Matayo 5:1-48

  • MULUMBE WAACILUNDU (1-48)

    • Jesu watalika kuyiisya kali aacilundu (1, 2)

    • Nzila zili fwuka zileta lukkomano (3-12)

    • Munyo amumuni (13-16)

    • Jesu ulazuzikizya Mulawo (17-20)

    • Lulayo kujatikizya bukali (21-26), bumambe (27-30), kulekana (31, 32), zikonke (33-37), kujolela cibi (38-42), kuyanda basinkondoma (43-48)

5  Naakabona makamu aabantu, wakatanta aacilundu; eelyo naakakkala ansi, basikwiiya bakwe bakaboola kulinguwe.  Mpoonya wakatalika kwaambaula akubayiisya kuti:  “Balikkomene aabo bazyi kuti bayandika kusololelwa a Leza,*+ nkaambo Bwami bwakujulu mbubwabo.  “Balikkomene aabo balila, nkaambo bayakuumbulizyigwa.+  “Balikkomene babombe myoyo,+ nkaambo bayookona nyika.+  “Balikkomene aabo bafwa nzala anyota+ yabululami, nkaambo bayookkuta.+  “Balikkomene aabo balaaluse,+ nkaambo bayoofwidwa luse.  “Balikkomene aabo basalala mumoyo,+ nkaambo bayoomubona Leza.  “Balikkomene aabo baleta luumuno,+ nkaambo bayooitwa kuti mbana ba Leza. 10  “Balikkomene aabo bapenzyegwa akaambo kabululami,+ nkaambo Bwami bwakujulu mbubwabo. 11  “Mulikkomene nywebo ciindi bantu nobamusampaula+ akumupenzya+ akumubejelezya zintu zibi ziindene-indene akaambo kandime.+ 12  Amukondwe akusekelela,+ mbwaanga bulumbu bwanu+ mbupati kujulu, nkaambo mbubonya oobo mbubakabapenzya basinsimi ibakamusaangunina.+ 13  “Muli munyo+ wanyika, pele ikuti munyo wasampuka, ino mbuti mboukonzya kutalika kulula alimwi? Tuucikonzyi kubelesyegwa mulimo uuli woonse pele ngwakusowa buyo anze+ kuti ulyataukwe abantu. 14  “Muli mumuni wanyika.+ Munzi tuukonzyi kusiswa kuti kauli acilundu. 15  Bantu tabayasyi lambe akulivwumba cisuwo,* pele balalibikka acibikkilo calyo alimwi lilabamunikila boonse bali muŋanda.+ 16  Mbubonya oobo, aumunike mumuni wanu kubantu+ kutegwa babone milimo yanu mibotu+ akupa bulemu kuli Uso uuli kujulu.+ 17  “Mutayeeyi kuti ndakaboolela kujaya Mulawo naa eezyo izyakalembwa a Basinsimi. Tiindakaboolela kujaya pe, pele kuzuzikizya.+ 18  Ncobeni ndimwaambila kuti, ncuuba-uba julu anyika kumana kwiinda kuti kabeela komwe kakabala kazwe ku Mulawo, kusikila mane zintu zyoonse eezyi zikacitike.+ 19  Aboobo kufwumbwa uutyola nouba omwe wamilawo miniini eeyi akuyiisya bambi kucita oobo, takeeleli pe mu Bwami bwakujulu. Pele kufwumbwa uutobela akuyiisya milawo eeyi, uyakweelela mu Bwami bwakujulu. 20  Nkaambo ndimwaambila kuti, ikuti kamutaluleme kwiinda balembi aba Farisi,+ kunyina nomuyoonjila mu Bwami bwakujulu.+ 21  “Mwakamvwa kuti bantu bakaindi bakaambilwa kuti: ‘Utajayi,+ pele kufwumbwa uujaya muntu uyoopegwa mulandu kunkuta.’+ 22  Pele ndimwaambila kuti kufwumbwa uuzumanana kukalala+ akaambo kamunyina uyoopegwa mulandu kunkuta; alimwi kufwumbwa waambila munyina majwi aakusampaula uyoobetekwa ku Nkuta Mpati; pele ooyo waamba kuti, ‘Yebo ociyanga!’ uyooba amulandu wamu Gehena* muyaka mulilo.+ 23  “Lino ikuti uleta cipego cako kucipaililo+ kumane noli kooko wayeeya kuti munyoko ulaakaambo anduwe, 24  siya cipego cako aawo kumbele lyacipaililo, uunke. Usaangune kumvwana amunyoko, mpoonya upiluke akutuula cipego cako.+ 25  “Kofwambaana kubamba twaambo ayooyo uukupa mulandu nocili anguwe munzila kuya kunkuta, kuti ndiza sikukupa mulandu atakutoli kumubetesi, awalo mubetesi atakutoli kuli kapaso walo uuyookuwaala muntolongo.+ 26  Masimpe ndikwaambila kuti, ncobeni kunyina noyoozwa oomo kusikila ukabbadele kakkobili kamamanino.* 27  “Mwakamvwa kuti kwakaambwa kuti: ‘Utaciti bumambe.’+ 28  Pele ndimwaambila kuti kufwumbwa muntu uulangisisya mukaintu+ cakumunyomenena, wacita kale bumambe anguwe mumoyo wakwe.+ 29  Lino ikuti liso lyako lyalulyo kalikulebya, kolinonkola akulisowa.+ Nkaambo inga cainda kubota kulinduwe kuti wasweekelwa cizo comwe kwiinda kuti mubili wako woonse ukasowelwe mu Gehena.*+ 30  Alimwi ikuti janza lyako lyalulyo kalikulebya, kolikosola akulisowa.+ Nkaambo inga cainda kubota kulinduwe kuti wasweekelwa cizo comwe kwiinda kuti mubili wako woonse ukasowelwe mu Gehena.*+ 31  “Alimwi, kwakaambwa kuti: ‘Kufwumbwa uuleka mukaintu wakwe, aamupe lugwalo lwakumuleka.’+ 32  Pele ndimwaambila kuti kufwumbwa uuleka mukaintu wakwe ikutali akaambo kabwaamu,* umubikka muntenda yakucita bumambe alimwi kufwumbwa uukwata mukaintu wakalekwa wacita bumambe.+ 33  “Alimwi mwakamvwa kuti bantu bakaindi bakaambilwa kuti: ‘Utakonki kakunyina kuzuzikizya,+ pele weelede kuzuzikizya zikonke zyako kuli Jehova.’*+ 34  Pele ndimwaambila kuti: Mutakonkezyi naaceya+ nokuba kujulu, nkaambo ncecuuno ca Leza; 35  naa kukonkezya kunyika, nkaambo ncecilyatilo camaulu aakwe;+ naa kukonkezya Jerusalemu, nkaambo munzi wa Mwami mupati.+ 36  Mutakonkezyi mutwe wanu, nkaambo tamukonzyi kusandula kasusu komwe kuti katube naa kasiye. 37  Pele kwaamba kwanu kuti ‘Inzya’ akube inzya, akuti ‘Peepe’ akube peepe,+ nkaambo aayindilila aali yaaya azwa kumubi.+ 38  “Mwakamvwa kuti kwakaambwa kuti: ‘Liso kuliso alino kulino.’+ 39  Pele ndimwaambila kuti: Utamulwani muntu mubi, pele kufwumbwa ooyo uukuuma lubayi kusaya lyalulyo, komupa asaya limbi.+ 40  Alimwi kuti muntu kayanda kukutola kunkuta kutegwa abweze cisani cako camukati, komuleka kuti acibweze acalo cisani cako caatala;+ 41  alimwi kuti muntu uuli mubweendelezi wakusinikizya kweenda anguwe kkilomita lyomwe, weende anguwe makkilomita obilo. 42  Komupa ooyo uukulomba alimwi utamwiimi ooyo uuyanda kuti umukweletesye.*+ 43  “Mwakamvwa kuti kwakaambwa kuti: ‘Weelede kuyanda simukobonyoko+ akusulaika sinkondonyoko.’ 44  Pele ndimwaambila kuti: Amuzumanane kuyanda basinkondonyoko+ akubapailila aabo bamupenzya,+ 45  ikutegwa musinizye kuti muli bana ba Uso uuli kujulu,+ nkaambo ulapasuzya zuba lyakwe kubantu babi ababotu alimwi ulapa mvwula kubantu baluleme abataluleme.+ 46  Nkaambo ikuti kamuyanda buyo baabo ibamuyanda, ino mbulumbu nzi mbomujana?+ Sena basimutelo abalo tabusyi mbobacita oobo? 47  Alimwi ikuti kamwaanzya buyo ibanabokwanu, ncinzi ncomucita kwiinda bamwi? Sena bantu bamasi abalo tabusyi mbobacita oobo? 48  Aboobo mweelede kulondoka* mbuli Uso wakujulu mbwalondokede.+

Bupanduluzi buyungizyidwe

Naa “aabo balombelela muuya.” Mu Chigiriki, “bacete kumuuya.”
Naa “cisuwo cakupimina.”
Busena bwakuumpila zifwuse ibwakali kunze lyamunzi wa Jerusalemu. Amubone Bupanduluzi Bwamabala.
Mu Chigiriki, “kakkwadirani kamamanino.” Amubone Makani Aayungizyidwe B14.
Naa “koonana ikutali kwamumulawo.” Mu Chigiriki, por·neiʹa. Amubone Bupanduluzi Bwamabala.
Nkokuti, kukweleta kakunyina kubbadela cinyonamucila.
Naa “kumaninina.”