Bolivia

Nigeria, yakaindi alimwi ampya

Tahiti

Kweelana azina lyakuti Ŋanda ya Bwami ncolipandulula, njiisyo zyamu Bbaibbele izibandikwa okuya zijatikizya Bwami bwa Leza—imutwe wamakani Jesu ngwaakali kukambauka.—Luka 8:1.

Masena aabukombi bwakasimpe aali mucilawo. Kuzwa kubusena oobo, mulimo wakukambauka makani mabotu aa Bwami ulacitwa. (Matayo 24:14) Maanda aa Bwami aliindene-indene kukomena alimwi ambwaabambidwe, pele oonse aliyakidwe munzila yabulemu alimwi manji alabelesyegwa ambungano zinji. Mumyaka yainda, twayaka Maanda aa Bwami mapya manji (mweelwe uubalilwa kuli osanwe buzuba abuzuba) kutegwa tucikonzye kuba amasena aakukombela akaambo kambungano ziyaabuvwula. Ino eeci cikonzyeka buti?—Matayo 19:26.

Alayakwa kwiinda mukubelesya mali aasangilwa bubambe bwakuyaka Maanda aa Bwami. Mali aaya aasangwa alatumwa kuofesi yamutabi kutegwa mbungano iziyanda kuyaka naa kuyakulula Ŋanda ya Bwami zijane mali.

Alayakwa abasikulisungula batabbadelwi ibaindene bukkale. Mumasena manji, Tubunga Twabasikuyaka Maanda aa Bwami twatalisyigwa. Tubunga twababelesi bayaka alimwi abasikulisungula tuleenda kuzwa kumbungano imwi kuya kumbungano iimbi mucisi mumwenya, nomuba mumasena aali kulamfwu, kugwasya mbungano zili mucilawo eeco kuyaka Maanda aa Bwami. Mumasena amwi, Bakamboni beelela balasalwa kusololela kuyakwa alimwi akubambululwa kwa Maanda aa Bwami mucilawo cipedwe. Nokuba kuti banji ibakaiya mulimo balalisungula kubeleka abusena buli mukuyakwa, bunji bwabasikubeleka balisungula mbaasimbungano bali kubusena oobo. Muuya wa Jehova alimwi akulyaaba camoyo woonse kwabantu bakwe nkokupa kuti zyoonse eezyi zikonzyeke.—Intembauzyo 127:1; Bakolose 3:23.

  • Nkaambo nzi masena eesu aakukombela ncaaitwa kuti Maanda aa Bwami?

  • Ino cikonzyeka buti kuyaka Maanda aa Bwami munyika yoonse?