Timoteo wakali mukubusi iwakali kubotelwa kugwasya bantu. Wakeenda mumasena manji kuyoogwasya bantu. Akaambo kakucita boobo, wakajisi buumi bubotu. Sena ulayanda kuzyiba mbocakabede?—

Banyina Timoteo alimwi abakaapanyina bakamuyiisya kujatikizya Jehova

Timoteo wakakomenena mudolopo litegwa Lustra. Naakacili mwana, bakaapanyina ba Loidi abanyina ba Eunike, bakatalika kumuyiisya kujatikizya Jehova. Naakali kukomena Timoteo, wakayanda kugwasya bamwi kwiiya kujatikizya Jehova.

Timoteo naakacili mukubusi, Paulo wakamulomba kuti baunke limwi kuyookambauka kumasena amwi. Timoteo wakazumina. Wakalilibambilide kuunka akuyoogwasya bamwi.

 Timoteo wakaunka a Paulo kumunzi waku Makedoniya uutegwa Tesalonika. Kutegwa basike ooko, bakeelede kweenda musinzo mulamfwu mpoonya akutanta bwato. Nobakasika ooko, bakagwasya bantu banji kwiiya kujatikizya Jehova. Pele bamwi bantu bakanyema akuyanda kubacisa. Aboobo Paulo a Timoteo bakazwa ooko akuunka kuyookambaukila kumasena aambi.

Timoteo wakajisi buumi bukkomanisya

Nokwakainda myezi iili mbwiibede, Paulo wakaambila Timoteo kuti ajokele ku Tesalonika kuyoobona mbobakabede bakwesu. Cakali kuyandika busicamba kujokela kumunzi ooyu wakali kuyoosya! Pele Timoteo wakaunka akaambo kakuti wakali kulibilika kujatikizya bakwesu bakooko. Wakapiluka kuli Paulo kajisi makani mabotu. Bakwesu baku Tesalonika zyakali kubeendela kabotu zintu!

Timoteo wakabeleka a Paulo kwamyaka minji. Aciindi cimwi Paulo wakalemba kuti Timoteo wakali muntu wakali kweelela ngwaakali kukonzya kutuma kugwasya mbungano. Timoteo wakali kumuyanda Jehova alimwi akuyanda bantu.

Sena ulabayanda bantu akuyanda kubagwasya kwiiya kujatikizya Jehova?— Ikuti kobayanda, uyooba abuumi bukkomanisya mbubwenya mbuli Timoteo!