DAVIDA amane kujaya Golyati, mupati wabasikalumamba wabana Isilayeli wazina lya Abina wamuleta kuli Saulu. Saulu wakkomana kapati akaambo kacintu Davida ncaacita. Wamubikka kuba mupati wabasikalumamba alimwi wamutola kwaakukkala anguwe kuŋanda yakwe yabwami.

Kwiinde mazuba, basikalumamba bajoke kukulwana ba Filisiti, bamakaintu baimba lwiimbo kabati: ‘Saulu wajaya bantu bali zyuulu, pele Davida wajaya makumi aazyuulu.’ Eeci Saulu camupa kuba amunyono nkaambo Davida wainda kupegwa bulemu kwiinda nguwe. Pele walo Jonatani mwana wakwe tanaaba amunyono. Ulamuyanda Davida kapati, awalo Davida ulamuyanda Jonatani. Aboobo aaba bobilo bapangana kuti banakuli balongwe lyoonse.

Mwami Saulu wawaala sumo

Davida ulicizyi kapati kuuma kalumbu, alimwi Saulu ulazyiyanda ziimbo nzyauma. Pele buzuba bumwi Saulu akaambo kamunyono wakwe, cakamupa kucita cintu cuusisya. Davida kauma kalumbu, Saulu wabweza sumo akuliwaala wati: ‘Ndilamuyasilizya Davida kubwaanda!’ Pele Davida walileya sumo, aboobo lyainda. Kwamazuba masyoonto alimwi Saulu wamwiinzya Davida sumo. Aboobo lino Davida wazyiba kuti weelede kucenjela kapati.

Hena ulayeeya cisyomezyo ncaakaamba Saulu? Wakati uya kupa mwana wakwe musimbi kuti akwate muntu ooyo uuya kujaya Golyati. Kumamanino Saulu waambila Davida kuti ulakonzya kukwata Mikala mwana wakwe, pele cakutaanguna weelede kujaya ba Filisiti basikalumamba bali 100. Ma! koyeeya buyo eeco. Saulu usyoma kuti masimpe ba Filisiti balamujaya Davida. Pele tiibamujaya pe, aboobo Saulu wapa mwana wakwe musimbi kuti abe mukaintu wa Davida.

Buzuba bumwi Saulu waambila Jonatani ababelesi bakwe boonse kuti uyanda kumujaya Davida. Pele Jonatani waambila bausyi kuti: ‘Mutamujayi Davida. Taku cibi ncaakacita kuli ndinywe. Aboobo, zyoonse nzyaakacita zyakali kumugwasya kapati nywebo. Wakabikka buumi bwakwe muntenda kujaya Golyati, eelyo nimwakabona boobo mwakakkomana.’

Davida walileya sumo

Saulu wamvwa caamba mwana wakwe, aboobo wasyomezya kuti tako kumujaya Davida. Davida wajolwa alimwi akutalika kubelekela Saulu mbuli mbwaakali kucita kaindi. Nokuba boobo, buzuba bumwi Davida kauma kalumbu, alimwi Saulu wakamufwusa Davida sumo. Davida wakalileya sumo lyakaile kuyasa kubwaanda. Eeci nciindi catatu! Davida lino wakazyiba kuti ano amunzi taakkalwi.

Ngeena masiku aayo Davida waunka kuŋanda yakwe. Pele Saulu watuma bantu kuti bamujaye. Mikala wazyiba bausyi ncobayanda kucita. Aboobo Mikala wati kumulumi wakwe: ‘Ikuti utazwi masiku aano, cifwumo uya kujaigwa.’ Ngeena masiku aayo Mikala wamuzwisya Davida ampulungwido waccija. Kwamyaka iitandila kuciloba, Davida wali kuyuba mumasena aindenyi-indenyi kutegwa Saulu atamuboni.

1 Samuyele 18:1-30; 19:1-18.



Mibuzyo

  • Nkaambo nzi Saulu ncajisi munyono kuli Davida, pele mbuti walo Jonatani mwana wa Saulu mbwaindenyi abaswaabo?
  • Ncinzi cakacitika buzuba bumwi Davida kaumina Saulu kalumbu?
  • Ncinzi Saulu ncaambila Davida kuti acite katanamubweza Mikala kuba mukaintu wakwe, alimwi nkaambo nzi Saulu ncaambila boobo?
  • Davida naakali kuumina Saulu kalumbu, ncinzi cakacitika kuciindi catatu kweelana acifwanikiso mbocitondezya?
  • Mbuti Mikala mbwaakapa kuti Davida afwutuke, alimwi ncinzi Davida nceelede kucita kwamyaka iili ciloba?

Mibuzyo aimwi

  • Bala 1 Samuyele 18:1-30.

    Mbuti cilongwe cabo ciyumu caba Jonatani a Davida mbocitondezya cilongwe cili akati kaba “mbelele zimwi” alimwi a “katanga kaniini”? (1 Sam. 18:1; Joh. 10:16; Lk. 12:32; Zek. 8:23)

    Nokuba kuti Jonatani nguwakeelede kuba simulyazina wa Saulu, mbuti 1 Samuyele 18:4 mbwatondezya kulibombya kwa Jonatani kuli yooyo wakasalwa kuba mwami?

    Mbuti cikozyanyo ca Saulu mbocitondezya kuti kuba amunyono kulakonzya kutola kulufwu, alimwi ino eeci citucenjezya nzi? (1 Sam. 18:7-9, 25; Jak. 3:14-16)

  • Bala 1 Samuyele 19:1-17.

    Mbuti Jonatani mbwaakalibikka muntenda naakasikila Saulo? (1 Sam. 19:1, 4-6; Tus. 16:14)