Tusimpi 3:1-35

  • Amusongwaale akusyoma Jehova (1-12)

    • Amumulemeke Jehova azintu ziyandisi (9)

  • Busongo buletela lukkomano (13-18)

  • Busongo bupa kuliiba (19-26)

  • Kukkala kabotu abantu (27-35)

    • Kucitila bamwi zibotu ikuti kacikonzyeka (27)

3  Mwanaangu, utalubi nzyondikuyiisya,*Alimwi moyo wako ubambe milawo yangu,   Nkaambo ilakuyungizyila mazuba manjiAmyaka yabuumi alimwi aluumuno.+   Luyando lutamani alimwi akusyomeka* zitakusiyi pe.+Kozyaangilila munsingo yako;Kozilemba acilembelo camumoyo wako;+   Aboobo ulakkomaninwa alimwi akuba abupampu bwini-bwiniMumeso aa Leza alimwi aabantu.+   Kosyoma Jehova+ amoyo wako woonse,Utasyomi* maano aako omwini pe.+   Munzila zyako zyoonse kolanga kulinguwe,+Eelyo walo ulalulamika nzila zyako.+   Utabi musongo mumeso aako omwini.+ Koyoowa Jehova akutantamuka cibi.   Ikucita boobo kulaponya mubili* wakoAkukatalusya mafwuwa aako.   Kolemeka Jehova azintu zyako ziyandisi,+Amicelo yakusaanguna* yazisyango zyako zyoonse;*+  10  Eelyo ziyobwedo zyako ziyoozula pamu,+Alimwi waini mupya uyoofwasuka muzikandilo zyako zyamisaansa.  11  Mwanaangu, utakaki lulayo lwa Jehova,+Alimwi utasulaiki kusinsa kwakwe,+  12  Nkaambo Jehova ulabasinsa aabo mbayanda,+Mbubonya usyi mbwacita kumwana ngwakkomanina.+  13  Ulikkomene muntu ooyo uujana busongo+Ayooyo uulijanina bupampu;  14  Kuba ambubo nkubotu kwiinda kuba ampindu yansiliva,Alimwi kuba ampindu yambubo nkubotu kwiinda kuba angolida.+  15  Mbubotu kapati kwiinda mabwe mayandisi aamulwizi;Kunyina cintu nociba comwe ncolombozya icikonzya kweelana ambubo.  16  Mujanza lyambubo lyalulyo muli buumi bulamfwu;Mujanza lyambubo lyalumwensyi muli buvwubi abulemu.  17  Nzila zyambubo zilanoneezya,Alimwi migwagwa yambubo yoonse njaluumuno.+  18  Ncisamu cabuumi kulibaabo babujata,Alimwi aabo bazumanana kubujatisya baambwa kuti balikkomene.+  19  Mubusongo Jehova wakabikka ntalisyo yanyika.+ Wakakkazikizya majulu cabupampu.+  20  Muluzyibo lwakwe maanzi malamfwu akaandaanaAlimwi julu lijisi makumbi manji lyakasunsumuna mume.+  21  Mwanaangu, eezyi* zitazwi pe kumbele aameso aako. Kobambilila busongo bugwasya alimwi akuyeeya kabotu;  22  Ziyookupa buumiAlimwi ziyoosakatizya nsingo yako;  23  Aboobo unakweenda koliibide munzila yako,Alimwi kuulu kwako takukalinontoli pe.*+  24  Ciindi noona tonooyoowi pe;+Unoolyoonena, alimwi ŋonzi zyako zinoononeezya.+  25  Tokayoowi cintu cili coonse ciyoosya ciboola cakutayeeyelwa+Noliba guwo liboolela bantu babi.+  26  Nkaambo Jehova uyooba ngomuntu ngosyoma;+Walo uyoolesya kuulu kwako kuti kutacegwi.+  27  Utawayiwayi kubacitila zibotu aabo mboyelede kucitila boobo*+Ikuti naa kocikonzya* kubagwasya.+  28  Utaambili mweenzinyoko kuti, “Koya; ukaboole alimwi! Juunza ndiyookupa,” Kakuli ulakonzya kumupa lino.  29  Utayeeyi kumucitila cibi mweenzinyoko+Eelyo nakkede anduwe cakuliiba.  30  Utabwesyanyi amuntu aatakwe kaambo+Ikuti naa kunyina cibi ncaakucitila.+  31  Utanyonokeli muntu sinkondo+Nokuba kusala kutobela nzila yakwe iili yoonse,  32  Nkaambo muntu mumpelenge ncisesemyo kuli Jehova,+Pele balulami mbabajisi cilongwe ciyumu anguwe.+  33  Jehova ulaisinganya ŋanda yamuntu mubi,+Pele ŋanda yamululami ulaileleka.+  34  Nkaambo basikusampaula ulabafwubaazya,+Pele babombe myoyo ulabafwida luzyalo.+  35  Basongo bayoopegwa bulemu,Pele bafwubafwuba balemeka cintu cileta masampu.+

Bupanduluzi buyungizyidwe

Naa “mulawo wangu.”
Naa “akasimpe.”
Mu Chihebrayo, “Utayaami.”
Mu Chihebrayo, “mukombo.”
Naa “mibotu kapati.”
Naa “yazintu zyoonse nzyojana.”
Kuboneka kuti caambwa aawa mbube bwa Leza ibwaambwa mutupango twainda.
Naa “takukalinontoli kucintu cili coonse.”
Naa “aabo bayandika kucitilwa boobo.”
Naa “kacili munguzu zyako.”