Milimo 12:1-25

  • Jakobo wajaigwa; Petro waangwa (1-5)

  • Petro waangununwa camaleele (6-19)

  • Mungelo wajaya Heroda (20-25)

12  Kuciindi nciconya eeco mwami Heroda wakatalika kupenzya basimbungano bamwi.+  Wakajaya Jakobo munyina Johane+ apanga.+  Naakabona kuti cakababotela ba Juda, wakamujata Petro awalo. (Eeci cakacitika kumazuba aa Pobwe lya Zinkwa Zitajisi Bumena.)+  Wakamujata akumubikka muntolongo,+ oomo mwaakali kulindilwa ankamu zyabasikalumamba zyone izyakali kupana bulizyi, inkamu aimwi kaijisi basikalumamba bone, wakali kuyanda kumugusya* kumbele lyabantu lyamana Pobwe Lyakwiindilila.  Aboobo Petro wakali muntolongo, pele mbungano yakali kumupailila kuli Leza camoyo woonse.+  Lino Heroda naakali kuyanda kuti amugusye anze, imasiku aayo Petro wakali koona kaangidwe nketani zyobilo akati kabasikalumamba bobilo, alimwi kumulyango kwakali balindizi ibakali kulindila ntolongo.  Pele amubone, imungelo wa Jehova* wakaima ambali,+ alimwi kwakamweka mumuni mucitolokesi. Mungelo wakajata Petro kumabambo akumubusya ulaamba: “Fwambaana buka!” Mpoonya nketani zyakaloka kumaanza aakwe.+  Mungelo wakamwaambila kuti: “Kobamba kabotu cisani cako,* usame ampato zyako.” Wakacita oobo. Mpoonya mungelo wakamwaambila kuti: “Kosama cisani cako caatala unditobele.”  Eelyo Petro wakazwa anze akumutobela, pele tanaakazyiba kuti ncaakali kucita mungelo cakali cini-cini. Mubwini wakali kuyeeya kuti wakali kubona cilengaano. 10  Nobakainda aakali nkamu yabalindizi yakusaanguna ayabili, bakasika kucijazyo cabutale camulyango uusololela kumunzi, eelyo eeci cakalijalukila cilikke kutegwa bainde. Nobakazwa bakaselemuka munzila imwi, eelyo ndilyonya mungelo wakamusiya. 11  Lino Petro naakazyiba cakali kucitika, wakati: “Lino ndazyiba ncobeni kuti Jehova* watumide mungelo wakwe akundivwuna kumaanza aa Heroda akuzintu zyoonse nzyobali kulangila ba Juda.”+ 12  Naakamana kuyeeya kaambo aaka, wakaunka kuŋanda ya Mariya banyina Johane ooyo uutegwa Marko,+ ooko kwakabungene bantu banji kabapaila. 13  Naakakonkomona acijazyo camulyango waanze, musimbi mubelesi uutegwa Roda wakamvwa akuunka kumulyango. 14  Eelyo naakalizyiba jwi lya Petro, wakakondwa kapati cakuti tanaakajalula mulyango, pele wakabalikila muŋanda akuyakwaamba kuti Petro wakaliimvwi kumulyango. 15  Bakati kulinguwe: “Wasondoka yebo.” Pele wakazumanana kwaamba cakusinizya kuti akali masimpe. Bakatalika kwaamba kuti: “Nkokuti mungelo wakwe.” 16  Pele Petro wakazumanana kukonkomona. Nobakajalula kumulyango, bakamubona eelyo bakagambwa kapati. 17  Pele wakatambika janza lyakwe kuti baumune, mpoonya wakabapandulwida Jehova* mbwaakamugusya muntolongo, kumane wakati: “Zintu eezyi mwaambile Jakobo+ abakwesu.” Mpoonya wakazwa akuunka kubusena bumbi. 18  Lino nobwakaca basikalumamba bakanyongana kapati kujatikizya nkwaakaunka Petro. 19  Heroda wakamuyandaula koonse-koonse, naatakamujana wakababuzisisya balindizi akulailila kuti batolwe kuyoosubulwa;+ mpoonya wakazwa ku Judaya akuselemukila ku Kaisareya nkwaakaakukkala kwaciindi cili mbocibede. 20  Lino Heroda wakalinyemede kapati kujatikizya* bantu baku Turo aku Sidoni. Aboobo kabajisi muzeezo omwe bakaboola kulinguwe, eelyo nobakamana kukombelezya Blasito, imubanzi mupati wamuŋanda yamwami, bakatalika kulomba kuti babe muluumuno anguwe nkaambo cisi cabo cakali kujana cakulya kucisi camwami. 21  Mubuzuba bumwi bwaalubazu, Heroda wakasama cisani cakwe cabwami akukkala acuuno calubeta, mpoonya wakatalika kukanana kulimbabo. 22  Mpoonya bantu ibakabungene bakatalika koompolola kuti: “Ndijwi lyaleza, talili lyamuntu pe!” 23  Ndilyonya eelyo mungelo wa Jehova* wakamuuma nkaambo tanaakapa bulemu kuli Leza, mpoonya wakaligwa mvwunyu eelyo wakafwa. 24  Lyalo ijwi lya Jehova* lyakazumanana kuyaambele akumwaika.+ 25  Pele Barnaba+ a Saulo nobakamanizya kucita mulimo woonse wakupa lugwasyo mu Jerusalemu,+ bakapiluka alimwi bakatolelezya Johane+ uutegwa Marko.

Bupanduluzi buyungizyidwe

Naa “kumuleta kuti abetekwe.”
Naa “Kolibambila.”
Naa “wakalibakanzide kapati.”