IBA Filisiti baboola alimwi ikulwana bana Isilayeli. Ibapati ba Davida basankwa botatwe bali munkamu yabasikalumamba ba Saulu. Aboobo buzuba bumwi Jese waambila Davida kuti: ‘Bweza maila amapoka azinkwa utolele banyoko. Ukabuzye naa bapona buti.’

Golyati

Davida asike kukkala basikalumamba, wabalikila nkobaimvwi kutegwa abone ibanyina. Golyati bbumbwabuuka mu Filisiti wazwa anze kufwubaazya bana Isilayeli. Wali kucita oobu abuzuba mafwumofwumo akumangolezya kwamazuba aali 40. Woongolola wati: ‘Amusale umwi musankwa akati kanu andilwane. Ikuti azunde akundijaya, tulaba bazike banu. Pele kuti ndimuzunde akumujaya, mulaba bazike besu. Ndakomba kaka amusale umwi tulwane ma!’

Davida wabuzya bamwi basikalumamba kuti: ‘Ino ncinzi ncalaapegwe muntu uulaajaye mu Filisiti ooyu akumana masampu aaya kubana Isilayeli?’

Sikalumamba wati: ‘Imuntu ooyo Saulu ulamupa lubono lunji. Alimwi ulamupa mwana wakwe musimbi kuti akwate.’

Pele boonse bana Isilayeli bamuyoowa Golyati nkaambo ndidombwana. Mulamfwu uutandila kumamita aali otatwe, alimwi ulijisi sikalumamba uumunyamuda ntobo.

Basikalumamba bamwi baunka kwaambila Mwami Saulu kuti Davida uliyandide kumulwana Golyati. Pele Saulu waambila Davida kuti: ‘Tokonzyi kumulwana ooyu mu Filisiti. Iwe uli kasankwa buyo kacizwa mukupa ampemo, walo wali sinkondo lyoonse mubuumi bwakwe.’ Davida waingula kuti: ‘Ndakajaya munyama mukali alimwi asyuumbwa ibakaluma mbelele zya Bataata. Alimwi ooyu mu Filisiti ulaba mbuli banyama aabo. Jehova ulandigwasya.’ Aboobo Saulu wati: ‘Koya, Jehova abe andiwe.’

Davida waunka kukalonga eelyo wabweza mabwe osanwe aabulungenyi, akwaabikka mucibbeeke cakwe. Amane wabweza kkwisyo waunka kukulwana bbumbwabuuka. Golyati amubone Davida watyompwa wati: Nkakantu aaka kaboola kundilwana! Uyeeya kuti cilaba cintu cuuba-uba kujaya Davida.

Davida wafwusa bbwe

Golyati wati: ‘Boola kuno kana! Mubili wako ndilaupa bayuni abanyama kuti baulye.’ Pele Davida wati: ‘Ulaboola kuli ndime amupeni, asumo amuumba, pele mebo ndilaboola kuli nduwe muzina lya Jehova. Obuno buzuba Jehova ulakwaaba mumaanza aangu, aboobo ndilakujaya.’

Aciindi aawa Davida wabalika kuli Golyati. Wabweza bbwe mucibbeeke cakwe, walibikka mukkwisyo akulifwusa canguzu. Ndeelyo lyeenda kuzyi kuti kumutwe nko, Golyati walundana ansi wafwa! Iba Filisiti babone kuti ngobasyoma waalabana ansi, boonse balusikka. Bana Isilayeli babatandila eelyo bazunda nkondo.

1 Samuyele 17:1-54.



Mibuzyo

  • Mbuyumuyumu nzi Golyati mbwaleta kuli basikalumamba ibana Isilayeli?
  • Mupati buti Golyati, alimwi mbulumbu nzi Mwami Saulu mbwasyomezya muntu uunga wajaya Golyati?
  • Waamba nzi Davida eelyo Saulu naamwaambila kuti takonzyi kulwana a Golyati nkaambo Davida kasankwa buyo kacizwa mukupa ampemo?
  • Kweelana ambwaamwiingula Golyati, mbuti Davida mbwaatondezya lusyomo muli Jehova?
  • Kweelana ambobona acifwanikiso, ncinzi Davida ncaabelesya kujaya Golyati, alimwi ncinzi cacitika kuba Filisiti naajaigwa Golyati?

Mibuzyo aimwi

  • Bala 1 Samuyele 17:1-54.

    Ncinzi cakali kumupa kutayoowa Davida, alimwi mbuti mbotukonzya kubwiiya busicamba bwakwe? (1 Sam. 17:37, 45; Ef. 6:10, 11)

    Nkaambo nzi Banakristo ncobeelede kuukaka muuya wakuzundana mbuli wa Golyati nobali muzisobano naa mumasena aakulikondelezya? (1 Sam. 17:8; Gal. 5:26; 1 Timo. 4:8)

    Mbuti majwi aa Davida mbwaatondezya kuti wakalijisi lusyomo kuti Leza ulamugwasya? (1 Sam. 17:45-47; 2 Mak. 20:15)

    Muciindi cakwiile kulanga buyo makani aabasikalumamba bobilo bakali basinkondonyina, mbuti cibalo eeci mbocitondezya kuti masimpe nkondo eeyi yakali akati kabaleza bakubeja alimwi a Leza mwini-mwini Jehova? (1 Sam. 17:43, 46, 47)

    Mbuti bananike mbobaiya cikozyanyo ca Davida cakusyoma muli Jehova? (1 Sam. 17:37; Jelemiya 1:17-19; Ciy. 12:17)