Milimo 27:1-44

  • Paulo waunka abwato ku Roma (1-12)

  • Guwo lyauma bwato (13-38)

  • Bwato bwanyonyooka (39-44)

27  Lino mbwaanga kwakasalwa kuti twakeelede kuunka ku Italiya+ abwato, basinkuta bakabikka Paulo abaange bambi mumaanza aasilutwe wabasikalumamba uutegwa Juliyo iwamunkamu ya Augusito.  Notwakatanta bwato bwakazwide ku Andramutiyo ibwakali afwaafwi kuunka kuzito zili kunkomwe yacooko ca Asiya, twakatalika lweendo lwesu; twakali antoomwe a Arisitarko+ muna Makedoniya uuzwa ku Tesalonika.  Eelyo buzuba bwakatobela twakasika ku Sidoni, alimwi Juliyo wakafwida Paulo luzyalo, aboobo wakamuzumizya kuunka kuyoobona beenzinyina kutegwa bakamulanganye.  Alimwi kuzwa kooko twakatanta bwato akutalika kweendela munsi aansumbu ya Kupro nkotwakasitilidwe kumuwo iwakali kubbubbula kuzwida nkotwakali kuunka.  Mpoonya twakeenda akati kalwizi kumbali a Kilikiya a Pamfiliya akuyoosika kucito ca Mura ku Lukiya.  Ooko silutwe wabasikalumamba wakajana bwato bwakazwide ku Alekizandiriya ibwakali kuunka ku Italiya, eelyo wakatulailila kuti tutante mumo.  Mpoonya notwakamana kweenda asyoonto-syoonto kwamazuba manji, twakasika ku Kando cakupenga-penga. Mbokunga muwo tiiwakatuzumizya kuzumanana, notwakasika ku Salimone twakeendela munsi aansumbu ya Krete nkotwakasitilidwe kumuwo.  Eelyo notwakeenda cakupenga-penga kumbali aankomwe, twakasika kubusena bwiitwa kuti Zito Zibotu, munsi amunzi wa Laseya.  Kwakaindide ciindi cilamfwu alimwi lino kwakali kulibikka muntenda kweenda mulwizi, nkaambo nociba ciindi cakuliimya kulya kwamu Buzuba Bwakumanya Milandu+ cakaliindide kale, aboobo Paulo wakapa muzeezo 10  kabaambila kuti: “Nobaalumi, ndabona kuti lweendo oolu lulatuletela ntenda alimwi akusweekelwa kupati ikutali buyo kwakatuundu abwato pele abuumi bwesu.” 11  Nokuba boobo, silutwe wabasikalumamba wakamvwida sikweenzya bwato amukamwini bwato muciindi cakutobela nzyaakaamba Paulo. 12  Lino mbwaanga cito eeci tiicakali kabotu kukkala ciindi camupeyo, ibanji bakapa muzeezo wakuzwa aawo, kucita kuti babone naa inga bacikonzya kusika ku Fonika kutegwa mupeyo ukabamanine nkuko. Fonika ncito ca Krete cilangide kunyika lwaajwe alimwi akumusanza lwaajwe. 13  Mpoonya kawo kazwa kumusanza nokakaunga, bakayeeya kuti baazuzikizya makanze aabo, aboobo bakaizyula ngobyo yiimika bwato akutalika kweendela mumbali aankomwe yansumbu ya Krete. 14  Pele nokwakainda ciindi cisyoonto, guwo pati litegwa Urokulo* lyakatalika kubbubbula. 15  Mbwaanga guwo lyakabbubbula bwato canguzu alimwi tiibwakali kukonzya kugama kwakali kuzwida muwo, twakabuleka buyo eelyo twakatonkelwa nkuwakali kuya muwo. 16  Mpoonya twakainda kulubazu lwansumbu imwi nsyoonto iitegwa Kauda nkotwakasitilidwe, pele kato kanungwa musyule lyabwato kakatukatazya kapati kweendelezya. 17  Pele nobakakakwelela mukati, bakatalika kuzambaila bwato antambo, alimwi akaambo kakuyoowa kuti inga bapatila mumusenga wamumbali lyankomwe yacisi ca Libya, bakatebezya ntambo zyasaili aboobo bakapepululwa amuwo. 18  Lino akaambo kakuti twakacili kutonkwa kapati aguwo, buzuba bwakatobela bakatalika kusowa zintu kutegwa bwato buube-ube. 19  Alimwi mubuzuba bwatatu bakazisowa ntambo alimwi azibelesyo zimwi zibelesyegwa kweenzya bwato. 20  Lino mbwaanga zuba anyenyeezi tiizyakali kuboneka kwamazuba manji alimwi iguwo pati lyakacili kubbubbula, bulangizi boonse bwakuti tulafwutuka bwakatalika kumana. 21  Nokwakainda ciindi cilamfwu kabatalyi, Paulo wakaimikila akati kabo akwaamba kuti: “Nobaalumi, masimpe ikuti nomwakautobela muzeezo wangu akutatalika lweendo oolu lwamubwato kuzwa ku Krete, kunyonyookelwa akusweekelwa ooku nokwatacitika.+ 22  Nokuba boobo, lino ndimukulwaizya kuti mukkazike myoyo, nkaambo kunyina akati kanu uutisweekelwe buumi bwakwe, pele bwato bulikke mbobutiinyonyooke. 23  Sunu masiku mungelo+ wa Leza simalelaangu alimwi ngondibelekela mulimo uusetekene walisikide akwiima munsi-munsi andime, 24  kaamba kuti, ‘Utayoowi pe, Paulo. Uleelede kuyakwiima kumbele lya Kaisara,+ alimwi swiilila, Leza wakupa boonse aabo mbomuli limwi mubwato.’ 25  Aboobo amukkazike myoyo, nobaalumi, nkaambo ndilamusyoma Leza kuti kulaba mbubonya mbondaambilwa. 26  Pele tweelede kuyoosowelwa kunkomwe yansumbu imwi.”+ 27  Lino masiku mubuzuba bwa 14 katutonkwa mu Lwizi lwa Adriya, akati kamasiku aayo basikweenzya bwato bakayeeya kuti bakali kuyaabuswena afwaafwi ankomwe imwi. 28  Eelyo bakeeleka bulamfwu bwalwizi kuyaansi akujana kuti bwakali mamita aali 36 ;* aboobo bakazumanana kweenda kasinzo akambi akweeleka lwabili eelyo bakajana kuti bwakali mamita aali 27.* 29  Alimwi akaambo kakuyoowa kuti ambweni inga twauma amabwe, bakafwusa ngobyo ziimika bwato zyone kusyule lyabwato akutalika kulombozya kuti buce. 30  Pele basikweenzya bwato nobakatiisole kutija kuzwa mubwato akuselusya kato mulwizi kabalicengeezya kuti bayanda kulosya ngobyo ziimika bwato kumbele lyabwato, 31  Paulo wakaambila silutwe wabasikalumamba alimwi abasikalumamba kuti: “Ikuti baalumi aaba kabatali mubwato, tamukonzyi kufwutuka pe.”+ 32  Mpoonya basikalumamba bakazikosola ntambo zyakaangilidwe kukato akukaleka kaunka. 33  Lino kabuyanda kuca, Paulo wakabakulwaizya boonse kuti balye cakulya, kaamba kuti: “Kwamazuba aali 14 kusikila sunu, mwalikulangila kamulibilikide alimwi kunyina cakulya cili coonse ncimwalya. 34  Aboobo ndimukulwaizya kuti mulye; eeci ncecilaamugwasye, nkaambo kunyina akati kanu utiisweekelwe nokaba kasusu komwe kamumutwe wakwe.” 35  Naakamana kwaamba boobu, wakabweza cinkwa, walumba Leza kumbele lyabo boonse, wacikomauna akutalika kulya. 36  Aboobo boonse bakakkazika myoyo alimwi abalo bakatalika kulya. 37  Tobantu toonse antoomwe mubwato twakali 276. 38  Nobakalya akukkuta, bakaubya-ubya bwato kwiinda mukusowa wiiti mulwizi.+ 39  Nobwakaca taakwe nobakaizyiba nyika eeyo mpobakabede,+ pele bakabona nkomwe imwi yamusenga, alimwi bakakanzide kuti naa balacikonzya babutole nkuko bwato. 40  Aboobo bakakosola ntambo zyakaangilidwe ngobyo ziimika bwato akuzilekela kuti zinyikile mulwizi, bamane bakatebezya ntambo zyankasi; alimwi saili lyakumbele nobakalikwelela mujulu akulilanzya kwakali kuzwida guwo, bakalulama kunkomwe yamusenga. 41  Lino nobakasika kunkomwe yamusenga iyakali kuumwa amayuwe aalwizi, bwato bwakasimpa mumusenga eelyo cibeela cakumbele cakapatila kacitakonzyeki kuswena, mpoonya mayuwe akatalika kuuma kusyule kwabwato akubukwamauna muzibeela-beela.+ 42  Aciindi aawa basikalumamba bakali kuyanda kuti bajaye baange, kutegwa kutabi naba omwe uusaya* akutija. 43  Pele silutwe wabasikalumamba wakali kuyanda kuti amufwutule Paulo aboobo wakabakasya kuzumanana amakanze aabo. Wakalailila baabo bakali kucikonzya kusaya kuti baliwaale mulwizi, basaangune mbabo kusika mutala, 44  mpoonya boonse batobele, bamwi kwiinda mukubelesya mapulanga abamwi kwiinda mukubelesya zibeela zimwi zyakakwamukide kuzwa kubwato. Aboobo toonse twakasika mutala kabotu-kabotu.+

Bupanduluzi buyungizyidwe

Nkokuti, guwo lyakunyika lwaajwe.
Mu Chigiriki, “maboko aali 20.” Amubone Makani Aayungizyidwe B14.
Mu Chigiriki, “maboko aali 15.” Amubone Makani Aayungizyidwe B14.
Bamwi baamba kuti “kudwaya; kuyamba.”