NCINZI ncobona aawa? Ninkamu yabasikalumamba bakkwelede amahacci aatuba. Pele bona nkobazyila. Mahacci aluujisi kugalamuka kuzwa kujulu mumakumbi! Hena ncobeni kuli mahacci kujulu?

Jesu kali Mwami kujulu

Peepe, aaya taali mahacci eeni pe. Tulizyi oobo nkaambo mahacci taakonzyi kubalika mumakumbi, hena tabusyi? Pele Bbaibbele lilaamba zyamahacci aakujulu. Hena ulicizyi ncolyaambila boobo?

Nkaambo kakuti kaindi mahacci akali kubelesyegwa kapati munkondo. Aboobo Bbaibbele lyaamba bantu bakkwelede amahacci aazwa kujulu ikutondezya kuti Leza uli kanzide kulwana bantu bali anyika. Hena ulibuzyi busena bwakulwanina nkondo eeyi mbobwiitwa? Bwiitwa kuti Amagedoni. Eelyo nkondo eeyi iya kumanizya bubi boonse buli anyika.

Jesu Nguuya kuba kumpela mukulwana nkondo eeyi ya Amagedoni. Koyeeya kuti Jesu ngonguyo Jehova ngwaakasala kuba mwami wamfwulumende Yakwe. Nkakaambo kaako Jesu ncasamina musini wabwami. Alimwi mupeni utondezya kuti uya kubajaya boonse basinkondonyina a Leza. Hena ceelede kutulamya kuti Leza uya kubajaya boonse bantu babi?

Jokela munsi ubone ku Makani 10. Ncinzi ncobona aawo? Zambangulwe yakajaya bantu babi. Ino ngwani wakapa kuti Zambangulwe eeyo ibe? Ngu Jehova Leza. Lino langa ku Makani 15. Ncinzi cicitika aawo? Munzi wa Sodoma a Gomola wanyonyoonwa amulilo Jehova ngwaakatumizya.

Vwununa ku Makani 33. Langa cicitika kumahacci ankalaki zyabana Ijipiti. Ngwani wakapa kuti baanywide meenda? Ngu Jehova. Wakacita oobu kutegwa akwabilile bantu bakwe. Langa ku Makani 76. Ulabona kuti Jehova wakabanyonyoona nibaba bantu bakwe bana Isilayeli akaambo kakucita zintu zitali kabotu.

Aboobo tatweelede kulamwa kuti Jehova uya kutuma basinkondo bakwe bakujulu kuzyi kumana bubi boonse buli anyika. Pele koyeeya buyo eeco ncociya kwaamba! Vwununa peeji liccilila tubone ciliko.

Ciyubunuzyo 16:16; 19:11-16.



Mibuzyo

  • Nkaambo nzi Bbaibbele ncolyaamba mahacci kujulu?
  • Yiitwa buti nkondo ya Leza yakulwana bantu babi anyika, alimwi nkaambo nzi nkondo eeyi ncoiyakuba?
  • Ngwani acifwanikiso uuya kusololela munkondo, alimwi nkaambo nzi ncasamide musini, alimwi ino mupeni wakwe wiiminina nzi?
  • Twalanga ku Makani 10 a 15, nkaambo nzi ncotutakonzyi kulamwa kuti Leza uya kubanyonyoona bantu babi?
  • Mbuti Makani 33, 36 a 76 mbwaatondezya kuti Leza uya kubanyonyoona bantu babi nokuba kuti baamba kuti bakomba nguwe?

Mibuzyo aimwi

  • Bala Ciyubunuzyo 19:11-16.

    Mbuti Magwalo mbwaacisalazya kuti ngu Jesu Kristo uutantide ahacci lituba? (Ciy. 1:5; 3:14; 19:11; Is. 11:4)

    Mbuti bulowa bwakasansailwa azisani zya Jesu mbobutondezya kuti kuzunda kwakwe takuli kwakudooneka? (Ciy. 14:18-20; 19:13; Is. 63:1-6)

    Mbabaani balangilwa kubikkilizyigwa kuli basikalumamba baccilila Jesu ahacci lyakwe lituba? (Ciy. 12:7; 19:14; Mt. 25:31, 32)