• ZISI 47

  • MWEELWE WABANTU 743,421,605

  • BASIKUMWAYA 1,614,244

  • ZIIYO ZYA BBAIBBELE 842,091

Kutambula Muntu Uutali Ngonguwe Kwasololela Kuciiyo ca Bbaibbele

Muswaangano Wamasi iwakacitwa ku London, England, wakabakkomanisya kapati bantu ibakali kuboola kumuswaangano ooyo kuzwa kuzisi zimbi alimwi a Bakamboni bamucisi. Ba Andrew aba Elizabeth bakaunka kuhotela limwi ku London, kabajisi makanze aakuyakutambula basimuswaangano ibazwa kumasi aambi. Nobakabona mukaintu umwi iwakasamide kabotu mubusena butambudwa beenzu, ba Elizabeth bakaunka kuyakumwaanzya  kwiinda mukumukumbata calukkomano kabayeeya kuti ngumwi wabeenzu ibakali kuboola kumuswaangano. Mukaintu ooyu wakagambwa, aboobo ba Elizabeth bakalilekelela. Bakati: “Amundijatile, ndali kuti muli umwi wabeenzu ibaboola kumuswaangano!”

Mukaintu ooyu wakabuzya kuti, “muswaangano uuli?”

Ba Elizabeth bakatondeka cikwankwani cakali mubusena imutambudwa beenzu icakajisi majwi aakutambula Bakamboni ba Jehova, mpoonya bakagambwa kumvwa mbwaakaingula mukaintu ooyu. Wakati: “Cabota! Sena ambebo ndilibonya mbuli umwi wa Bakamboni ba Jehova?”

Mumubandi wakatobela, ba Elizabeth bakazyiba kuti izina lyamukaintu ooyu ngu Vivien, kuti wakali wakucisi ca Nigeria, alimwi akuti walo aba Elizabeth bakakkalene buyo munsi-munsi. Ba Vivien bakazumina kwiiya Bbaibbele alimwi bakali kuyanda kuti abalo bana babo batalike kwiiya. Ba Andrew aba Elizabeth bakabaswaya ba Vivien kuŋanda, eelyo abalo bakabatambula kabotu. Mbobakaswaangana munzila iyatakali kuyeeyelwa mudolopo lya London kwakabasiya amizeezo ba Vivien. Ciindi ba Andrew aba Elizabeth nobakatondezya ba Vivien bbuku lyakuti Bbaibbele Ncoliyiisya, ba Vivien bakabagambya nobakaamba kuti bakalilijisi kale alimwi bakali kulibala antoomwe abana babo bone. Ba Vivien nobakamvwa kuti eeli ndebbuku libelesyegwa kusololela ciiyo ca Bbaibbele citabbadelwi, calukkomano bakaamba kuti, “Katutalika mpomunya aawa!”

Lugwalo Kuzwa Kumukwesu imu Roma

Mu November 2014, mbungano yakusaanguna yaci Roma yakatalisyigwa mu Slovakia. Kumuswaangano wabbazu iwakacitwa lino-lino aawa, basikumwaya baci Roma ibali 21 bakabbapatizyigwa. Boonse bakali kuzwa mumunzi omwe. Lya Ciibalusyo, bantu ibakajanika mumbungano yaci Roma  bakali 495. Mukwesu umwi iwakabbapatizyigwa calino-lino wakalemba kuti:

Slovakia: Bakambausi ba Bwami bobilo cakukondwa baambila mukaintu mu Roma makani mabotu

“Ndili mu Roma waku Žehra, mu Slovakia. Kuno nkondikkala, bakuwa banji batubona kuti tuli Basimweendanzila (Gypsies), kuti tulaatombe, tulabeja alimwi akubba. Ciindi nondakaunka kucikombelo, uulanganya cikombelo wakandaambila kuti tandizulilwi nkuko, aboobo wakanditanda. Akaambo kazintu zili boobu izyakandicitikila, inga mwayeeya buyo mbondakatalika kubabona bamakuwa. Mpoonya Bakamboni ba Jehova bakanditamba kuti nduunke ku Ŋanda ya Bwami. Nondakali kuunka, imizeezo tiiyakakkalikene pe, ndakali kuyeeya kuti ndiyakutyompwa alimwi. Ndakagambwa kuti kanditananjila mu Ŋanda ya Bwami, mukuwa wakanditambula kabotu, wakandijata mumaanza akundaanzya. Nokwakali kubandikwa makani aabuleya, cakandaalila kubikkila maano. Ndakali kwiile kuyeeya buyo kuti, ‘Ino caba buti kuti boonse balandisamausya?’

“Masiku aayo tiindakazyibona ŋonzi nkaambo ndakali kwiile kuyeeya cakacitika ku Ŋanda ya Bwami. Aboobo ndakaunka alimwi kutegwa ndisinizye naa kubota moyo kwabantu aabo nkwancobeni naa kwakali kwakulicengeezya buyo. Ciindi cabili nindakaunka, bantu boonse bakanditambula kabotu kwiinda ciindi cakusaanguna akundicita mbuli mulongwe ngobakazyibene limwi kwaciindi cilamfwu. Tiindakaleka pe kujanika kumiswaangano, mpoonya mukuya kwaciindi ndakabbapatizyigwa. Noliba leelyo nondakamana kubbapatizyigwa, bakwesu tiibakacinca, mane buya asunu bacizumanana kutondezya kuti ndilayandika kapati. Zimwi ziindi, bandipa zyakulya zibotu kwiinda nzyobalya balo! Ndiyanda kuzumanana kuba mumbunga eeyi, alimwi Jehova ngo Leza ngondiyanda kubelekela lyoonse mane kukabe kutamani.”

Mupailo Wakwaambila Bamwi Makani Mabotu Waingulwa

Mucizyi umwi wazina lyakuti Aysel wakali mulweendo mubbaasi kuzwa mudolopo lya Ganja mwakkala kuya ku Baku mucisi ca Azerbaijan. Wakapaila kuli Jehova,  kumwaambila kuti wakali kuyanda kwaambaula amuntu umwi kujatikizya Bbaibbele nobali mulweendo. Nokuba kuti mucizyi Aysel wakalipedwe kale cuuno cigaminide mubbaasi, mukaintu umwi wakayanda kuti kubota mane bakkale limwi. Mucizyi ooyu wakatalika kubandika amukaintu ooyo alimwi ba Aysel bakacikonzya kunyona mubandi kuti ujatikizye Bbaibbele. Mukaintu ooyo wakaamba kuti ulamuyanda Jesu alimwi wakali kuyanda kwiiya zinji kujatikizya nguwe. Ba Aysel amukaintu ooyo bakapana manamba aafooni akulayana kuti bakaswaangane alimwi. Mukaintu ooyo wakalomba ba Aysel kuti bakamuletele Bbaibbele ikuti kacikonzyeka.

Ba Aysel nobakapiluka ku Ganja, bakamuswaya kuncito mukaintu uulya iwakatondezya luyandisisyo. Mukaintu ooyo wakaamba kuti wakajisi kabbuku kamipailo nkaakali kubala abuzuba. Mucizyi wesu wakagambwa kuzyiba kuti kabbuku kamipailo nkaakali kwaamba mukaintu ooyo nkabbuku kakuti Kulingaula Magwalo Abuzuba kamu 2013! Ciiyo ca Bbaibbele cakatalisyigwa, alimwi ba Aysel bakakkomana kapati kuti Jehova wakabapa busicamba bwakucita bukambausi bwamukwiizya.

Lugwalo Lwakulumba Kuzwa Kumwaange

Kucisi ca Spain kwakatambulwa lugwalo lwaamba kuti:

“Cakusaanguna, ndiyanda kumulumba akaambo kamulimo ngomucita wakusikila bantu bamisyobo yoonse amulumbe wamu Bbaibbele.

“Ndakabandika a Bakamboni ba Jehova ciindi cakusaanguna myaka iili 15 yainda ku Tiranë, mu Albania. Ndakagambwa kuti Kamboni umwi wakajisi busicamba bwakutusikila, nkaambo twakali nkamu yazigwebenga yabalombwana ibali kkumi. Kunyina wakali kusola kwaambaula andiswe, pele mukwesu ooyu wakacita oobo nokuba kuti twakajisi zilwanyo. Cakutayoowa wakatwaambila zyamu Bbaibbele. Busicamba bwakwe bwakandigambya kapati.

“Myaka yone yainda muno mucisi ca Spain, Kamboni umwi wakandiswaya muntolongo akundipa coolwe cakuba  aciiyo ca Bbaibbele. Ndakazumina, alimwi kuzwa ciindi eeco ndasanduka. Tandicili muntu sinkondo alimwi mukali pe. Kwainda myaka iili mbwiibede kuzwa ciindi nondakanjide mumapenzi. Ndamuzyiba Jehova, alimwi eeci capa kuti buumi bwangu bubote. Ndilasoleka kukkala kabotu abantu, alimwi ndali sikumwaya uutabbapatizyidwe kwaciindi ciinda kumwaka omwe lino.

“Nokuba kuti ndili muntolongo kwamyaka iili 12 lino, myaka yone yainda ndajisi lukkomano aluumuno lwamumizeezo ndondatakajisi aciindi cimbi cili coonse. Ndilamulumba Jehova abuzuba akaambo kaceeci.

“Mvwiki zili mbozibede zyainda ndakeebelela mavidiyo amwi aawebbusaiti ya jw.org. Vidiyo iitondezya mukwesu umwi iwakali muntolongo ku United States yakandijila mumoyo. Tandili muntu uulila-lila pe, pele ciindi nondakabona mbwaakacinca mubuumi bwakwe, ndakalila.

“Jehova aazumanane kumulongezya nomusoleka kusikila bantu boonse kwiinda mukusandulula makani mabotu mumyaambo minji alimwi akwiinda mukuswaya bantu bali mbuli ndiswe notuli muntolongo.

“Ndalumba kapati.”

 “Lino Ndilikkalikene Mumizeezo”

Ba Felicity, ibalaamyaka yakuzyalwa iili 68 ibakkala mu Sweden baamba kuti, “Mazuba oonse aaya tiindalijisi bulangizi buli boonse mubuumi alimwi ndali kwiile kucita kufwumbwa ncondiyanda, ndali kwiile kuzumanana kuyandaula luumuno lwalo ndondatakali kujana naaceya.” Akaambo kakuti tiibakakkutila anzyobakali kusyoma mucikombelo ca Katolika, bakatalika kulanga-langa mizeezo yiindene-indene yazikombelo, mpoonya kumamanino bakatalika kulowa akusonda.

Akaambo kakuti bakabona kuti buumi bwabo bunyina mpindu, bakalityompedwe kapati cakunga bakayeeya kuti balijaye buyo. “Kandilila, ndakoomba ikulomba Leza kuti andaambile ncaakali kuyanda kuti ndicite. Nokwakainda mvwiki zyobilo, ndakamvwa uukonkomona kumulyango. Nindakajalula, ndakajana mulombwana iwakali kumweta-mweta, mpoonya wakandibuzya naa ndakali kuyanda kuswiilila Jwi lya Leza. Mumoyo ndakati, ‘Peepe kaka, Leza, tiindali kukulomba ceeci pe—ikutali Bakamboni ba Jehova!’”

Icakafwambaana kuboola mumizeezo yamukaintu ooyu nkujala cijazyo, nokuba boobo wakaswiilila akuzumina kwiiya Bbaibbele mubbuku lya Bbaibbele Ncoliyiisya. Waamba kuti, “Bbuku eeli lyakandipa kulibona munzila imbi Bbaibbele.” Ba Felicity bakabbapatizyigwa ku Sweden aamuswaangano wacooko wamu 2014. Lino baamba kuti: “Eeci ncondakali kuyandaula mubuumi bwangu boonse. Lino ndilikkalikene mumizeezo.”