KWAINDA myaka iitandila kuli yobilo kuzwa munzi wa Bbabbuloni nookabwezyegwa aba Medi a Persia. Langa cicitika lino! Bana Isilayeli bazwa mu Bbabbuloni. Ino bacikonzya buti kuzwa? Ngwani wabazumizya kuti baunke?

Sailasi mwami wa Persia wacita oobo. Kakucili myaka minji Sailasi katanazyalwa, Jehova wakaambila Izaya musinsimi wakwe kulemba zyanguwe kuti: ‘Uya kucita mbuli mbondiyanda kuti ucite. Milyango iya kucaala bukwazi kutegwa ukabweze munzi.’ Sailasi wakasololela mukuzunda akubweza munzi wa Bbabbuloni. Ba Medi aba Persia bakanjila mumunzi masiku kwiinda mukubelesya milyango yakasiidwe bukwazi.

Pele Izaya musinsimi wa Jehova awalo wakati Sailasi uya kubalailila bantu kuti Jelusalemu atempele ziyakwe alimwi. Hena Sailasi wakabalailila? Inzya wakabalailila. Nceeci Sailasi ncaambila bana Isilayeli, wati: ‘Kamuya lino ku Jelusalemu mukayake tempele lya Jehova, Leza wanu.’ Ncencico eeci bana Isilayeli ncobaya kucita.

Bana Isilayeli bazwa mu Bbabbuloni

Pele tabali boonse bana Isilayeli mu Bbabbuloni bakonzya kweenda musinzo mulamfwu kujokela ku Jelusalemu. Nkulamfwu kwamakkilomita aatandila ku 800, alimwi banji bali cembade kapati, alimwi bamwi balaciswa kapati cakuti tabakonzyi kweenda musinzo uuli boobu. Alimwi kuli twaambo atumwi tupa kuti bantu bataunki. Pele Sailasi waambila baabo batako kuunka kuti: ‘Amupe nsiliva angolida azimwi zipego kubantu aabo bajokela kwaakuyaka Jelusalemu atempele yayo.’

Aboobo zipego zinji zyapegwa kubana Isilayeli aaba bali mulweendo lwakuya ku Jelusalemu. Awalo Sailasi wabapa mbale ankapu Nebukadineza nzyaakabweza mutempele lya Jehova naakanyonyoona Jelusalemu. Lino bantu baba azintu zinji zyakunyamuna.

Kwiinde myezi iitandila kuli yone yakweenda, bana Isilayeli basika aciindi cibotu mu Jelusalemu. Kwainda buyo myaka iili 70 kuzwa munzi nowakanyonyoonwa, alimwi nyika yakacaala kakutako amuntu uukkala. Nokuba kuti lino bana Isilayeli bajokela mucisi cokwabo, balaba amapenzi manji kweelana ambotulaaiye kumpela.

Izaya 44:28; 45:1-4; Ezara 1:1-11.



Mibuzyo

  • Kweelana ambokutondezyedwe acifwanikiso, ncinzi bana Isilayeli ncobacita?
  • Mbuti Sailasi mbwaakazuzikizya businsimi bwa Jehova kwiinda muli Isaya?
  • Ncinzi Sailasi ncaabaambila bana Isilayeli batakonzyi kujokela ku Jelusalemu?
  • Ncinzi Sailasi ncaabapa bantu kuti batole ku Jelusalemu?
  • Ino cabatolela ciindi cilamfwu buti bana Isilayeli kusika ku Jelusalemu?
  • Kwainda myaka yongaye kuzwa nyika niya kacaala kakutako bantu?

Mibuzyo aimwi

  • Bala Izaya 44:28, a 45:1-4, BT.

    Mbuti Jehova mbwaakakankaizya kuzuzikizyigwa kwabusinsimi kujatikizya Sailasi kutali kwakudooneka? (Is. 55:10, 11; Balo. 4:17)

    Mbuti businsimi bwa Isaya kujatikizya Sailasi mbokutondezya nguzu Jehova Leza zyajisi zyakukonzya kwaamba zyakumpela? (Is. 42:9; 45:21; 46:10, 11; 2 Pita 1:20)

  • Bala Ezara 1:1-11.

    Twalanga cikozyanyo cabaabo batakali kukonzya kujokela ku Jelusalemu, mbuti swebo sunu mbotukonzya ‘kuyumya maanza aabaabo’ bakonzya kunjila mulimo waciindi coonse? (Ezr. 1:4, 6; Balo. 12:13; Kol. 4:12)