Mucaandaano 23 cabbuku lya Ezekieli, tujana lulayo lwanguzu ndobakapegwa bantu ba Leza akaambo kakutasyomeka kwabo. Munzila zinji, caandaano eeci cileendelana acaandaano 16. Mbubwenya mbuli mulumbe wakusaanguna, caandaano 23 cibelesya cikozyanyo cabuvwuule. Jerusalemu a Samariya mbabunyina, Jerusalemu waambwa kuti ngomusyoonto mpoonya Samariya ngomupati. Zyaandaano zyoonse zyobilo zitondezya mbuli musyoonto mbwaakaccilila mupati mubuvwuule pele walo wakaindilila kucita bubi alimwi akutalilemeka. Mucaandaano 23, Jehova wabapa mazina bana basimbi bobilo babunyina: Ohola ngomupati, nkokuti Samariya, imunzi mupati wabwami bwamisyobo iili kkumi bwa Israyeli; Oholiba ngomusyoonto, nkokuti Jerusalemu, imunzi mupati wa Juda. *Ezk. 23:1-4.

Zyaandaano zyobilo eezyi zileendelana amumbazu zimbi. Ambweni kweendelana kupati kuliko nkwakuti: bavwuule aaba kumatalikilo bakali bamakaintu ba Jehova mpoonya kumamanino bakamukaka. Alimwi kuli acisyomezyo cabulangizi. Caandaano 23 cipa bulangizi busyoonto buyo bwakuti zintu zyakali kuyoocinca, pele cileendelana acaandaano 16 mwalo Jehova mwaamba kuti: “Ndiyoobumana bukkale bwako busesemya abuvwuule bwako.”—Ezk. 16:16, 20, 21, 37, 38, 41, 42; 23:4, 11, 22, 23, 27, 37.

Sena Baiminina Bunakristo Bwanyika?

Kaindi, mabbuku eesu akali kwaamba kuti bana basimbi bobilo babunyina aaba, Ohola alimwi a Oholiba, mubusinsimi baiminina Bunakristo Bwanyika oobo bobilo ibwaandeene, nkokuti cikombelo ca Katolika alimwi aca Protestanti. Nokuba boobo, kupaila cakubikkila maano alimwi akuvwuntauzya kwakabusya mibuzyo imwi iiyandika kukkalila ansi kuyeeya. Sena kuli ciindi Bunakristo Bwanyika nobwakali mukaintu wa Jehova munzila iili yoonse? Sena kuli ciindi nobwakali mucizuminano anguwe? Peepe. Alimwi buya Bunakristo Bwanyika tiibwakaliko ciindi Jesu naakaba simwiimaakati mukupangana “cizuminano cipya” abana Israyeli bakumuuya; kunze lyaboobo, Bunakristo Bwanyika kunyina nobwakabede cibeela camusyobo wakumuuya ooyo iwa Banakristo bananike. (Jer. 31:31; Lk. 22:20) Bunakristo Bwanyika bwakatalika ciindi nobakamana kufwa baapostolo. Bwakatalika mumwaanda wamyaka wane, kaili mbunga mbyaabi yaluleyo iibambidwe ‘ansaku,’ nkokuti Banakristo bakubeja, ibaambidwe mubusinsimi bwa Jesu ibujatikizya wiiti alimwi ansaku.—Mt. 13:24-30.

Kwiindana kumbi kupati kuliko nkwakuti: Jehova wakapa bulangizi bwakunununa minzi iitasyomeki ya Jerusalemu alimwi a Samariya. (Ezk. 16:41, 42, 53-55) Sena Bbaibbele kuli nolipa bulangizi bukozyenye ku Bunakristo Bwanyika? Peepe! Kunyina bulangizi mbobujisi antoomwe azibeela zimbi zya Babuloni Mupati.

Aboobo Ohola a Oholiba tabaiminini Bunakristo Bwanyika mubusinsimi. Nokuba boobo, balatugwasya kumvwisya cintu cimwi ciyandika kapati: mbwalimvwa Jehova kujatikizya baabo basampaula zina lyakwe lisalala alimwi azyeelelo zyakwe zyabukombi busalala. Bunakristo Bwanyika bulijisi mulandu mupati mumakani aaya nkaambo zikombelo zyambubo zinji zilitaminina kwiiminina Leza wakasimpe. Ciindila kubija ncakuti, zikombelo eezyi zilitaminina kuti Mwana wa Jehova uuyandwa, Jesu Kristo, ngomweendelezi wanzizyo. Pele zilakukaka kulitaminina ooko kwiinda mukubikka Jesu kuba cibeela cabutatu alimwi akwiinda mukutamvwida mulawo wakwe wakuzumanana ‘kutaba banyika.’ (Joh. 15:19) Kwiinda mukuzumanana kukomba mituni alimwi akulinjizya mumazwanga aamapolitikisi, Bunakristo Bwanyika bwatondezya munzila iisalede kuti ncibeela ‘camuvwuule mupati.’ (Ciy. 17:1) Cakutadooneka, bweelede kuyoonyonyoonwa antoomwe abulelo bwanyika yoonse bwabukombi bwakubeja!

^ munc. 3 Mazina aaya alijisi bupanduluzi buyandika kapati. Lyakuti Ohola lyaamba “Tente Lyakwe [Lyakukombela],” kulibonya kuti eeci caamba ntaamu njobakabweza bana Israyeli yakulibikkila masena aakukombela muciindi cakubelesya tempele lya Jehova mu Jerusalemu. Kulubazu lumwi, lyakuti Oholiba lyaamba “Tente Lyangu [Lyakukombela] Lili Mulinguwe.” Jerusalemu wakali munzi imwakali ŋanda ya Jehova yakukombela.