Muli Bwabili, April 11, Banakristo banji batacisungweede bayoojanika ku Ciibalusyo. Bakalitalikide kubalika mukusiyana kuya kubuumi pele bakaleka akaambo katwaambo tusiyene-siyene, tumwi tulabandikwa mubroshuwa yakuti Amupilukile Kuli Jehova. (Heb. 12:1) Nokuba boobo, aabo ibatacisungweede baciyandika kapati kuli Jehova, walo iwakabaula abulowa bwa Mwanaakwe. (Mil. 20:28; 1Pet. 1:18, 19) Ino inga twabagwasya buti kutegwa bapiluke kumbungano?

Baalu bamumbungano balayandisisya kubajana alimwi akubagwasya Banakristo batacisungweede mbubwenya mbuli mweembezi mbwayandaula cakulomya mbelele yazanduka kubutanga. (Lk. 15:4-7) Eeci citondezya Jehova mbwalanganya caluyando. (Jer. 23:3, 4) Toonse, kutali buyo baalu, tulakonzya kubagwasya aabo ibatacisungweede. Kusolekesya kwesu kutondezya luzyalo alweetelelo kulamukkomanisya Jehova alimwi kulakonzya kuleta zilongezyo. (Tus. 19:17; Mil. 20:35) Aboobo, amuyeeye kujatikizya ngomukonzya kukulwaizya, alimwi amucite oobo cakufwambaana!

AMWEEBELELE KAVIDIYO KAKUTI AMUBAKULWAIZYE AABO BATACISUNGWEEDE, MWAMANA AMUBANDIKE MIBUZYO IITOBELA:

  • Ino nintaamu nzi nzyobakabweza ba Abbey ciindi nobakaswaangana a Kamboni ngobatakazyi?

  • Nkaambo nzi ncotweelede kubaambila baalu ikuti katuyanda kugwasya muntu umwi uutacisungweede?

  • Ino ba Abbey bakalibambila buti kutegwa bakabaswaye ba Laura ciindi cabili?

  • Ino ba Abbey bakatondezya buti kukakatila, kukkazika moyo, alimwi aluyando ciindi nobakali kusola kukulwaizya ba Laura?

  • Ncinzi ncotukonzya kwiiya kucikozyanyo ca Jesu icijanika mulugwalo lwa Luka 15:8-10?

  • Ino nzilongezyo nzi izyakajanika akaambo kakusolekesya kugwasya ba Laura?