• NOBAKAZYALWA 1960

  • NOBAKABBAPATIZYIGWA 1987

  • BUUMI BWABO MUBUFWAAFWI Nobakabbapatizyigwa buyo, ba Natela bakabelesya luzyibo lwabo alimwi abantu mbobakazyi mbwaanga bakali basikusambala zintu, ikugwasyilizya mulimo wakupulinta cakusisikizya.

LYAMISWAANGANO yesu kumamanino aamyaka yamuma 1980, sikweendelezya Ciiyo ca Ngazi Yamulindizi alikke nguwakali kuba akkopi yamagazini, alimwi kanji-kanji yakali yakulembwa aamaanza. Ndakabandika aba Genadi Gudadze, umwi wabaalu, akupa muzeezo wakuti tusole kutalika kulipulintila mamagazini eesu.

Kuzikusika aciindi eeci, bakwesu bakali kubelesya muncini uukkopolola uutegwa mimeograph kukkopa mabbuku masyoonto. Kutegwa kabasimba mamagazini lyoonse, bakeelede kuba aamuncini ooyu uuli kabotu, sikutaipa uucibwene, muncini wakusimbila wiitwa kuti typewriter, alimwi abusena kwakujana mapepa aakubelesya lyoonse. Nokuba boobo, zibelesyo zyoonse zyakubelesya mukusimba naaba mapepa, zyakalilembesyedwe kumfwulumende alimwi zyakali kweendelezyegwa munzila yaalubazu kapati.

Ndakajana muncini wiitwa kuti typewriter, kwiinda mukugwasyigwa amweenzuma ngotwakali kubeleka limwi walo iwakali kukonzya kuba amincini eeyi yakasoogwa iyatakacili kweendelezyegwa aamfwulumende. Musyoonto wangu musimbi wakalicizyi kutaipa aboobo wakali kukonzya kutugwasya. Bakwesu bakapanga  muncini mupya wakubelesya kukkopolola uutegwa mimeograph alimwi bakajana busena bwakuula mapepa. Zintu zyoonse zyakatalika kweenda buyo kabotu, aboobo tiilyakalampa magazini yesu yakusaanguna ya Ngazi Yamulindizi yakamwaigwa mumwaambo waci Georgian.

Pele kwakaba buyumuyumu abumbi bupya. Bumwi buzuba, ba Genadi bakandaambila kuti: “Tweelede kujana busena bumbi bwakuula mapepa.” Bakabona mabbokesi aamapepa kuofesi iyakali kweendelezyegwa aamfwulumende pele tiibakali kukonzya kuula balo nkaambo bakali kulangililwa aabamapulisa. Ino twakali kuyakwaawula buti? Cakwiinduluka-induluka ndakaamba kuti: “Tacikonzyeki!” Kumane ba Genadi bakaingula boobu cakusinizya: “Kamuleka kwaamba kuti ‘tacikonzyeki.’ ‘Kuli Leza zintu zyoonse zilakonzyeka’!”—Mt. 19:26.

Ndakazumanana kwaayeeya majwi aaya pele kumwi kandiyoowede ciindi nondakali kuunka kuofesi yamfwulumende buzuba bwakatobela. Jehova wakandisololela kuli sikutaipa iwakali kabotu, iwakalisungwide kwaambila kumupati-pati wabo kulomba kwangu. Alimwi wakali mulumi wakwe! Tiilyakalampa ndakatalika kuula mapepa kuofesi eeyi, alimwi kuzwa buzuba oobo kunyina notwakaba apenzi lyakubula mapepa.