Ciindi bakwesu bakumutabi nobakazyiba kuti mulimo wesu walesyegwa, cakufwambaana bakabweza ntaamu. Ba Ronald Jacka baamba kuti: “Twakalonzya mapepa aajisi makani aamaseseke, mabbuku, alimwi amali aamutabi akwaatola mumaanda aatakazyibidwe abantu mu Jakarta moonse. Mpoonya twakalonzya ofesi yamutabi akwiitola kubusena bwatakazyibidwe alimwi cakaumuumu twakasambala maanda ngotwakali kubelesya kaali ofesi yamutabi.”

Bunji bwabakwesu bakubusena oobu bakazumanana kuubeleka mulimo cabusungu alimwi cakutayoowa. Bakaliyumya mumasunko mapati aakasololela kukulesyegwa kwamulimo wesu, alimwi bakazumanana kusyoma Jehova. Pele nocakacitika eeci, bakwesu bamwi bakajanika kuti tabalibambilide. Baalu basyoonto bakayoowa alimwi bakasaina mapepa kuzumina kuleka kukambauka. Bamwi bakayubununa mazina aabakwesu bamumbungano. Ofesi yamutabi yakatuma bakwesu basimide kumuuya kuyooyumya mbungano alimwi akugwasya baabo ibakatama. Mukwesu John Booth, umwi wamu Kabunga Keendelezya, awalo wakaswaya cisi ca Indonesia akupa bakwesu lulayo lubotu ndobakali kuyandika kapati.

Cilisalede kuti Jehova, Mweembezi Mupati, wakali kubayumya alimwi akubaumbulizya bantu bakwe. (Ezk. 34:15) Baalu bakatalika kusololela cabusungu muzintu zyakumuuya, alimwi basikumwaya bakajana nzila zipya alimwi zyabupampu zyakukambauka. (Mt. 10:16) Bakwesu banji bakali kuula makkopi aa Bbaibbele lipya ilyakamwaigwa ambunga ya Indonesian Bible Society alo aatakali kudula mpoonya akwaamwaya kubantu ibakajisi luyandisisyo; aboobo cabupampu bakali kubikkilizya amulumbe wa Bwami kufwumbwa nocakali kukonzyeka kucita boobo. Bamwi bakali kugusya peeji lilembedwe makani aajatikizya basikumwaya bamabbuku eesu akwaamwaya kubantu ibakajisi luyandisisyo. Bapainiya banji  bakazumanana kukambauka kabacita mbuli kuti bayaabusambala zintu mumaanda aabantu, mbubonya mbobakali kucita beenzinyina ciindi cisi ca Japan nocakali kweendelezya cisi ca Indonesia.

Ba Margarete aba Norbert Häusler

Mpoonya mu 1977, cibeela camfwulumende citegwa Department of Religious Affairs cakajana nzila imbi yakulwana Bakamboni—cakakaka kusaina mapepa aakubayungizyila ciindi cakukkala mucisi bamisyinali ba Bakamboni ba Jehova. Bamisyinali banji ba Bakamboni bakatumwa kuzisi zimbi. * Bamisyinali bazina lyakuti Norbert Häusler, ibakabeleka antoomwe abakaintu babo ba Margarete mu Manado, North Sulawesi balayeeya ategwa: “Bakwesu abacizyi banji kapati bakaboola abalo kubbuwa lyandeke kuzyootulaya. Twakeenda kuunka kumatantilo aandeke, mpoonya twakaima akucebuka. Maanza  manji kapati akatubbaibbisya, mpoonya twakamvwa majwi aakali kwaambila aantoomwe kuzwa mutala lyamugwagwa kuti: ‘Twalumba. Twalumba kuti mwakaboola kuzyootugwasya.’ Twakanjila mundeke akulila.”

Manyongwe mu Sumba

Makani aajatikizya kulesyegwa kwamulimo wesu naakamvwika munsumbu zyoonse zyamu Indonesia, kabunga kategwa Indonesian Communion of Churches kakaambila bantu bankako kuti bakamwaambe kumfwulumende muntu uuli woonse uucita mulimo wa Bakamboni. Eeci cakapa kuti bakwesu banji baangwe akubuzyigwa-buzyigwa munsumbu zinji.

Mu Waingapu, munsumbu ya Sumba, mupati wabasikalumamba mucilikiti eeco wakaita bakwesu bali 23 kunkambi yabasikalumamba yakooko akubaambila kuti basaine mapepa aamba kuti batama lusyomo lwabo. Ciindi bakwesu nobakakaka kucita boobo, mupati wabasikalumamba wakabaambila kuti bakapiluke kunkambi eeyo buzuba butobela—ikweenda makkilomita aali 14 amaulu kuunka akujoka.

Bakwesu aabo nobakasika kumupati wabasikalumamba mafwumofwumo buzuba bwakatobela, bakali kwiitwa omwe-omwe akwaambilwa kuti basaine mapepa aamba kuti batama lusyomo lwabo. Ikuti mukwesu wakaka kusaina, basikalumamba bakali kumuuma amasanzo aamamvwa. Basikalumamba bakatalika kucita mbuli kuti basondoka buya, akuuma bakwesu cakunga bamwi bakanetuka. Nobakali kucitwa boobo, bakwesu bamwi bakali kulindila ciindi cabo. Mpoonya, mukwesu umwi uucili mwana-mwana wazina lyakuti Mone Kele wakainka kumbele akulemba aapepa. Bakwesu bakatyompwa kapati, pele mupati wabasikalumamba wakanyema kapati. Mone wakalembede kuti, “Ndikanzide kuzumanana kandili umwi wa Bakamboni ba Jehova mane kukabe kutamani!” Bakamuuma kapati Mone akumucisa, cakunga wakatolwa buya kucibbadela, pele cilongwe cakwe a Jehova cakacili ciyumu nta.

Mupati wabasikalumamba wakasoleka kwamazuba aali 11 kuti abatyompye bakwesu akubapa kuleka kusyomeka. Wakabalailila kuti baimikile muzuba lipya ibuzuba boonse.  Wakabasinikizya kuti bakalabe kwamakkilomita manji alimwi akuzuza kuya kulamfwu kabanyamwide zibbudu zilema. Kabeezyeka cipeni cantobolo aamoyo, wakabalailila kuti basalyuute ndembela; pele alimwi bakakaka. Aboobo wakalailila kuti baumwe alimwi.

Buzuba abuzuba mafwumofwumo bakwesu bakali kweenda kabayaabulikwela kuunka kunkambi kabayeeya naa mapenzi nzi aambi aakali kubalindila. Kabali munzila, bakali kupaila antoomwe akukulwaizyanya kuti bazumanane kusyomeka. Alimwi buzuba abuzuba masiku bakali kulikwela kuunka kuŋanda, kabajisi mankwambululwa alimwi kabweenda bulowa, pele bakalikkomene kuti basyomeka kuli Jehova.

Mbobakamvwida buyo makani aakuti bakwesu bakali kupenzyegwa, bakwesu bakuofesi yamutabi, cakufwambaana bakalemba milumbe yaatelegilamu yakutongooka kumupati wabasikalumamba wamu Waingapu, kumupati wabasikalumamba wacooko mu Timor, kumupati wabasikalumamba uulanganya nkamu imwi waku Bali, kumupati wabasikalumamba wiinda boonse wamu Jakarta, alimwi akubalupati-pati bambi ibalemekwa kapati bamumfwulumende. Akaambo kakugunwa kuzyiba kuti makani aamicito yakwe mibi akamwaika mucisi coonse ca Indonesia, mupati wabasikalumamba wamu Waingapu wakaleka kubapenzya bakwesu.

“Bakamboni ba Jehova Bali Mbuli Mpikili”

Mumyaka yakaccilila, Bakamboni banji kapati mucisi ca Indonesia coonse bakaangwa, kubuzyigwa-buzyigwa, alimwi akuumwa. Bamisyinali ba Bill Perrie balayeeya ategwa: “Mubusena bumwi, bakwesu banji bakakululwa menyo aakumbele. Bakwesu nobakali kuyaanya mukwesu iwakajisi menyo aakumbele, mukuseka bakali kubuzya kuti: ‘Sena uli mupya? Naa sena wali kutama lusyomo lwako?’ Nokuba kuti bakasunkwa  kapati, aabo ibakali kupenzyegwa kunyina nobakaleka kukkomana akusungwaala kubelekela Jehova.”

“Kukkala muntolongo kwakandiyiisya kumusyoma ncobeni Jehova, alimwi kwakandipa kuti ndiyume kapati kumuuya”

Ciindi cimwi icakatola myaka iili 13, Bakamboni ibali 93 bakaangwa muntolongo, bamwi kwamyezi yobilo, eelyo bambi kwamyezi yiinda waawo mane buya kusika kumyaka yone. Pele kupenzyegwa munzila iili boobu kwakabayumya kuti bazumanane amakanze aabo aakusyomeka kuli Jehova. Nobakamana kupika ntolongo kwamyezi iili lusele, ba Musa Rade bakaswaya bakwesu mubusena mobakali kukkala akubakulwaizya kuti bazumanane kukambauka. Bakaamba kuti: “Kukkala muntolongo kwakandiyiisya kumusyoma ncobeni Jehova, alimwi kwakandipa kuti ndiyume kapati kumuuya.” Tacigambyi pe kuti bantu bamwi ibakali kubona izyakali kucitika bakaamba kuti: “Bakamboni ba Jehova bali mbuli mpikili. Mwaindila kubapenzya, abalo balaindila kuyuma mbubonya mbuli mpikili mboziindila kunjila mukati mwazumanana kuzigagaila.”

Basikumwaya kabali munzila kuunka kuyookambauka mu Ambon, Maluku

^ par. 1 Ba Peter Vanderhaegen aba Len Davis, ibakali bamisyinali kwaciindi cilamfwu bakalicembeede alimwi ba Marian Tambunan (ibakali ba Marian Stoove musyule) bakakwetwe kumuna Indonesia, aboobo bakazumizyigwa kukkala mucisi ca Indonesia. Boonse aaba botatwe bakazumanana kabali basungu kumuuya alimwi mulimo wabo wakazyala micelo ciindi coonse mulimo wesu nowakakasyidwe.