EZEKIELI 47:9

MAKANI AALI MUCIBALO: Cilengaano camulonga uukunka kuzwa mutempele mbocakazuzikizyigwa kaindi, mbocizuzikizyigwa lino, alimwi ambociyoozuzikizyigwa kumbele

1, 2. Kweelana alugwalo lwa Ezekieli 47:1-12, ino ncinzi Ezekieli ncaakabona akuzyiba? (Amubone cifwanikiso icili kumatalikilo aacibalo.)

EZEKIELI alimwi wakabona cintu cimbi cigambya mutempele lyamucilengaano: Wakabona mulonga uukunka kuzwa mubusena busetekene! Amweezyeezye kuti mulimubwene katobelezya nkwaakali kuunka maanzi aayo aabalangala. (Amubale Ezekieli 47:1-12.) Maanzi aayo akali kweenda aniini-niini kuzwa kucikunguzyo catempele; mpoonya akali kuzwa mutempele munsi-munsi amulyango wakujwe. Mungelo wakamusololela Ezekieli kuzwa mutempele, kumwi kapima bulamfwu. Cakwiinduluka-induluka mungelo wakali kwaambila Ezekieli kuti ainde mumaanzi, mpoonya musinsimi ooyu wakajana kuti akali kuyaabulampa, muciindi cisyoonto buyo wakaba mulonga mulamfwu ngwaakali kukonzya kuzabuka lelikke kuti wasaya buya!

2 Ezekieli wakabona kuti mulonga wakali kukunkila mu Lwizi Lutajisi Buumi akupa kuti maanzi aamunyo abe kabotu, zilenge zyuumi zyakacikonzya kupona kufwumbwa ooko nkwaakakunkila maanzi aaya, kwakaba nswi zinji. Alimwi kunkomwe yamulonga, wakabona zisamu zinji zyamisyobo iindene-indene. Mwezi amwezi, zyakali kuzyala micelo mipya mibotu, alimwi zyakalijisi matuvwu  aakusilisya. Kubona zintu zyoonse eezyi kweelede kuti kwakapa Ezekieli kuba abulangizi aluumuno. Pele ino cibeela catempele lyamucilengaano eeci cakali kwaamba nzi kulinguwe akubaangenyina? Alimwi ino caamba nzi kulindiswe mazuba aano?

Ino Mulonga Ngwaakabona Ezekieli Mucilengaano Wakali Kwaamba nzi Kubaange?

3. Ino nkaambo nzi ba Juda bansiku ncobatakayeeya kuti mulonga wamucilengaano ca Ezekieli wakali mulonga wini buya?

3 Cakutadooneka ba Juda bansiku tiibakabona mulonga wamucilengaano kuti mulonga wini buya. Muciindi caboobo, kweelede kuti cibalo eeci camu Magwalo cakabayeezya businsimi bumwi bwakubukulusya ibwakasololelwa amuuya, bwalo ibwakalembwa ambweni kakwiindide myaanda yamyaka yobile musyule amusinsimi Joeli. (Amubale Joeli 3:18.) Ciindi ba Juda baange nobakabala majwi aa Joeli aakasololelwa amuuya, tiibakali kulangila kuti malundu eeni buya akali ‘kuyookunka waini uulweela’ naa kuti malundu akali ‘kuyookunka mukupa’; alimwi kunyina nobakali kulangila kuti “muŋanda ya Jehova muyooba” kasensa kamaanzi. Mbubwenya buyo, ba Judanyina aaba kweelede kuti abalo bakamvwisya kuti mulumbe wamusinsimi Ezekieli wamucilengaano tiiwakali kwaamba kujatikizya mulonga wini. * Aboobo, ino mulumbe nzi ngwaakali kwaamba Jehova? Magwalo alatugwasya kumvwisya ncozyaamba zibeela zimwi zyacilengaano eeci. Nokuba boobo, mumakani oonse, tulalanga-langa zisyomezyo zyaluyando zyotatwe zilimvwisya zyalo nzyotukonzya kwiiya kuzwa kuzibalo zyabusinsimi eezyi.

4. (a) Mulonga uuli mucilengaano ca Ezekieli wakali kukonzya kupa kuti ba Juda balangile zilongezyo nzi kuzwa kuli Jehova? (b) Mbuti mbolibelesyegwa bbala lyakuti “mulonga” alimwi alyakuti “maanzi” mu Bbaibbele mbokutupa lusyomo lwakuti Jehova uyoobalongezya bantu bakwe? (Amubone kabbokesi kakuti “Milonga Yazilongezyo Kuzwa Kuli Jehova.”)

4 Mulonga wazilongezyo. Mu Bbaibbele, milonga alimwi amaanzi kanji-kanji zilabelesyegwa kwaamba kukunka kwazilongezyo zya Jehova izipa buumi. Ezekieli wakabona mulonga uuli boobo kaukunka kuzwa mutempele, aboobo cilengaano cakali kukonzya kupa bantu ba Leza kulangila kuti zilongezyo zya Jehova zyakumuuya zyakali kuyookunka alimbabo kufwumbwa buyo kuti bakakatila kubukombi busalala. Ino nzilongezyo nzi eezyo? Bakali kukonzya kutalika alimwi kutambula malailile aakumuuya kuzwa kubapaizi. Alimwi ciindi zipaizyo nozyakali kunootuulwa atempele, bakali kukonzya kuba masimpe kuti milandu yabo yakali kunoomana. (Ezk. 44:15, 23; 45:17) Aboobo, bakali kukonzya kuba bantu basalala alimwi, mbuli kuti basanzyigwa amaanzi aasalala aazwa mutempele.

5. Mbuti mulonga wamucilengaano mbowakakumana kulibilika ikwakaliko ikwakuti naa lyoonse kwakali kuyooba zilongezyo zinji zyabantu boonse?

5 Sena lyoonse kunooli zilongezyo zinji zyabantu boonse? Cilengaano cilakumanizya kulibilika kuli koonse kuli boobu kwiinda mukutondezya mbwaakavwula maanzi camaleele, maanzi aakali maniini akavwula kapati mubusena bulampa makkilomita obilo buyo! (Ezk. 47:3-5) Mweelwe waba Juda ibakali munyika yakabukulusyigwa wakali kukonzya kukomena; pele, zilongezyo zya Jehova zyakali kuyoovwula kapati kutegwa bajane nzyobakali kuyandika. Mulonga wakali kutondezya kuvwula!

6. (a) Ino mulumbe wabusinsimi wakapa cisyomezyo nzi cikkomanisya? (b) Alimwi ino cilengaano cakapa kucenjezya nzi? (Amubone bupanduluzi buyungizyidwe.)

 6 Maanzi aapa buumi. Mucilengaano ca Ezekieli, mulonga wakali kukunkila ku Lwizi Lutajisi Buumi, zibeela zinji zyalwizi zyakabukulusyigwa. Amubone kuti maanzi akapa buumi kunswi zyamisyobo minji kapati zyalo izyakali kweelanisyigwa answi zyakali mu Lwizi Lupati, naa Lwizi lwa Mediterranean. Alimwi buya kwakali amulimo wakuzela nswi iwakali kucitwa mumabali aa Lwizi Lutajisi Buumi akati kamadolopo obilo alo alangilwa kuti akali sanseene. Mungelo wakaamba kuti: “Zintu zyoonse ziyoopona kufwumbwa ooko nkokaunka kalonga aaka.” Pele, sena eeci caamba kuti maanzi aakali kuzwa muŋanda ya Jehova akasika mumasena oonse aa Lwizi Lutajisi Buumi? Peepe. Mungelo wakaamba kuti mumasena aamatoolo tanaakasika maanzi aapa buumi. Masena aayo ‘akajisi buyo munyo.’ * (Ezk. 47:8-11) Aboobo businsimi bwakatondezya zisyomezyo zipa bulangizi kuti bukombi busalala bwakali kuyoobabukulusya bantu, kubapa kuti bapone buumi bukkomanisya. Pele alimwi kwakapegwa amajwi aakucenjezya: Tabali boonse bakali kuyootambula zilongezyo zya Jehova; alimwi tabali boonse bakali kuyooponesyegwa.

7. Ino zisamu zyamucilengaano izyakali mumabali aamulonga zyakabapa cisyomezyo nzi ba Juda baange?

7 Zisamu zizyala micelo iiligwa amatuvwu aakusilisya. Mbuti kujatikizya zisamu izyakali mumabali aamulonga? Zyakali kubotya cilengaano, tee kayi? Alimwi kuli ncozyakali kwaamba azyalo. Cakutadooneka kweelede kuti Ezekieli abasicisinyina bakakkomana kuyeeya kujatikizya micelo mibotu zisamu eezyi njozyakali kuyoozyala, mwezi amwezi micelo mipya! Cilengaano alimwi cakabapa lusyomo lwakuti Jehova wakali kuyoobasanina kumuuya. Sena kuli acimbi? Amubone kuti matuvwu aazisamu eezyi ‘akali kuyooba aakusilisya.’ (Ezk. 47:12) Kwiinda zyoonse, Jehova wakalizyi kuti baange ibakali kuyoopiluka bakali kuyooyandika kuponesyegwa kumuuya, alimwi wakasyomezya kucita mbubwenya oobo. Mbwaakacita oobo kwakabandikwa mubusinsimi bwakubukulusya bumwi, kweelana ambotwakabona mu Cibalo 9 cabbuku eeli.

8. Ncinzi citondezya kuti cilengaano ca Ezekieli cakali kuyoozuzikizyigwa cakumaninina?

8 Nokuba boobo, kweelana ambotwakabandika mu Cibalo 9, kwakazuzikizyigwa buyo businsimi busyoonto kubaange ibakapiluka. Bantu kubagama mbebakapa kuti kuzuzikizyigwe buyo businsimi busyoonto kulimbabo. Ino mbuti Jehova mbwaakali kukonzya kubalongezya cakumaninina kumwi kabajokela kumicito yabo mibyaabi yakaindi, kutamvwida alimwi akuubya-ubya bukombi busalala nkobakali kucita cakwiinduluka-induluka? Aabo ibakali kusyomeka cakabacisa alimwi bakatyompwa akaambo kabukkale bubyaabi bwaba Judanyina. Nokuba boobo, bakombi ba Jehova basyomeka bakalizyi kuti ulazuzikizya zisyomezyo zyakwe lyoonse. (Amubale Joshua 23:14.) Aboobo, bumwi buzuba cilengaano ca Ezekieli cakali kuyoozuzikizyigwa cakumaninina. Pele lili?

Mulonga Ulakunka Mazuba Aano!

9. Ndilili cilengaano ca Ezekieli catempele nocili mukuzuzikizyigwa cakumaninina?

9 Kweelana ambotwakabona mu Cibalo 14 cabbuku eeli, cilengaano ca Ezekieli catempele cili mukuzuzikizyigwa kapati  ‘kumamanino aamazuba aano,’ ciindi bukombi busalala nobuli mukusumpulwa kwiinda lyoonse. (Is. 2:2) Muubuti cibeela eeci cacilengaano ca Ezekieli mocili mukuzuzikizyigwa mazuba aano?

10, 11. (a) Nzilongezyo nzi zikunka mbuli mulonga mazuba aano? (b) Ino mbuti kukunka kwazilongezyo zizwa kuli Jehova mbokwayungizyika kutegwa nzyobayandika bantu zizuzikizyigwe mumazuba aamamanino?

10 Mulonga wazilongezyo. Ino maanzi aakunka kuzwa muŋanda ya Jehova atuyeezya zilongezyo nzi mazuba aano? Cakutadooneka, atuyeezya zintu zinji izitugwasya kumuuya nzyatupa Jehova. Kwiinda zyoonse ninguzu zyakusalazya zyacituuzyo cacinunuzyo ca Kristo, calo icipa kuti kacikonzyeka kulekelelwa zibi zyesu. Kasimpe kali mu Jwi lya Leza akalo kakozyanisyigwa kumaanzi aapa buumi, alimwi akumaanzi aakusalazya. (Ef. 5:25-27) Ino mbuti zilongezyo zili boobu mbozikunka mazuba aano?

11 Mu 1919 kwakali buyo mweelwe musyoonto wababelesi ba Jehova, alimwi bakali kukkomana kutambula zyakulya zyakumuuya nzyobakali kuyandika. Mumyaka yakatobela, bakali kuyaabuyungizyika. Mazuba aano, bantu ba Leza balainda ku 8 miliyoni. Sena kukunka kwamaanzi aasalala aakasimpe kwazumanana? Inzya! Tulayiisyigwa zintu zinji kuzwa mu Bbaibbele. Mabbiliyoni aama Bbaibbele, mabbuku, mamagazini, mabroshuwa, alimwi amatulakiti zyakakunka kubantu ba Leza mumwaanda wamyaka wainda. Mbubwenya mbuli mulonga wamucilengaano ngwaakabona Ezekieli, kukunka kwakasimpe kwakomena cakufwambaana kutegwa bantu aabo boonse ibayanda bamuzyibe Leza nyika yoonse. Mabbuku aamba zyamu Bbaibbele alikupulintwa kuzwa kaindi. Alimwi lino, mabbuku aaya alajanika awebbusaiti ya jw.org mumyaambo iinda ku 900! Ino kukunka kwamaanzi kuli boobu kwabajatikizya buti babombe moyo?

12. (a) Ino mbuti mulumbe wakasimpe kamu Bbaibbele mbowabagwasya bantu? (b) Nkucenjezya kuli buti ikwapegwa aciindi ceelede nkocitondezya cilengaano kulindiswe mazuba aano? (Amubone abupanduluzi buyungizyidwe.)

12 Maanzi aapa buumi. Ezekieli wakaambilwa kuti: “Zintu zyoonse ziyoopona kufwumbwa ooko nkokaunka kalonga aaka.” Amuyeeye buyo kujatikizya mulumbe wakasimpe mbowakunka kuli baabo boonse ibaboola mucisi cesu cakumuuya cibukulusyidwe. Kasimpe kamu Bbaibbele kabasika amoyo bantu banji alimwi kabagwasya kuyumya lusyomo lwabo muli Jehova. Nokuba boobo, cilengaano alimwi cilapa kucenjezya aciindi ceelede: Tabali boonse ibakatambula kasimpe aaka. Mbubwenya mbuli masena aajisi matinti alimwi amatoolo aali mu Lwizi Lutajisi Buumi mucilengaano ca Ezekieli, kuli bantu ibakaka kukatambula alimwi akupona kweelana akasimpe. * Eeci taceelede kucitika kulindiswe!—Amubale Deuteronomo 10:16-18.

13. Ino nziiyo nzi nzyotukonzya kwiiya kuzisamu zyamu cilengaano?

13 Zisamu zizyala micelo iiligwa amatuvwu aakusilisya. Sena mazuba aano kuli ziiyo zikulwaizya nzyotukonzya kujana kuzisamu zyamucilengaano izili mumabali aamulonga? Inzya! Amuyeeye kuti, zisamu eezyo zyakali kuzyala micelo mibotu mipya mwezi amwezi, alimwi matuvwu aanzizyo akali kubelesyegwa kusilisya. (Ezk. 47:12) Aboobo zituyeezya kuti tubelekela Leza uutwaabila zyakulya alimwi uutusilika munzila iiyandika kapati, nkokuti kumuuya. Mazuba aano bantu banji tabakamvwisyi kasimpe kamu Bbaibbele.  Mukwiimpana, amuyeeye buyo Jehova nzyapa. Sena kuli nomwakabala cibalo cimwi mumamagazini eesu, kwiimba lwiimbo lwamamanino kumuswaangano wabbazu naa wacooko, kweebelela vidiyo naa pulogilamu ya jw broadcasting mpoonya kumamanino mwakalimvwa kulongezyegwa akaambo kakuba acakulya cakumuuya cili boobu? Masimpe tulasaninwa kabotu. (Is. 65:13, 14) Sena kumvwisya kasimpe kamu Bbaibbele kulatugwasya kupona munzila iigwasya alimwi iikkomanisya Jehova? Lulayo lubotu kapati ndotutambula kuzwa mu Jwi lya Leza, lulatugwasya kutantamuka micito mibi mbuli kutalilemeka, bulyato, alimwi akubula lusyomo. Alimwi Jehova wabikka bubambe bwakugwasya Banakristo kulwana kuciswa kwakumuuya ikuboola akaambo kazibi zipati. (Amubale Jakobo 5:14.) Masimpe tulilelekedwe, kweelana ambokutondezyedwe mucilengaano ca Ezekieli cazisamu.

14, 15. (a) Nziiyo nzi nzyotweelede kwiiya kumasena aamatoolo aatakapona mucilengaano ca Ezekieli? (b) Ino mbuti mulonga wamucilengaano ca Ezekieli mboutugwasya mazuba aano?

14 Kunze lyaboobo, tulakonzya kwiiya ciiyo cimwi kumasena aamatoolo aayo aatakapona amaanzi. Tatweelede kukaka zilongezyo zya Jehova kukunka mubuumi bwesu. Ilakonzya kuba ntenda mpati kutapona, mbuli bantu banji ibali munyika eeyi iiciswa. (Mt. 13:15) Muciindi caboobo, tulakkomana kugwasyigwa amulonga wazilongezyo. Ciindi notuba aluyandisisyo lwakunywa maanzi aakasimpe kazwa mu Jwi lya Leza, ciindi notubaambila bamwi kasimpe kali boobu kwiinda mukukambauka, ciindi notutambula busolozi bwaluyando, luumbulizyo, alimwi alugwasyo kuzwa kubaalu ibakayiisyigwa amuzike uusyomeka, tulakonzya kuyeeya kujatikizya mulonga wamucilengaano ca Ezekieli. Mulonga ooyu upa buumi akuponya kufwumbwa nkouya.

15 Pele ino mbuti kujatikizya kuzuzikizyigwa kwakumbele kwacilengaano camulonga eeci? Mbubwenya mbotulaabone, mulonga uyookunka cakumaninina mu Paradaiso iiboola.

Ncociyakwaamba Cilengaano mu Paradaiso

16, 17. (a) Muubuti maanzi aabuumi mwaayoovwula kapati mu Paradaiso? (b) Ino mbuti mbotuyoogwasyigwa amulonga wazilongezyo mu Paradaiso?

16 Sena kuli nomweezyeezya kuti muli mu Paradaiso, kamuzingulukidwe abalongwe alimwi abanamukwasyi, kamukkomene abuumi bukkomanisya kapati? Kulanga-langa cilengaano ca Ezekieli kulakonzya kupa kuti kweezyeezya ooko kakukkomanisya kapati. Mubuti? Amubone alimwi zibeela zyotatwe zyacilengaano eeci, zilimvwisya alimwi izitondezya luyando.

17 Mulonga wazilongezyo. Mulonga wacikozyanyo, munzila iimwi, uyooleta zilongezyo zinji kapati mu Paradaiso, nkaambo zilongezyo eezyo tazinoogwasyi buyo kumuuya pele akumubili. Mu Myaka Iili Cuulu ya Bulelo bwa Jesu, Bwami bwa Leza buyoopa kuti aabo basyomeka bakagwasyigwe kapati acinunuzyo. Asyoonto-syoonto, banooyaabulondoka! Takukabi limbi malwazi, bamadokota, bamanesi, azibbadela! Maanzi aabuumi aayo ayookunka kumamiliyoni aabantu ibayoofwutuka lya Amagedoni, nkokuti “nkamu mpati yabantu” iiyoozwa “mumapenzi mapati.” (Ciy. 7: 9, 14) Nokuba kuti kukunka kwazilongezyo kwakusaanguna ooko kunookkomanisya kapati, kunooli kusyoonto kapati kweezyanisyigwa azilongezyo zimbi ziyooccilila. Mbubwenya mbuli mucilengaano ca Ezekieli, mulonga uyookomena kutegwa bakajane ziyandika zyoonse.

Mu Paradaiso, mulonga wazilongezyo uyoopa kuti bantu boonse bakabe bana-bana alimwi ibajisi buumi buli kabotu (Amubone muncali 17)

18. Ino mbuti “mulonga wamaanzi aabuumi” mbouyooba mupati mu Myaka iili Cuulu?

18 Maanzi aapa buumi. Mu Myaka Iili Cuulu, “mulonga wamaanzi aabuumi” uyooba mupati. (Ciy. 22:1) Mamiliyoni, naa mabbiliyoni aabantu bayoobusyigwa, bayoopegwa coolwe cakupona mu Paradaiso mane kukabe kutamani! Zilongezyo zya Jehova kwiinda mu Bwami ziyoobikkilizya akupa buumi kubantu banji ibakafwa, aabo ibakali mubulongo kwaciindi cilamfwu. (Is. 26:19) Pele, sena aabo boonse ibayoobusyigwa bayoozumanana kupona mane kukabe kutamani?

19. (a) Ncinzi citondezya kuti kuyooba maanzi aakasimpe mapya mu Paradaiso? (b) Muunzila nzi bamwi kumbele ‘mbobanoojisi buyo munyo’?

19 Umwi aumwi weelede kusala. Kayi, mabbuku mapya aakuvwunga ayoojalulwa aciindi eeco. Aboobo maanzi mabotu aazwa kuli Jehova ayoobikkilizya akasimpe kayubunudwe kapya, malailile aakumuuya mapya. Sena tacikkomanisyi kuyeeya kujatikizya bulangizi oobu? Nokuba boobo, bamwi bayakukaka kwaatobela malailile mapya aaya akusala kutamumvwida Jehova. Bantu bamwi balalangilwa kuyoozanga mu Myaka iili Cuulu, pele  tabakazumizyigwi kunyonganya Paradaiso. (Is. 65:20) Tulakonzya kuyeeya kujatikizya cilengaano ca Ezekieli alimwi akuyeeya masena aamatoolo aatakapona, ‘aakajisi buyo munyo.’ Eelo kaka mbafwubafwuba aabo ibakaka acaali kunywa maanzi aabuumi aayandika kapati! Yaakwiinda Myaka iili Cuulu, nkamu yabazangi iyoomusangana Saatani. Boonse aabo ibakaka bweendelezi bwa Jehova bululeme bayoonyonyoonwa: nkokuti kufwidilila.—Ciy. 20:7-12.

20. Mbubambe nzi ibuyootugwasya mu Myaka Iili Cuulu ibutuyeezya zisamu nzyaakabona Ezekieli?

20 Zisamu zizyala micelo iiligwa amatuvwu aakusilisya. Jehova tayandi kuti umwi wesu akasweekelwe buumi butamani. Kutegwa atugwasye kukakatila kucoolwe cibotu kapati ncapa, uyoobona masimpe kuti kuli bubambe mbuli bwazisamu nzyaakabona Ezekieli. Nokuba boobo, mu Paradaiso zilongezyo zizwa kuli Jehova zinooliko kumubili alimwi akumuuya. Kujulu, Jesu Kristo antoomwe abalelinyina ibali 144,000 bayakweendelezya kabali bami kwa Myaka Iili Cuulu. Kabali bapaizi, iba 144,000 bayoopa kuti zilongezyo zyacipaizyo cacinunuzyo ca Kristo, zigwasye bantu basyomeka kulondoka. (Ciy. 20:6) Cilengaano ca Ezekieli cazisamu izyakali kuzyala micelo mibotu alimwi izyakajisi matuvwu aakusilisya cileendelana acibalo cimwi cabusinsimi cibotu ncaakalemba mwaapostolo Johane. (Amubale Ciyubunuzyo 22:1, 2.) Matuvwu aazisamu ngaakabona Johane “akali aakuponya masi.” Mamiliyoni aabantu basyomeka ayoogwasyigwa amilimo yabapaizi ibali 144,000.

21. Ino kuyeeya mulonga wamucilengaano ca Ezekieli kumujatikizya buti, alimwi ino ncinzi ncotuyoolanga-langa? (Amubone kabbokesi kakuti “Maanzi Aakunka Aniini-niini Waba Mulonga Mupati!”)

21 Ciindi nomuyeeya kujatikizya mulonga wamucilengaano ca Ezekieli, sena tamukkomani alimwi akuba abulangizi? Eelo kaka cilakkomanisya eeco ncotulangila kumbele! Alimwi amuciyeeyele buyo, kwamyaka minji yainda, Jehova wakatupa businsimi bunji ibutugwasya kweezyeezya mboinoobede Paradaiso. Sena munooliko? Mulakonzya kudooneka naa munoojisi busena mu Paradaiso. Lino atulange-lange zibalo zyamamanino zyabusinsimi bwa Ezekieli mbozitupa bulangizi.

^ munc. 3 Kuyungizya waawo, ba Juda aabo ibakayeeyede kujatikizya mbowakabede munzi wabo kweelede kuti bakazyiba kuti mulonga tiiwakali kukonzya kukunka kuzwa mu Jerusalemu kuya ku Lwizi Lutajisi Buumi, nkaambo eeci cakali kuyandika kwiinda mutulundu-lundu mumasena aamwi.

^ munc. 6 Bantu bamwi baamba kuti eeci cakacitika ncibotu, baamba kuti kugusya munyo wakubelesya kuzwa ku Lwizi Lutajisi Buumi ncintu cali kuleta mpindu kuzwa kaindi. Nokuba boobo, amubone kuti cibalo caamba kuti maanzi aali mumatoolo ‘tanaakali kuyooba kabotu pe.’ Tanaakaba abuumi, tanaakaba kabotu, akaambo kakuti maanzi aapa buumi aazwa muŋanda ya Jehova kunyina naakasika kulingawo. Aboobo kulibonya kuti, mucibalo eeci, munyo uuli mumasena aaya waambwa munzila iitali kabotu.—Int. 107:33, 34; Jer. 17:6.

^ munc. 12 Munzila iikozyenye, atulange cikozyanyo ca Jesu calunsabwe. Inswi zinji zilajaigwa, pele tazili zyoonse izili ‘kabotu.’ Eezyo zitali kabotu zyeelede kusoogwa. Aboobo Jesu wakacenjezya kuti bantu banji ibaboola kumbunga ya Jehova mukuya kwaciindi, balakonzya kutalika kutasyomeka.—Mt. 13:47-50; 2Tim. 2:20, 21.