• NOBAKAZYALWA 1976

  • NOBAKABBAPATIZYIGWA 1993

  • BUUMI BWABO MUBUFWAAFWI Bakakomenena mucikombelo ca Georgian Orthodox alimwi bakali kuzitobela kabotu-kabotu njiisyo zyacikombelo eeci. Nobakamana kwiiya kasimpe kamu Bbaibbele, bakabelekela ku Bbeteli antoomwe abalumi babo. Lino balabeleka kabali bapainiya baalubazu.

NDAKAMVWA kujatikizya Bakamboni ciindi cakusaanguna nondakali kukkoleji kudolopo lya Kutaisi. Simukoboma umwi wakandaambila kuti Bakamboni tababelesyi zibumbwa mubukombi bwabo alimwi tabasyomi kuti Jesu ngu Leza Singuzuzyoonse. Njiisyo eezyi tiizyakeendelana anjiisyo nzyondakali kuyanda kapati nzyondakaiya mucikombelo ca Orthodox.

Nondakapiluka kudolopo nkondakali kukkala ku Tsageri, lyacilimo mumwaka wa 1992, ndakazyiba kuti Bakamboni bakaliko amudolopo eeli. Bamaama bakamvwa zintu zibotu zinji kujatikizya Bakamboni. Pele akaambo kakuti mebo ndakacili kubabona munzila iitali kabotu, bamaama bakandaambila kuti: “Koya ukalimvwide nzyobayiisya.”

Bakwesu bobilo bapainiya, ba Pavle aba Paata, lyoonse bakali kuboola kuswaya kuli basimukoboma. Basimukoboma banji  bakali kuunka kuswiilila alimwi akubuzya mibuzyo. Aboobo andime ndakayeeya kuti ndijanike kumibandi eeyi. Ciindi coonse nondakali kubuzya mubuzyo, bakwesu aaba bakali kujalula Bbaibbele akundaambila kuti ndibale. Eeci cakandikkomanisya kapati—ndakalibonena ameso aangu Bbaibbele ncolyaamba!

Tiilyakalampa, ndakasangana kakamu nkobakali kuyiisya Bbaibbele bakwesu aaba. Cilimo icakatobela, notuli 10 twakabbapatizyigwa. Mukuya kwaciindi, abalo bamaama bakaba Bakamboni ba Jehova.

Kulanga musyule, ndilalumba kapati kuti bakwesu bakayiingula mibuzyo yangu yoonse kwiinda mukundipa kuti ndibale bwiinguzi mu Bbaibbele. Eeci cakandigwasya kuti ndileke kukatazyigwa mumizeezo nkaambo ndakabona kuti nzyondakali kusyoma tiizyakaluzi pe. Kuyeeya mbondakagwasyigwa kwiinda mukubala bwiinguzi kuzwa mu Bbaibbele kuligama, andime ndilaibelesya nzila eeyi kugwasya bamwi kutambula kasimpe!