Basikulingula nyenyezi

HENA waibona nyenyezi iimweka kapati muntu umwi njatondeka? Nibakazwa mu Jelusalemu nyenyezi yakalibonya. Aaba basankwa bazwa Kujwe, alimwi baiya zyanyenyezi. Balisyomede kuti nyenyezi eeyi mpya ibasololela kumuntu uulemekwa.

Basankwa nibakasika ku Jelusalemu, bakabuzya kuti: ‘Ino uli kuli mwana uuya kuba mwami waba Juda?’ Izina lyakuti ‘ba Juda’ ndizina limwi lyabana Isilayeli. Basankwa bati: ‘Twataanguna kubona nyenyezi yamwana nitwali Kujwe, aboobo twaboola kuti tumukombe.’

Heloda mwami wamu Jelusalemu naakamvwa makani aaya, cakamucima. Tayandi kuti kube mwami uumbi uubweza cuuno cakwe. Aboobo Heloda wakaita bapaizi bapati akubabuzya kuti: ‘Ino uya kuzyalilwa kuli mwami wakasyomezyegwa?’ Baingula bati: ‘Ibbaibbele lyaamba kuti, nku Bbetelehemu.’

Kumane Heloda waita basankwa bazwa Kujwe akubaambila kuti: ‘Kamuya mukamulangaule mwana. Mwaakumujana, mukandaambile kutegwa andime nkaunke nkamukombe.’ Pele mubwini, Heloda uyanda kuti aakumujana mwana akamujaye!

Kumane nyenyezi yeendela ampela lyabasankwa kuya ku Bbetelehemu, yaakwiima abusena aali mwana. Nobanjila muŋanda, bajana Maliya amwana Jesu. Bamuletela zipego Jesu. Kumane Jehova wabacenjezya basankwa muciloto kuti batajokeli kuli Heloda. Aboobo bajokela kucisi cokwabo kwiinda mukubelesya nzila iimbi.

Heloda naamvwa kuti bantu aabo ibazwa Kujwe bajokela nkobazwa, wakalala kapati. Amane walailila kuti bana boonse basankwa bajaigwe bali mu Bbetelehemu ibajisi myaka yobilo kuya ansi. Pele Jehova wamucenjezya Josefa muciloto ziya kucitika kumpela, eelyo Josefa amukwasyi wakwe bazwa baunka ku Ijipiti. Josefa amvwe kuti Heloda wafwa, wamubweza Maliya a Jesu bajokela kumunzi ku Nazaleta. Ooku nkonkuko Jesu nkwaakomenena.

Ino uyeeya kuti ngwani wakapa kuti nyenyezi mpya imunike? Koyeeya kuti basankwa bakaunka ku Jelusalemu nibakamana kubona nyenyezi. Saatani Diabolosi wakali kuyanda kujaya Mwana wa Leza, alimwi wakalizyi kuti Mwami Heloda waku Jelusalemu inga wamujaya. Aboobo ngu Saatani wakapa kuti nyenyezi imunike.

Matayo 2:1-23; Mika 5:2.



Mibuzyo

  • Mbabaani basankwa bali acifwanikiso, alimwi nkaambo nzi uumwi ncatondeka nyenyezi iimweka kapati?
  • Nkaambo nzi Mwami Heloda wakalala, alimwi ncinzi ncaacita?
  • Nkuli nyenyezi iimweka kapati nkwiibasololela bantu, pele nkaambo nzi ncobaindila nzila iimbi nibajokela nkobazwa?
  • Ncinzi Heloda ncaalailila, alimwi nkaambo nzi?
  • Ncinzi Jehova ncaamwaambila Josefa kuti acite?
  • Ngwani wakapa kuti nyenyezi mpya ilibonye, alimwi nkaambo nzi?

Mubuzyo aumwi

  • Bala Matayo 2:1-23.

    Ino Jesu wakajisi myaka yongaye, alimwi nkuli nkwaakabede basongo nibakaunka kumubona? (Mt. 2:1, 11, 16)