EZEKIELI 34:23

MAKANI AALI MUCIBALO: Businsimi bone bwaamba Mesiya akuzuzikizyigwa kwambubo muli Kristo

1-3. Nkaambo nzi Ezekieli ncaakawuside mumoyo, alimwi ino ncinzi ncaakasololelwa kuti alembe lino?

MWAKALI mumwaka wacisambomwe kali mubuzike Ezekieli. * Musinsimi wakaluuside kapati mumoyo wakwe akaambo kambuli Juda, munzi wakwe ngwaakali kuyandisya, mbowakali kweendelezyegwa. Kwakalela bami banji muciindi ncaakali kupona Ezekieli.

2 Ezekieli wakazyalwa ciindi bwami bwa Mwami uusyomeka Josiya nobwakali akati-kati. Kweelede kuti Ezekieli wakakkomana kapati ciindi naakamvwa kujatikizya mulimo ngwaakacita Josiya wakunyonyoona zikozyanyo zibezedwe alimwi akubukulusya bukombi busalala mu Juda. (2Mak. 34:1-8) Pele kusolekesya kwa Josiya tiikwakapa kuti kucinca kwazintu kuzumanane, nkaambo bami banji ibakamutobela bakazumanana kukomba mituni. Tacigambyi kuti ciindi bami babi aaba nobakali kweendelezya, cisi cakaindila kutalilemeka alimwi cakasweekelwa cilongwe ncocakajisi a Jehova. Sena bulangizi boonse bwakamana? Peepe!

3 Jehova wakasololela musinsimi wakwe uusyomeka kulemba businsimi, nkokuti bwakusaanguna kubusinsimi bunji, ibujatikizya Mesiya, Mweendelezi wakumbele alimwi Mweembezi walo uyoobubukulusya cakumaninina bukombi busalala akuzilanganya kabotu  mbelele zya Jehova. Tweelede kubulanga-langa businsimi oobu kabotu-kabotu, nkaambo kuzuzikizyigwa kwambubo kulabujatikizya buumi bwesu butamani bwakumbele. Aboobo, atubulange-lange businsimi bone bwaamba Mesiya ibujanika mubbuku lya Ezekieli.

“Kasyuukila Kateteete” Kaba “Cisamu Cakkedari Cipati Kapati”

4. Mbusinsimi nzi Ezekieli mbwaakaamba, alimwi ino mbuti Jehova mbwaakaatalika makani aabusinsimi oobo?

4 Mumwaka wakuma 612 B.C.E., “ijwi lya Jehova” lyakamusikila Ezekieli, aboobo wakaamba businsimi ibwakapandulula mbobuli bupati bulelo bwa Mesiya alimwi ambociyandika kusyoma Bwami bwakwe. Jehova wakaatalika makani aabusinsimi oobu kwiinda mukulailila Ezekieli kwaambila baangenyina kalabi kabusinsimi ikakatondezya ikubula lusyomo kwabeendelezi bamu Juda alimwi akukankaizya mbwaakali kuyandika Mweendelezi Mesiya uululeme.—Ezk. 17:1, 2.

5. Ino kalabi kaamba buti?

5 Amubale Ezekieli 17:3-10. Mboobu kalabi mbokaamba: “Sikwaze imupati” wakatyola kasyuukila kali atala kwiinda tusyuukila toonse twacisamu cakkedari akukaleta “mumunzi wabasimakwebo.” Mpoonya sikwaze wakabweza “mbuto imwi yamucisi” akwiisyanga mumuunda uujisi bulongo bubotu “kumbali amaanzi manji.” Mbuto yakamena, akukomena kuba ‘musaansa uuyandalala.’ Kuzwa waawo, kwakaboola ‘sikwaze mupati’ wabili. Miyanda yamusaansa yakayandalala ‘cakuyandisisya kuli’ sikwaze wabili, kutegwa itolwe anguwe kuti ikasyangwe kubusena bumbi bujisi maanzi manji. Jehova waupa mulandu musaansa akaambo kamicito yanguwo, icaamba kuti miyanda yanguwo ilazyulwa alimwi akuti ‘ilayumina limwi.’

Sikwaze mupati wakusaanguna wakali kwiiminina Nebukadinezara Mwami wa Babuloni (Amubone muncali 6)

6. Amupandulule ncokaamba kalabi.

6 Ino kalabi kakali kwaamba nzi? (Amubale Ezekieli 17:11-15.) Mu 617 B.C.E., Mwami Nebukadinezara wa Babuloni (“sikwaze mupati” wakusaanguna) wakasaala Jerusalemu. Wakagusya Jehoyakini Mwami wa Juda (“kasyuukila kali atala kwiinda tusyuukila toonse”) acuuno cakwe cabwami akumuleta ku Babuloni (“munzi wabasimakwebo”). Nebukadinezara wakabikka Zedekiya (umwi ‘wambuto imwi yamucisi’ wamuluzubo lwabami) acuuno cabwami mu Jerusalemu. Mwami mupya wa Juda wakaambilwa kuti akonke muzina lya Leza, akuzumina kuti unakuli mwami uusyomeka weendelezyegwa buya. (2Mak. 36:13) Pele Zedekiya wakacinyonganya cikonke cakwe; wakamuzangila Babuloni akulomba lugwasyo lwabasikalumamba kuli Farao muna Egepita (“sikwaze mupati” wabili), pele tiicakagwasya. Jehova tanaakaikkomanina micito yakutasyomeka yasikutyola cikonke ooyu, Zedekiya. (Ezk. 17:16-21) Kumamanino, Zedekiya wakagusyigwa acuuno cabwami, mpoonya wakafwa muntolongo mu Babuloni.—Jer. 52:6-11.

7. Ino nziiyo nzi nzyotukonzya kwiiya kukalabi kabusinsimi?

7 Ino nziiyo nzi nzyotukonzya kwiiya kukalabi kabusinsimi? Cakusaanguna, mbotuli bakombi basalala tweelede kusyomeka kumajwi ngotwaamba. Jesu wakati: “Kwaamba kwanu kuti ‘Inzya’ akube inzya, akuti ‘Peepe’ akube peepe.” (Mt. 5:37) Ikuti naa kwayandika  kuti tukonke kuli Leza kuti tulaamba masimpe, mbuli ciindi notupa bumboni munkuta, cikonke eeco tweelede kucibona kuti makani mapati. Cabili, tweelede kucenjela kapati kujatikizya baabo mbotusyoma. Ibbaibbele litucenjezya kuti: “Mutasyomi bami pe naba mwanaamuntu uutakonzyi kuleta lufwutuko.”—Int. 146:3.

8-10. Ino Jehova wakasinsima nzi kujatikizya Mwami wabu Mesiya wakumbele, alimwi ino mbuti businsimi mbobuzuzikizyigwa? (Alimwi amubone kabbokesi kakuti “Businsimi Bwaamba Mesiya—Cisamu Cakkedari Cipati Kapati.”)

8 Nokuba boobo, kuli mweendelezi iweelela ngotweelede kusyoma cakumaninina. Naakamana kwaamba kalabi kabusinsimi kujatikizya kusimpwa kwakasyuukila, Jehova wakabelesya cikozyanyo cakweema ncomunya kupandulula Mweendelezi wakumbele Mesiya.

9 Businsimi ncobwaamba. (Amubale Ezekieli 17:22-24.) Lino tabali basikwaze bapati pele ngu Jehova lwakwe kumugama uuyoobweza ntaamu. Uyootyola kasyuukila kateteete “kuzwa atala aacisamu cilamfwu cakkedari akukasimpa . . . atala aacilundu cilamfwu.” Kasyuukila aaka kayookomena, akuba “cisamu cakkedari cipati kapati” kupa mwakukkala “bayuni bamisyobo yoonse.” Mpoonya “zisamu zyoonse zyamusyokwe” ziyoozyiba kuti ngu Jehova lwakwe mwini iwapa kuti cisamu eeci cipati kapati cikomene.

10 Mbobuzuzikizyigwa businsimi. Jehova wakabweza Mwanaakwe, Jesu Kristo, kuzwa mumulongo wabwami wa Davida (“cisamu cilamfwu cakkedari”) akumubikka aa Cilundu cakujulu ca Ziyoni (“atala aacilundu cilamfwu alimwi cipati”). (Int. 2:6; Jer. 23:5; Ciy. 14:1) Aboobo nokuba kuti Mwanaakwe wakali kubonwa kuti “muntu muniini kapati” kuli basinkondonyina, Jehova wakamusumpula kwiinda mukumupa “cuuno cabwami ca Davida usyi.” (Dan. 4:17; Lk. 1:32, 33) Mbubwenya mbuli cisamu cakkedari cipati kapati, Mwami wabu Mesiya, Jesu Kristo, uyoolela nyika yoonse kali kujulu akuba kasensa kazilongezyo kubalelwa bakwe boonse. Masimpe, aano anyika, ngo Mweendelezi ngotweelede kusyoma. Mubulelo bwa Bwami bwa Jesu, bantu ibamvwida nyika yoonse ‘bayookkala kabaliibide alimwi tabakanyongani akaambo kakuyoowa mapenzi.’—Tus. 1:33.

11. Ino nciiyo nzi iciyandika kapati ncotwiiya kubusinsimi bujatikizya “kasyuukila kateteete” ikaba “cisamu cakkedari cipati kapati”?

11 Ncotukonzya kwiiya kubusinsimi. Businsimi oobu bukondelezya ibujatikizya “kasyuukila kateteete” ikaba “cisamu cakkedari cipati kapati” butupa kuti tucikonzye kwiingula mubuzyo ooyu uuyandika kapati: Ino nguni ngotuyoosyoma? Tacili camaano kusyoma mfwulumende zyabantu alimwi abasikalumamba basinguzu mbobajisi. Ikutegwa tujane kuliiba kwini-kwini, ncabusongo kumusyoma cakumaninina Mwami wabu Mesiya, Jesu Kristo. Mfwulumende yakujulu iili mumaanza aakwe mbobulangizi bulikke mbobajisi bantu.—Ciy. 11:15.

“Ooyo Uuzumizyidwe Amulawo”

12. Ino mbuti Jehova mbwaakacisalazya kuti tanaakacilekede cizuminano cakwe a Davida?

12 Kweelana abupanduluzi bwa Leza ibwaamba kalabi kabusinsimi kujatikizya basikwaze bobilo, Ezekieli wakamvwisya kuti Zedekiya, mwami uutasyomeki mumulongo wabwami wa Davida, wakali kuyoogusyigwa acuuno cabwami akutolwa mubuzike ku Babuloni.  Ambweni musinsimi wakalibuzya kuti, ‘Ino mbuti kujatikizya cizuminano ca Leza a Davida, calo cakasyomezya kuti mwami kuzwa mulunyungu lwa Davida wakali kuyoolela kukabe kutamani?’ (2Sam. 7:12, 16) Ikuti naa Ezekieli wakali kuzinzibala kuyeeya kujatikizya mubuzyo ooyo, nkokuti tanaakeelede kulindila bwiinguzi kwaciindi cilamfwu. Kuma 611 B.C.E., mumwaka waciloba wabuzike, ciindi Zedekiya naakacili kulela mu Juda, ‘ijwi lya Jehova lyakamusikila’ Ezekieli. (Ezk. 20:2) Jehova wakamupa kuti aambe businsimi bumbi ibwaamba Mesiya, bwalo ibwakacisalazya kuti Leza tanaakacilekede cizuminano cakwe a Davida. Mukwiimpana, businsimi bwakatondezya kuti Mweendelezi wakumbele wabu Mesiya wakali kuyooba uuzumizyidwe amulawo kuba simulyazina wa Davida.

13, 14. Bwaamba nzi businsimi bulembedwe kuli Ezekieli 21:25-27, alimwi ino mbuti businsimi mbobuzuzikizyigwa?

13 Businsimi ncobwaamba. (Amubale Ezekieli 21:25-27.) Cakutainda mumbali, Jehova kwiinda muli Ezekieli wakaambila “silutwe mubi wa Israyeli,” walo ciindi cakwe cakuti apegwe cisubulo icakasikide. Jehova wakaambila mweendelezi mubi ooyu kuti “citambala” cakwe alimwi ‘amusini’ (zitondezyo zyanguzu zyabwami) zyakali kuyoobwezyegwa kulinguwe. Mpoonya, beendelezi ibakali  ‘aansi’ bakali kuyoosumpulwa, alimwi aabo ibakali “atala” bakali kuyoofwiinsyigwa. Beendelezi ibakasumpulwa bakazumanana kweendelezya, kusikila mane “akasike ooyo uuzumizyidwe amulawo,” mpoonya Jehova wakamupa Bwami ooyo.

14 Mbobuzuzikizyigwa businsimi. Mu 607 B.C.E., naakanyonyoonwa Jerusalemu, bwami ‘bwaatala’ bwa Juda ibwakali mu Jerusalemu bwakafwiinsyigwa ciindi bana Babuloni nobakaunyonyoona munzi ooyu, akugusya Mwami Zedekiya acuuno cabwami, akumutola mubuzike. Mpoonya, kakunyina mwami wamumulongo wa Davida iwakali kulela mu Jerusalemu, beendelezi bakali ‘aansi’ bakasumpulwa, bakatalika kweendelezya nyika, pele kwaciindi cisyoonto buyo. Ciindi Cabamasi, naa “ciindi cibikkidwe camasi,” cakamana mu 1914 ciindi Jehova naakapa Jesu Kristo bweendelezi. (Lk. 21:24) Mbwali wamukowa wa Mwami Davida, masimpe Jesu ‘ulizumizyidwe amulawo’ kuba Mwami wabu Mesiya. * (Matl. 49:10) Aboobo, kwiinda muli Jesu, Jehova wakacizuzikizya cisyomezyo cakwe cakupa Davida simulyazina uukkalilila ku Bwami ibunooliko lyoonse mane kukabe kutamani.—Lk. 1:32, 33.

Jesu ulizumizyidwe amulawo kuba Mwami wa Bwami bwa Leza (Amubone muncali 15)

15. Ino nkaambo nzi ncotukonzya kuba alusyomo luyumu mu Mwami, Jesu Kristo?

15 Ncotukonzya kwiiya kubusinsimi. Tulakonzya kuba alusyomo luyumu mu Mwami, Jesu Kristo. Ino nkaambo nzi? Akaambo kakuti  kwiindana abeendelezi bamunyika, balo ibakonzya kusalwa abantu naa ikulibikka acuuno cabweendelezi, Jesu wakasalwa a Jehova alimwi “wakapegwa . . . bwami” bwalo mbwazumizyidwe amulawo. (Dan. 7:13, 14) Cakutadooneka, Mwami walo Jehova mwini kumugama ngwaakasala, uleelela kuti tumusyome!

“Mubelesi Wangu Davida” Uyooba “Mweembezi Wanzizyo”

16. Mbuti Jehova mbwalimvwa kujatikizya mbelele zyakwe, alimwi ino “beembezi ba Israyeli” mumazuba aa Ezekieli bakali kubweendelezya buti butanga?

16 Jehova, Mweembezi Mupati ulazibikkila maano kapati mbelele zyakwe, ibakombi bakwe baanyika. (Int. 100:3) Ciindi napa mukuli wakulanganya mbelele zyakwe kubeembezi baanyika, nkokuti aabo bapedwe bweendelezi, ulabikkila maano kapati kubona mbobazyeendelezya mbelele zyakwe. Aboobo, amweezyeezye buyo mbwaakalimvwa Jehova kujatikizya “beembezi ba Israyeli” mumazuba aa Ezekieli. Kakunyina akulisenda, beendelezi aabo bakali kweendelezya ‘calunya alimwi akudyaaminina.’ Aboobo, mbelele zyakapenga, cakuti zinji zyakabusiya bukombi busalala.—Ezk. 34:1-6.

17. Mbuti Jehova mbwaakavwuna mbelele zyakwe?

17 Ino ncinzi Jehova ncaakali kukonzya kucita? Kubeendelezi basilunya ba Israyeli wakaamba kuti: “Ndiyoobabuzya kuti balyaambilile.” Alimwi wakayungizya kwiinda mukusyomezya kuti: “Ndiyoofwutula mbelele zyangu.” (Ezk. 34:10) Jehova ulazizuzikizya nzyasyomezya lyoonse. (Jos. 21:45) Mu 607 B.C.E., wakavwuna mbelele zyakwe kwiinda mukubelesya basikalumamba bana Babuloni kubagusya abweendelezi beembezi aabo ibakali kuliyanda. Nokwakainda myaka iili 70, wakabafwutula bakombi bakwe ibakali mbuli mbelele kuzwa ku Babuloni akubajola alimwi kumunzi wabo kutegwa babukulusye bukombi bwakasimpe okuya. Pele mbelele zya Jehova zyakazumanana kukkala kazitakwabilidwe, nkaambo zyakali kuyoozumanana kuba ansi abweendelezi bwamunyika. “Ciindi cibikkidwe camasi” cakali kuyoozumanana kwamyaanda yamyaka minji.—Lk. 21:24.

18, 19. Ino mbusinsimi nzi Ezekieli mbwaakaamba mu 606 B.C.E.? (Amubone cifwanikiso icili kumatalikilo aacibalo.)

18 Mu 606 B.C.E., ciindi citandila kumwaka omwe kuzwa lunyonyooko lwa Jerusalemu alimwi amyaka minji bana Israyeli kabatanafwutulwa mubuzike ku Babuloni, Jehova wakasololela Ezekieli kwaamba businsimi ibutondezya Mweembezi Mupati mbwabikkila maano kapati kubukkale bwambelele zyakwe kukabe kutamani. Businsimi bwaamba Mweendelezi wabu Mesiya mbwayakweembela mbelele zya Jehova.

19 Businsimi ncobwaamba. (Amubale Ezekieli 34:22-24.) Leza ‘uyoozibusyila mweembezi omwe,’ walo ngwaita kuti “mubelesi wangu Davida.” Mabala aakuti “mweembezi omwe” antoomwe abbala lyakuti “mubelesi” ikwaamba buyo omwe, atondezya kuti Mweendelezi tanaakali kuyootalisya alimwi mukwasyi wamami muzyalani lya Davida, pele walo nguwakali kuyooba simulyazina wa Davida uukkalilila. Mweendelezi alimwi Mweembezi uyoozisanina mbelele zya Leza akuba “silutwe akati kanzizyo.” Jehova ‘uyoobamba cizuminano caluumuno’ ambelele zyakwe. ‘Zileleko ziyooloka alinzizyo  mbubonya mbuli mvwula,’ alimwi ziyoolimvwa kukwabililwa, kukatalusyigwa, alimwi akuzyala micelo. Kayi, luumuno lunooliko kutali buyo akati kabantu pele alimwi aakati kabantu abanyama!—Ezk. 34:25-28.

20, 21. (a) Ino businsimi bujatikizya “mubelesi wangu Davida” bwakazuzikizyigwa buti? (b) Ino majwi aa Ezekieli aajatikizya “cizuminano caluumuno” aamba nzi kujatikizya kumbele?

20 Mbobuzuzikizyigwa businsimi. Kwiinda mukwaamba Mweendelezi ooyu kuti “mubelesi wangu Davida,” Leza munzila yabusinsimi wakali kwaamba Jesu, iwakali waluzubo lwa Davida walo uuzumizyidwe amulawo kuti ayendelezye. (Int. 89:35, 36) Naakali anyika, Jesu wakasinizya kuti “mweembezi mubotu,” wakapa buumi bwakwe ‘akaambo kambelele.’ (Joh. 10:14, 15) Pele lino Mweembezi wakujulu. (Heb. 13:20) Mu 1914, Leza wakabikka Jesu kuba Mwami alimwi wakamupa mukuli wakweembela alimwi akusanina mbelele zya Leza anyika. Nokwakainda ciindi cisyoonto, mu 1919, Mwami mupya iwakabikkwa acuuno cabwami wakasala “muzike uusyomeka alimwi uucenjede” kuti kasanina “babelesi bamuŋanda,” nkokuti bakombi ba Leza basyomeka ibajisi bulangizi bwakupona kujulu naa anyika. (Mt. 24:45-47) Kwiinda mukusololelwa a Kristo, muzike uusyomeka ulazisanina kabotu mbelele zya Leza acakulya cakumuuya. Cakulya eeci cabagwasya kubamba luumuno alukwabililo muparadaiso yakumuuya iili mukucitika lino.

21 Ino majwi aa Ezekieli aajatikizya “cizuminano caluumuno” alimwi azileleko zili mbuli mvwula aamba nzi kujatikizya kumbele? Munyika mpya iboola, bakombi basalala ba Jehova anyika bayooba azileleko zinji ‘zyacizuminano caluumuno.’ Mubwini, muparadaiso ini-ini yanyika yoonse, bantu basyomeka kunyina nobayookongwa limbi ankondo, bugwebenga, nzala, kuciswa, naa abanyama bamusyokwe. (Is. 11:6-9; 35:5, 6; 65:21-23) Sena tamukkomani abulangizi bwabuumi butamani muparadaiso anyika mwalo mbelele zya Leza ‘moziyookkala cakuliiba, kakunyina muntu naba omwe uuziyoosya’?—Ezk. 34:28.

Mbuli Mweembezi wakujulu, Jesu ulabona mbozilanganizyigwa mbelele zya Leza (Amubone muncali 22)

22. Ino Jesu ulimvwa buti kujatikizya mbelele, alimwi mbuti aabo ibabeleka kabali beembezi mbobatondezya kubikkila maano kwakwe?

22 Ncotukonzya kwiiya kubusinsimi. Mbubwenya mbuli Bausyi, Jesu ulabikkila maano kapati kubukkale bwambelele. Ooyu Mweembezi alimwi Mwami ulabona kwaamba kuti mbelele zya Bausyi zilasaninwa kabotu kumuuya alimwi akuti zili muluumuno akuliiba muparadaiso yakumuuya. Eelo kaka cilakatalusya kuba aansi aabusolozi bwa Mweendelezi uuli boobo! Aabo ibabeleka kabali beembezi beelede kutondezya kuti balazibikkila maano mbelele mbubwenya mbwacita Jesu. Baalu beelede kweembela butanga “cakuliyandila” alimwi “caluyandisisyo” akuba zikozyanyo butanga nzyobweelede kwiiya. (1Pet. 5:2, 3) Kunyina mwaalu iweelede kupenzya imwi yambelele zya Jehova! Amuyeeye majwi aaya Jehova ngaakaambila beembezi basilunya bamu Israyeli kuciindi ca Ezekieli: “Ndiyoobabuzya kuti balyaambilile beni.” (Ezk. 34:10) Mweembezi Mupati ulabikkila maano kapati kujatikizya mbozyeendelezyegwa mbelele zyakwe alimwi awalo Mwanaakwe ulacita mbubwenya.

 “Davida Mubelesi Wangu Uyooba Silutwe Wabo Mane Kukabe Kutamani”

23. Ncisyomezyo nzi Jehova ncaakapa kujatikizya kukamantanya cisi ca Israyeli, alimwi mbuti mbwaakacizuzikizya?

23 Jehova uyanda kuti bakombi bakwe kababelekela antoomwe mulukamantano. Mubusinsimi bujatikizya kubukulusyigwa, Leza wakasyomezya kuti wakali kuyoobunganya bantu bakwe, nkokuti baiminizi kuzwa kubwami bwamisyobo yobilo ya Juda alimwi akuzwa kubwami bwamisyobo iili kkumi ya Israyeli, akubaswaanganya alimwi kuba “cisi comwe,” mbuli kuti nkuswaanganya “tusamu” tobilo kuti “tube kasamu komwe” mujanza lyakwe. (Ezk. 37:15-23) Mukuzuzikizyigwa kwabusinsimi, Leza wakabukulusya cisi ca Israyeli cikamantene ku Nyika Yakasyomezyedwe mu 537 B.C.E. * Pele lukamantano oolo cakali buyo citondezyo calukamantano lupati ilwakali kulangilwa kumbele alimwi ilwakali kuyookkalilila. Naakamana kusyomezya kukamantanya Israyeli, Jehova wakapa Ezekieli businsimi kujatikizya Mweendelezi wakumbele mbwaakali kuyooleta bakombi bakasimpe antoomwe munyika yoonse mulukamantano lwalo ilwakali kuyooba mane kukabe kutamani.

24. Ino Jehova umupandulula buti Mwami wabu Mesiya, alimwi ino bweendelezi bwakwe bunooli buti?

24 Ncobwaamba businsimi. (Amubale Ezekieli 37:24-28.) Jehova alimwi waamba kujatikizya Mweendelezi wabu Mesiya kuti “mubelesi wangu Davida,” “mweembezi omwe,” alimwi “silutwe,” pele aciindi aawa Jehova waamba Wakasyomezyegwa ooyu kuti “mwami.”  (Ezk. 37:22) Ino bweendelezi bwa Mwami ooyu bunooli buti? Bweendelezi bwakwe buyookkalilila. Kubelesyegwa kwamabala aakuti “kukabe kutamani” alimwi alyakuti “citamani” kutondezya kuti zileleko zyabweendelezi bwa Mwami ooyu tazikamani. * Mubweendelezi bwakwe kunooli lukamantano. Kabeendelezyegwa “amwami omwe,” balelwa basyomeka banootobela “mbeta” zikozyene alimwi “bayookkala mucisi” antoomwe. Bweendelezi bwakwe buyoopa kuti balelwa ba Bwami baswene kuli Jehova Leza. Jehova uyoobamba “cizuminano caluumuno” abalelwa bambubo. Jehova uyooba Leza wabo, alimwi bayooba bantu bakwe. Alimwi cikombelo cakwe ciyooba “akati kabo lyoonse mane kukabe kutamani.”

25. Mbuti businsimi bujatikizya Mwami wabu Mesiya mbobuli mukuzuzikizyigwa?

25 Mbobuzuzikizyigwa businsimi. Mu 1919, bananike ibasyomeka bakakamantanizyigwa ‘amweembezi wabo omwe,’ Mwami wabu Mesiya, Jesu Kristo. Mukuya kwaciindi, “nkamu mpati” kuzwa “muzisi zyoonse, mumisyobo yoonse, mumikowa yoonse alimwi amumilaka yoonse” bakakamantana antoomwe abasyominyina ibananike. (Ciy. 7:9) Boonse antoomwe, bakaba “tanga lyomwe” kabeendelezyegwa “amweembezi omwe.” (Joh. 10:16) Kufwumbwa naa bulangizi bwabo mbwakuyoopona kujulu naa anyika, boonse balazitobela mbeta zya Jehova. Akaambo kakucita boobo, balakkala antoomwe muparadaiso yakumuuya kabali bunyina bwanyika  yoonse ibukamantene. Jehova wabalongezya kwiinda mukubapa luumuno, alimwi cikombelo cakwe, iciiminina bukombi busalala, cili akati kabo. Jehova ngu Leza wabo alimwi balikkomene kuba bakombi bakwe, lino mane kukabe kutamani!

26. Mbuti mbomukonzya kugwasyilizya kuti kube lukamantano muparadaiso yakumuuya?

26 Ncotukonzya kwiiya kubusinsimi. Tulijisi coolwe cakukamantana mubunyina bwanyika yoonse katuli mubukombi busalala bwa Jehova. Pele coolwe eeci citupa mukuli wakugwasyilizya kutegwa lukamantano oolu lube. Aboobo, toonse tweelede kucita lubazu lwesu kutegwa tuzumanane kukamantana muzintu nzyotusyoma alimwi anzyotucita. (1Kor. 1:10) Aboobo, caluyandisisyo tulya cakulya cakumuuya cikozyenye, tutobela zyeelelo zyakulilemeka zyamu Magwalo zikozyenye, alimwi tulatola lubazu mumulimo omwe uuyandika wakwaambilizya Bwami alimwi akugwasya bantu kuba basikwiiya. Nokuba boobo, ikaambo kapati katupa kukamantana, nduyando. Ciindi notusolekesya kuba aluyando alimwi akulutondezya munzila ziindene-indene, kubikkilizya alweetelelo, lubomba, alimwi akulekelela, nkokuti tugwasyilizya kuti lukamantano lwesu luzumanane. Bbaibbele lyaamba kuti, ‘luyando, ncecaanzyo calukamantano cilondokede.’—Kol. 3:12-14; 1Kor. 13:4-7.

Jehova ulabulongezya bunyina bwabakombi bakwe bwaluyando bwanyika yoonse (Amubone muncali 26)

27. (a) Ino mulimvwa buti kujatikizya businsimi bwaamba Mesiya ibuli mubbuku lya Ezekieli? (b) Ino ncinzi ncotuyoolanga-langa muzibalo zitobela?

27 Eelo kaka tulalumba kapati kujatikizya businsimi bwaamba Mesiya ibujanika mubbuku lya Ezekieli! Kubala alimwi akuzinzibala kuyeeya businsimi oobu kutuyiisya kuti Mwami wesu uuyandwa, Jesu Kristo, uleelela kuti katumusyoma, ulizumizyidwe amulawo kweendelezya, ulatweembela kabotu, alimwi uyoopa kuti tukabe alukamantano lutakamani. Eelo kaka tulijisi coolwe cipati cakuba balelwa ba Mwami wabu Mesiya! Atuyeeye kuti businsimi oobu bwaamba Mesiya ncibeela camakani oonse aakubukulusyigwa alo aambwa mubbuku lyamu Bbaibbele lya Ezekieli. Kwiinda muli Jesu, Jehova uli mukubabunganya antoomwe bantu bakwe alimwi akubukulusya bukombi busalala akati kabo. (Ezk. 20:41) Muzibalo zitobela zyabbuku eeli, tuyoolanga-langa kubukulusya kukkomanisya ooku alimwi ambokupandululwa mubbuku lya Ezekieli.

^ munc. 1 Mwaka wakusaanguna wamubuzike wakatalika mu 617 B.C.E. ba Juda baange nobakatolwa ku Babuloni ciindi cakusaanguna. Aboobo, mwaka wacisambomwe wakatalika mu 612 B.C.E.

^ munc. 14 Mulongo wazyalani lya Jesu kuzwa kuli Davida ulilembedwe kabotu mumabbuku aa Makani Mabotu akasololelwa amuuya.—Mt. 1:1-16; Lk. 3:23-31.

^ munc. 23 Businsimi bwa Ezekieli ibujatakizya tusamu tobilo alimwi ambobwakazuzikizyigwa buyoolangwa-langwa mu Cibalo 12 cabbuku eeli.

^ munc. 24 Kujatikizya bbala lya Chihebrayo lyakuti “kukabe kutamani” alimwi alyakuti “citamani,” bbuku limwi lyakaamba kuti: “Kunze akwaamba bulamfwu bwaciindi, ibbala eeli lyaamba kukkalilila, kuyuma, kutanyonyooka, alimwi akutacinca.”