Milimo 20:1-38

  • Paulo uli ku Makedoniya alimwi aku Girisi (1-6)

  • Yutiko wabusyigwa ku Trowa (7-12)

  • Kuzwa ku Trowa kuunka ku Melito (13-16)

  • Paulo waswaangana abaalu baku Efeso (17-38)

    • Kuyiisya kuŋanda aŋanda (20)

    • “Kupa kulakkomanisya kapati” (35)

20  Lino lupyopyongano nolwakayozya-yozya, Paulo wakatuma mulomo kuti basikwiiya baboole, eelyo naakamana kubayumya-yumya akubalaya, wakatalika lweendo lwakwe kuya ku Makedoniya.  Naakainda muzyooko eezyo akuyumya-yumya basikwiiya bakali mumo amajwi manji, wakasika mu Girisi.  Wakakkala myezi yotatwe ooko, pele wakayeeya kuti apiluke kwiinda ku Makedoniya akaambo kakuti ba Juda+ bakakanzide kumujaya ciindi naakali kuyanda kutanta bwato kuunka ku Siriya.  Wakasindikilwa a Sopatero mwana wa Pulo waku Bereya, Arisitarko+ a Sekundu bana Tesalonika, Gayo waku Derbe a Timoteyo,+ alimwi kuzwa kucooko ca Asiya kwakali Tukiko+ a Turofimo.+  Aaba bakatusolweda alimwi bakali kutulindila ku Trowa;  pele twakatanta bwato kuzwa ku Filipi naakamana mazuba aa Pobwe lya Zinkwa Zitajisi Bumena,+ eelyo mumazuba buyo osanwe twakasika ku Trowa nkobakabede, mpoonya ooko twakakkala mazuba aali ciloba.  Mubuzuba bwakusaanguna bwansondo notwakabungene antoomwe kuti tulye cakulya, Paulo wakatalika kubaambila makani, mbwaanga wakali kuyanda kuunka buzuba butobela; alimwi wakakanana kwaciindi cilamfwu kusikila akati kamasiku.  Aboobo kwakali malambe manji muŋanda yamujulu eeyo motwakabungene antoomwe.  Kakkede awindo, mulombwana umwi uutegwa Yutiko zyakamutola ŋonzi ciindi Paulo naakacili kwaambaula, mpoonya kali muŋonzi wakawa kuzwa muŋanda yatatu yamujulu, eelyo wakabwezyegwa kafwide. 10  Pele Paulo wakaseluka ansi, waakuliwaala alinguwe, wamufwukatila+ akwaamba kuti: “Amuumune, nkaambo muumi.”+ 11  Mpoonya wakapiluka mujulu, wakomauna cinkwa akutalika kulya. Wakazumanana kukanana kwaciindi cilamfwu mane bwaca, mpoonya wakanyamuka akuunka. 12  Aboobo bakamubweza mulombe ooyo kali muumi alimwi bakakkomana citaambiki. 13  Mpoonya twakasolola kuyootanta bwato akuunka ku Aso, nkotwakali kuyanda kuyoobweza Paulo mubwato, nkaambo naakamana kutupa malailile kujatikizya ceeci, walo wakali kuyanda kweenda amaulu kuya kooko. 14  Aboobo naakatujana ku Aso, twakamubweza mubwato akuunka ku Mitilene. 15  Mpoonya nobwakaca twakeenda abwato kuzwa kooko, twaakusika kubusena bulangene a Kiyo, pele buzuba bwakatobela twakaima asyoonto ku Samo, eelyo nobwakaca twakasika ku Melito. 16  Paulo wakakanzide kuti atakaimi ku Efeso,+ kutegwa atakasowi ciindi cili coonse mucooko ca Asiya, nkaambo wakali kubindila kuti, ikuti kacikonzyeka kanooli ku Jerusalemu+ buzuba bwa Pobwe lya Pentekoste. 17  Pele kacili ku Melito wakatuma mulomo ku Efeso ikwiita baalu bambungano. 18  Eelyo nobakasika kulinguwe wakati kulimbabo: “Nyoonse mulizyi kabotu mbondali kucita akati kanu kuzwa mubuzuba bwakusaanguna mbondakasika mucooko ca Asiya,+ 19  kandibelekela Mwami cakulicesya kapati+ amisozi, alimwi amapenzi aakandicitikila akaambo kaba Juda bakandikanzide, 20  alimwi tiindakamusisa, ndakamwaambila zintu zyoonse izigwasya* akumuyiisya mubuleya+ alimwi akuŋanda aŋanda.+ 21  Pele ndakabapa bumboni cakulomya ba Juda aba Giriki kuti beelede kweempwa+ akusandukila kuli Leza alimwi akusyoma Mwami wesu Jesu.+ 22  Lino amubone, munguzu zyamuuya* ndili mulweendo lwakuya ku Jerusalemu, nokuba kuti tandizyi iziyoondicitikila ookuya, 23  nokuba kuti mumunzi amunzi mondiinda muuya uusalala ulainduluka kundaambila kuti ntolongo amapenzi zilandilindila.+ 24  Nokuba boobo, ibuumi bwangu tandibuboni kuti ncintu ciyandika kapati kulindime,* ndiyandisya buyo kuti ndimanizye lweendo lwangu+ amulimo ooyu ngwaakandipa Mwami Jesu, iwakupa bumboni cakulomya kujatikizya makani mabotu aaluzyalo lwa Leza. 25  “Alimwi lino amubone, ndilizyi kuti nywebo nyoonse mbondakakambaukila makani aa Bwami tamukandiboni limbi pe. 26  Aboobo amube bakamboni buzuba obuno kuti ndinyina mulandu wabulowa bwabantu boonse,+ 27  nkaambo tiindakamusisa pe, pele ndakamwaambila zyoonse nzyayanda Leza.*+ 28  Kamulibikkila maano nobeni+ alimwi abutanga boonse, oobo muuya uusalala mbowakamubikka kuba balangizi+ bambubo, kuti mweembele mbungano ya Leza,+ eeyo njaakaula abulowa bwa Mwanaakwe mwini.+ 29  Ndilizyi kuti ndaakuunka baumpe babutambo bayoonjila akati kanu+ alimwi butanga tabakabulanganyi amoyo mutete, 30  alimwi naaba akati kanu nobeni kuyoobuka baalumi ibayooyiisya zintu zipilingene kutegwa balikwelele basikwiiya.+ 31  “Aboobo amupakamane lyoonse, alimwi kamuyeeya kuti kwamyaka yotatwe+ syikati amasiku tiindakaleka kulaya umwi aumwi wanu kumwi kandizwa misozi. 32  Aboobo lino ndamusiya mumaanza aa Leza amujwi lyaluzyalo lwakwe, ijwi eelyo likonzya kumuyaka akumupa lukono oolo ndwapa boonse basalidwe kuba basalali.+ 33  Kunyina nindakanyonokela nsiliva, ingolida naa cisani camuntu pe.+ 34  Nywebo nobeni mulizyi kuti ndakabeleka amaanza aangu aaya kujana nzyondakali kuyandika+ mebo alimwi abaabo mbotwakali limwi. 35  Ndakamutondezya muzintu zyoonse kuti kwiinda mukubeleka canguzu boobu,+ mweelede kubagwasya aabo batajisi nguzu, alimwi lyoonse mweelede kuyeeya majwi aa Mwami Jesu, eelyo lwakwe mwini naakaamba kuti: ‘Kupa kulakkomanisya kapati+ kwiinda kupegwa.’” 36  Lino naakamana kwaamba makani aaya, wakafwugama antoomwe ambabo boonse akupaila. 37  Lino boonse bakalila kapati, alimwi bakamukumbatila Paulo* akumumyonta caluyando, 38  nkaambo bakausa, ikapati kumajwi ngaakaamba aakuti tabakamuboni limbi pe.+ Mpoonya bakamusindikila kuya kubwato.

Bupanduluzi buyungizyidwe

Naa “zyakumugwasya.”
Naa “kwiinda mukweendelezyegwa amuuya.”
Naa “tabukwe mpindu kapati kulindime.”
Naa “makanze oonse aa Leza.”
Mu Chigiriki, “bakawida ansingo ya Paulo.”