• NOBAKAZYALWA 1928

  • NOBAKABBAPATIZYIGWA 1957

  • BUUMI BWABO MUBUFWAAFWI Mucizyi iwakabelesya bupampu kugwasya balumi bakwe ibakali kumukazya kuti batambule kasimpe.—Kweelana ambwaakaluula mwanaabo musankwa, Mario Koetin.

BAMAAMA bakali bantu balaamoyo mubotu, baseka-seka abantu alimwi bakali kuliyanda kapati Bbaibbele. Nobakayaanya ba Gertrud Ott, bamisyinali mu Manado, North Sulawesi, bakazumina kwiiya Bbaibbele cakutasowa ciindi alimwi bakakatambula kasimpe. Pele bataata, ba Erwin, babelesi bakubbanki ibalemekwa alimwi kumbele ibakaba basicuuno bambunga yamakwebo ya Jakarta Stock Exchange, bakali kubakazya kapati bamaama akaambo kalusyomo lwabo lupya.

Buzuba bumwi bataata bakaambila bamaama kuti basale cintu comwe.

Bakaamba cabukali kuti: “Kosala—cikombelo cako naa mulumaako!”

Bamaama bakatungumana kuyeeya. Mpoonya bakaingula mubuteteete kuti, “Ndiyanda boonse zyobilo—mulumaangu alimwi a Jehova.”

Bataata bakabula cakwaamba, alimwi bukali bwabo mpobwakamanina mpoonya aawo.

Mukuya kwaciindi, bataata bakatalika kubazumizya bamaama kucita nzyobakali kuyanda, nkaambo bakali kubayanda kapati alimwi bakali kuzikkomanina zintu zyamaano nzyobakali kwaamba akucita.

Nokuba boobo, bamaama bakali kuyanda kuti balumi babo babasangane  mubukombi bwakasimpe. Nobakamana kwaapailila camoyo woonse makani aaya, bakaibaluka kuti bataata bakali kuyanda kapati kwiiya myaambo. Aboobo bakatalika kutubikka antangalala tugwalo tulembedwe majwi aamu Bbaibbele aamu Chingisi muŋanda. Bakaambila bataata kuti: “Ndisola kwiiya Chingisi.” Akaambo kakuti bakalizyi kuti bataata bakali kwaamvwa kabotu makani aakubuleya, bakabalomba kuti kababagwasya kwiinduluka makani ngobakajisi mu Cikolo Camulimo Weendelezyegwa a Leza. Bakazumina. Mbwaanga bataata bakali kuyanda kapati kusamausya beenzu, bamaama bakabalomba kuti mulangizi wabbazu akasikile kuŋanda yesu. Bakaamba kuti cili buyo kabotu. Alimwi akaambo kakuti bakalizyi kuti bataata bakali kuuyanda kapati mukwasyi wabo, mubuteteete bamaama bakapa muzeezo wakuti bataata kabatusangana kumiswaangano yacooko. Oobo mbobakali kucita.

Bamaama bakali kukkazika moyo alimwi bakali bapampu cakunga, mukuya kwaciindi moyo wabataata wakabomba. Kumbele, mukwasyi wesu nowakali kukkala ku England, bataata bakali kujanika kumiswaangano alimwi bakaba balongwe baba John Barr, aabo kumbele ibakaba bamu Kabunga Keendelezya ka Bakamboni ba Jehova. Mumwaka ngoonya ooyo, bataata bakabbapatizyigwa, calo icakabakkomanisya kapati bamaama. Mumyaka yakatobela, bataata bakaindila buya kubayanda bamaama.

Bube bwabamaama bwakulilemeka kabotu, kulemeka bamwi alimwi akubikkila maano kapati kuzintu zyakumuuya bwakapa kuti bayandwe kapati abantu boonse ibakabazyi

Beenzuma bamwi bakozyanisya bamaama kuli Lidiya, mukaintu Munakristo wamumwaanda wamyaka wakusaanguna iwakajisi muuya mubotu kapati wakusamausya beenzu. (Mil. 16:14, 15) Pele mebo bunji bwaziindi bamaama inga ndibayeeya kuba mbuli Sara, ooyo calukkomano iwakali kulibombya kumulumaakwe Abrahamu. (1 Pet. 3:4-6) Bamaama bakali bakaintu balilemeka kabotu, bajisi bulemu ibabikkila maano kapati kuzintu zyakumuuya alimwi ibakali kuyandwa kapati abantu boonse ibakabazyi. Cikozyanyo cabo cibotu ncicakabagwasya bataata kuti batambule kasimpe. Kulindime bamaama bakali mwana wa Sara ncobeni.