede atala  lyamavwili? Alimwi ino mbuti mavwili aayo mbwaakonzya kubeleka alikke kakunyina maakiselo naa maekiselo aaswaanganya mavwili aaya antoomwe?’ Amuyeeye kuti nkalaki eeyi tayeendelezyegwi amilawo yeendelezya zintu, nkaambo njacikozyanyo, itondezya zintu zini-zini zyakumuuya izili kujulu. Alimwi amubone majwi aaya aayandika kubikkila maano: “Muuya iwakali kweendelezya zilenge zyuumi wakalimo amwalo mumavwili.” (Ezk. 1:20, 21) Ino muuya nzi ooyo iwakali kweendelezya bakerubi aabo alimwi amavwili?

22 Cakutadooneka, wakali muuya uusalala wa Jehova, inguzu zibeleka kapati mububumbo boonse. Inguzu eezyo zibeleka nzyezijisi nkalaki eeyi antoomwe, nzyeziipa nguzu alimwi akweendelezya zintu zyoonse kutegwa kazyeendela antoomwe munzila iilondokede. Katwaayeeyede makani aaya mumizeezo, atutobele ncaakabona Ezekieli ciindi naakagamika meso aakwe kuli yooyo weendelezya nkalaki.

Ezekieli wakeelede kujana mabala aamba zintu nzyaakabona zyalo izyakali kukatazya kapati kupandulula

23. Ino mabala nzi Ezekieli ngaakabelesya kusola kupandulula Jehova, alimwi nkaambo nzi?

23 Amubale Ezekieli 1:26-28. Mubupanduluzi bwakwe boonse bwacilengaano eeci, Ezekieli kanji-kanji wakabelesya mabala mbuli aakuti “kulibonya mbuli,” “icakali mbuli,” “icakali kulibonya mbuli,” alimwi “icakali kumweka mbuli.” Pele mutupango ootu, mabala aaya wakaabelesya ziindi zinji kapati. Kuboneka kuti wakali  kusolekesya kujana mabala aamba zintu nzyaakabona zyalo izyakali kukatazya kapati kupandulula. Wakabona “icakali kulibonya mbuli bbwe liyandisi lyasafilo, alimwi cakalikozyene acuuno cabwami.” Sena mulakonzya kweezyeezya cuuno cabwami cibezedwe kuzwa kubbwe lyomwe lipati, lyasafilo lyamubala wacikambwe uusiisya? Mpoonya aawo aacuuno iwakakkede mpawo, wakali Muntu. “Wakali kulibonya mbuli muntu.”

24, 25. (a) Ino fulicoongo uuzingulukide cuuno cabwami ca Jehova utuyeezya nzi? (b) Ino zilengaano zili boobo zyakali kubajatikizya buti zimwi ziindi bantu ibakajisi lusyomo?

24 Ooyo iwakakkede acuuno cabwami tanaakali kulibonya kapati, akaambo kakuti Jehova wakapa kuti kube mumuni uumweka wabulemu kuzwa mucibuno kuyaansi alimwi kuzwa mucibuno kuya mujulu. Tulakonzya kweezyeezya musinsimi kayanda kufwunya-fwunya alimwi akuvwumba meso aakwe kumwi kalanga mumuni umweka wabulemu. Kumamanino, Ezekieli wakabona cintu eeci cikondelezya kapati: “Koonse-koonse wakazingulukidwe mumuni uumweka mbuli kumweka kwafulicoongo uulibonya mukkumbi ibuzuba noiwa mvwula.” Sena kuli nomwakalimvwa kubotelwa kapati ciindi nomwakabona fulicoongo? Eelo kaka taciliboteli ciyeekezyo cabulemu bwa Mulengi wesu! Kuyungizya waawo, fulicoongo ooyo mujulu ulakonzya kutuyeekezya cizuminano ca Jehova caluumuno nolyakainda Zambangulwe. (Matl. 9:11-16) Nokuba kuti ulijisi nguzu kapati, Singuzuzyoonse ngu Leza waluumuno. (Heb. 13:20) Luumuno luli mumoyo wakwe alimwi ulalupa kuli baabo boonse ibakomba cakusyomeka.

Fulicoongo weebeka uuzingulukide cuuno cabwami ca Jehova utuyeezya kuti tubelekela Leza waluumuno (Amubone muncali 24)

25 Ino ncinzi cakacitika naakamana kubona bulemu oobo bwa Jehova Leza? Mboobu Ezekieli mbwaakalemba cakacitika: “Lino nindakacibona, ndakavwuntama ansi.” Akaambo kakugambwa kapati alimwi akuyoowa kwabunaleza, Ezekieli wakavwuntama ansi. Basinsimi bambi abalo mbobakalimvwa oobo nobakapegwa zilengaano kuzwa kuli Jehova; zyakabapa kulibona kuceya kapati, alimwi buya akuyoowa. (Is. 6:1-5; Dan. 10:8, 9; Ciy. 1:12-17) Nokuba boobo, mukuya kwaciindi, bantu bali boobo bakakulwaizyigwa kapati azintu Jehova nzyaakayubununa kulimbabo. Mubwini oobo mbocakaba akuli Ezekieli. Aboobo ino mbuti mbotweelede kujatikizyigwa ciindi notubala zibalo zyamu Magwalo zili boobu?

26. Ino kulangilwa kuti cilengaano ncaakabona Ezekieli cakamuyumya-yumya buti?

26 Ikuti naa Ezekieli wakapenga mumoyo akulibilika akaambo kabukkale bwabantu ba Leza mu Babuloni, kweelede kuti cilengaano eeco cakamuyumya kapati. Cilasalala kuti, tacikwe makani naa bantu ba Leza basyomeka bakali mu Jerusalemu naa mu Babuloni naa kubusena bumbi buyo. Nkalaki ya Jehova mpati kunyina noyakali kukonzya kwaalilwa kusika nkobakabede! Sena kuli nguzu zya Saatani izyakali kukonzya kukazya nguzu zya Leza walo iweendelezya mbunga yakujulu yabulemu iili boobo? (Amubale Intembauzyo 118:6.) Ezekieli alimwi wakabona kuti, nkalaki yakujulu tiiyakali kulamfwu abantu. Kayi, mavwili aanjiyo akali kuguma anyika! (Ezk. 1:19) Aboobo Jehova wakalibikkilide maano kapati kubantu bakwe basyomeka okuya mubuzike. Lyoonse Usyi wabo wakali kukonzya kubalanganya okuya caluyando!

 Mboimujatikizya Nkalaki

27. Ino cilengaano ncaakabona Ezekieli cipandulula nzi kulindiswe mazuba aano?

27 Sena cilengaano ca Ezekieli kuli ncocipandulula kulindiswe mazuba aano? Eeco tacidoonekwi! Amuyeeye kuti, Saatani uyaabuyungizya buya kulwana bukombi busalala bwa Jehova. Uyanda kutupa kusyoma kuti tuli tolikke, Taateesu wakujulu ambunga yakwe tabakonzyi kusika nkotubede. Mutalekeli bubeji buli boobu kucinca mbomuyeeya naa mbomulimvwa! (Int. 139:7-12) Mbubwenya mbuli Ezekieli, tulijisi twaambo tunji ncotweelede kugambwa. Tatukonzyi kuvwuntama ansi mbuli mbwaakacita. Nokuba boobo, sena tatweelede kukkomana akugambwa anguzu, kubalika, kweenda kumabazu oonse, kucinca, alimwi abulemu bwacibeela cakujulu cambunga ya Jehova yabubumbo boonse?

28, 29. Ino ncinzi citondezya kuti nkalaki ya Jehova yali kweenda mumwaanda wamyaka wainda?

28 Amuyeeye alimwi kuti, mbunga ya Jehova ilijisi cibeela caanyika. Masimpe, cibeela caanyika cibikkilizya bantu batalondokede. Pele amuyeeye zintu Jehova nzyaazuzikizya aano anyika! Nyika yoonse mboizulwa, Jehova wapa kuti bantu banyama bacite zintu nzyobatakali kukonzya kucita munguzu zyabo. (Joh. 14:12) Kulanga-langa buyo mubbuku lyakuti Bwami bwa Leza Bulalela! kulakonzya kutugambya kubona nkowasika mulimo wakukambauka mumwaanda wamyaka wainda. Alimwi tulakonzya kuyeeya ntaamu nzyoyabweza mbunga ya Jehova kwiinda mukuyiisya Banakristo bakasimpe, mukuzunda munkuta, alimwi mane amukubelesya kuyaambele kwasayaansi mukucita kuyanda kwa Leza!

29 Ciindi notulanga-langa zintu zyoonse izyacitwa kujatikizya kupilusya bukombi busalala mumazuba aamamanino aabweende bwazintu oobu bubyaabi, cilalibonya caantangalala kuti nkalaki ya Jehova ileenda. Eelo kaka ncoolwe cipati kuzulilwa kumbunga eeyi alimwi akubelekela Mweendelezi uuli boobo!—Int. 84:10.

Cibeela cambunga ya Jehova caanyika cili mukweenda (Amubone muncali 28 a 29)

30. Ino ncinzi ncotuyoolanga-langa mucibalo citobela?

30 Nokuba boobo, cilengaano ncaakabona Ezekieli cijisi zintu zinji zyakutuyiisya. Mucibalo citobela, tuyoobikkila kapati maano kulanga-langa “zilenge zyuumi” zyone izilibedelede naa bakerubi. Ino ncinzi ncozikonzya kutuyiisya kujatikizya Mweendelezi wesu uulemekwa Jehova Leza?

^ munc. 5 Ooyu ngowakali musinzo ikubelesya nzila iikosola, pele kuboneka kuti nzila njibakainda baange aaba yakali ndamfwu ambweni ziindi zyobilo kwiinda musinzo ooyu.