Matayo 17:1-27

  • Jesu wasanduka (1-13)

  • Lusyomo luli mbuli nseke yamusitada (14-21)

  • Lufwu lwa Jesu lwasinsimwa alimwi (22, 23)

  • Mutelo watelwa kubelesya mali aazwa mukanwa lyanswi (24-27)

17  Nokwakainda mazuba aali cisambomwe, Jesu wakabweza Petro, Jakobo alimwi a Johane imunyina akubatola atala aacilundu cilamfwu kabali balikke.+  Mpoonya wakasanduka kabalangilila; busyu bwakwe bwakabala mbuli zuba azisani zyakwe zyaatala zyakatalika kumweka* mbuli mumuni.+  Mpoonya bakabona Musa a Elija kababandika anguwe.  Mpoonya Petro wakaambila Jesu kuti: “Mwami, ncibotu kuti tukkale aano. Ikuti koyanda, ndilabikka aano matente otatwe, lyako, lya Musa alya Elija.”  Naakacili kwaambaula, ikkumbi limweka lyakabavwumbilila mpoonya mukkumbi mwakamvwugwa jwi ilyakati: “Ooyu Mwanaangu ngweyandisya, ooyo ngwekkomanina.+ Amumuswiilile.”+  Nobakamvwa boobo, basikwiiya bakavwundama ansi alimwi bakayoowa kapati.  Mpoonya Jesu wakaboola afwaafwi akubajata akwaamba kuti: “Amunyamuke. Mutayoowi pe.”  Nobakalanga, kunyina umbi ngobakabona kunze lya Jesu.  Eelyo nobakali kuseluka acilundu, Jesu wakabalailila kuti: “Mutaambili muntu naba omwe cilengaano eeci kusikila Mwanaamuntu akabusyigwe kubafwu.”+ 10  Pele basikwiiya bakamubuzya kuti: “Aboobo, ino nkaambo nzi balembi ncobaamba kuti Elija uleelede kusaanguna kuboola?”+ 11  Wakaingula kuti: “Masimpe, Elija ulaboola alimwi uyoobambulula zintu zyoonse.+ 12  Nokuba boobo ndimwaambila kuti Elija wakaboola kale, alimwi tiibakamuzyiba, pele bakamucita kufwumbwa ncibakali kuyanda.+ Mbubonya oobo awalo Mwanaamuntu mbobayoomupenzya.”+ 13  Mpoonya basikwiiya bakazyiba kuti wakali kubaambila zya Johane Mubbapatizi. 14  Lino nobakasika afwaafwi ankamu yabantu,+ mwaalumi umwi wakaboola kulinguwe akumufwugamina akwaamba kuti: 15  “Mwami, komufwida luzyalo mwanaangu, nkaambo ngusikasuntu alimwi ulaciswa. Ziindi zinji uwida mumulilo amumaanzi.+ 16  Ndamuletede kuli basikwiiya bako, pele baalilwa kumuponya.” 17  Lino Jesu wakati: “Nywebo nozyalani linyina lusyomo alimwi nobasicinguni,+ ino ndilakkala andinywe kwaciindi cilamfwu buti? Ino ndimukkazikile moyo kwaciindi cilamfwu buti? Amumulete kuno kulindime.” 18  Lino Jesu wakalikalalila daimona, eelyo lyakazwa mulinguwe, aboobo mulombe ooyo wakapona kuzwa ciindi eeco.+ 19  Mpoonya basikwiiya bakaboola kuli Jesu kumbali akumubuzya kuti: “Ino nkaambo nzi swebo ncotwaalilwa kulitanda?” 20  Wakabaingula kuti: “Nkaambo kakuceya kwalusyomo lwanu. Nkaambo ncobeni ndimwaambila kuti, ikuti kamujisi lusyomo luli mbuli inseke yamusitada, muyakwaambila mulundu ooyu kuti, ‘Kozwa aawa uunke waalya,’ eelyo uyoozwa, alimwi taakwe ciyakumwaalila nywebo pe.”+ 21  * 22  Cakali ciindi nobakabungene antoomwe mu Galilaya Jesu naakabaambila kuti: “Mwanaamuntu uyakwaabwa mumaanza aabantu,+ 23  eelyo bayoomujaya, mpoonya mubuzuba bwatatu, uyoobusyigwa.”+ Aboobo bakausa kapati. 24  Lino nobakasika ku Kapernauma, baalumi basikutelesya mali aatempele* bakaboola kuli Petro akwaamba kuti: “Sena mwiiyi wanu tateli mali aatempele?”+ 25  Wakaingula kuti: “Ulatela.” Pele naakanjila muŋanda, Jesu wakasaanguna kumubuzya ulaamba: “Simoni, uyeeya buti? Ino nkuuli bani bami baansi nkobabweza mali aabulumbu naa mutelo? Sena nkuzwa kubana babo naa nkuubeenzu?” 26  Naakaamba kuti: “Nkuubeenzu,” Jesu wakamwaambila kuti: “Ncobeni bana babo tabeelede kutela. 27  Pele kutegwa tutabatyompyi,+ koya kulwizi, ukawaale kalobyo akubweza nswi itiisaangune kujatwa, mpoonya wayaasamuna ulajana kkobili lyansiliva.* Ulibweze akutela mutelo wako awangu.”

Bupanduluzi buyungizyidwe

Naa “zyakatuba buu.”
Mu Chigiriki, “madirakima obilo.” Amubone Makani Aayungizyidwe B14.
Mu Chigiriki, “kakkobili kakusaanguna,” ikayeeyelwa kuti nkatetiradirakima. Amubone Makani Aayungizyidwe B14.