KUBUSENA abumwi bantu nkobakaunka kwaakukkala niyakamana Zambangulwe kwakali ku Uli. Wakaba munzi mupati wakajisi maanda mabotu mukati. Pele bantu okuya bakali kukomba baleza bakubeja. Oobu mbobakali kucita aku Bbabbelo. Bantu baku Uli abaku Bbabbelo tiibakali mbuli Nowa amwana wakwe Semu, ibakazumanana kubelekela Jehova.

Kwiinde myaka iili 350 kuzwa ciindi ca Zambangulwe, Nowa iwakali kusyomeka wakafwa. Kwakainda buyo myaka yobilo muntu ooyu ngobwenyi acifwanikiso wakazyalwa. Wakali muntu uuyandwa kapati kuli Leza. Izina lyakwe ngu Abbulahamu. Wakakkala amukwasyi wakwe mumunzi wa Uli.

Abbulahamu ulanga nyenyezi

Buzuba bumwi Jehova wakaambila Abbulahamu kuti: ‘Siya munzi wa Uli abamukowa wako, uunke kucisi ncendilaakutondezye.’ Hena Abbulahamu wakamuswiilila Leza akusiya bubotu boonse bwakali mu Uli? Inzya wakamuswiilila. Alimwi akaambo kakuti lyoonse Abbulahamu wakali kumuswiilila Leza, cakapa kuti abe mulongwe wa Leza.

Bamwi bamukwasyi wa Abbulahamu bakaunka limwi naakazwa mu Uli. Abalo bawisi ba Tela bakamuccilila. Awalo Loti mwana wamunyina wakaccilila. Mukaintu wakwe Sala bakaunka limwi. Nikwakainda mazuba, bakasika kubusena bwiitwa kuti Halani kwalo ba Tela nkobakazyi kufwida. Aciindi aawa bakalisakenyi kapati aku Uli.

Kwiinde mazuba, Abbulahamu abamukwasyi wakwe bakazwa mu Halani akuboola kunyika iitwa kuti Kenani. Ooko Jehova nkwaakati: ‘Eeyi njenyika njindiya kupa bana bako.’ Abbulahamu wakakkala ku Kenani mumatente.

Leza wakatalika kumugwasya Abbulahamu cakunga wakazyikuba ambelele zinji aŋombe azimwi zivwubwa alimwi amyaanda-myaanda yababelesi. Pele Abbulahamu a Sala tiibakalijisi bana bakulizyalila.

Abbulahamu naakaba amyaka iili 99, Jehova wakati: ‘Ndakusyomezya kuti uya kuba wisi wamikowa minji yabantu.’ Pele ino mbuti eeci mbocakali kukonzya kucitika mbwaanga Abbulahamu a Sala bakali cembade kapati?

Matalikilo 11:27-32; 12:1-7; 17:1-8, 15-17; 18:9-19.



Mibuzyo

  • Mbantu bali buti bakali kukkala mumunzi wa Uli?
  • Ngwani muntu uuli acifwanikiso, ino wakazyalwa lili, alimwi wakali kukkala kuli?
  • Ncinzi Leza ncaakamwaambila Abbulahamu kuti acite?
  • Nkaambo nzi Abbulahamu ncaakali kwiitwa kuti mulongwe wa Leza?
  • Mbabaani bakaunka a Abbulahamu naakazwa munyika ya Uli?
  • Ncinzi Leza ncaakamwaambila Abbulahamu naakasika kunyika ya Kenani?
  • Ncisyomezyo nzi Leza ncaakasyomezya Abbulahamu naakaba amyaka iili 99?

Mibuzyo aimwi

  • Bala Matalikilo 11:27-32.

    Ino Abbulahamu a Loti bakacitenyi buti? (Matl. 11:27)

    Nokuba kuti Tela wakalumbaizyigwa kukulonga amukwasyi wakwe kuya ku Kenani, mbuti mbotuzyi kuti ngu Abbulahamu wakatalisya lweendo oolu? Alimwi nkaambo nzi ncaakacitila boobu? (Matl. 11:31; Inc. 7:2-4)

  • Bala Matalikilo 12:1-7.

    Mbuti cilongwe ca Abbulahamu a Jehova mbocakakomena Abbulahamu naakasika munyika ya Kenani? (Matl. 12:7)

  • Bala Matalikilo 17:1-8, 15-17.

    Nkucinca kuli kwazina lya Abbulamu kwaakazyikucinca naakaba amyaka iili 99, alimwi nkaambo nzi? (Matl. 17:5)

    Nzilongezyo nzi Jehova nzyaakamusyomezya Sala? (Matl. 17:15, 16)

  • Bala Matalikilo 18:9-19.

    Ino mikuli nzi bamawisi njobapedwe ku Matalikilo 18:19? (Dt. 6:6, 7; Ef. 6:4)

    Ncinzi cakacitikila Sala icitondezya kuti taku ncotukonzya kumusisa Jehova? (Matl. 18:12, 15; Int. 44:21)