Luka 6:1-49

  • Jesu, “Mwami wa Sabata” (1-5)

  • Mwaalumi uupuutide janza waponesyegwa (6-11)

  • Baapostolo bali 12 (12-16)

  • Jesu wayiisya alimwi akuponya (17-19)

  • Lukkomano alimwi amause (20-26)

  • Kuyanda basinkondonyoko (27-36)

  • Amuleke kubeteka (37-42)

  • Cisamu cilazyibwa kumicelo yancico (43-45)

  • Ŋanda iiyakidwe kabotu; ŋanda iitajisi ntalisyo njumu (46-49)

6  Lino musabata wakali kwiinda mumyuunda yamaila, eelyo basikwiiya bakwe bakali kupulula myaangala yamaila,+ kwiipuka mumaanza akulya maila.+  Babone boobu, ba Farisi bamwi bakati: “Nkaambo nzi ncomucita cintu citazumizyidwe mu Sabata?”+  Pele Jesu mukwiingula wakababuzya kuti: “Sena taakwe buzuba nomwakabala ncaakacita Davida ciindi walo abaalumi mbaakali limwi nobakafwa nzala?+  Sena tanaakanjila muŋanda ya Leza akutambula zinkwa zyacituuzyo* akuzilya alimwi zimwi wakazipa baalumi mbaakali limwi, zyalo ziteelede kuligwa amuntu uuli woonse ccita buyo bapaizi balikke?”+  Mpoonya wakabaambila kuti: “Mwanaamuntu Mwami wa Sabata.”+  Mubuzuba bumwi bwasabata+ wakanjila mucikombelo akutalika kuyiisya. Eelyo oomo mwakali mwaalumi umwi wakapuutide* janza lyalulyo.+  Lino balembi aba Farisi bakali kumulangisisya Jesu kuti babone naa ulamuponya mu Sabata ikutegwa bajane nzila yakuti bamupe mulandu.  Pele walo wakalizyi nzyobakali kuyeeya,+ aboobo wakaambila mwaalumi ooyo uupuutide* janza kuti: “Nyamuka uzikwiimine akati.” Eelyo wakanyamuka akwiimina waawo mpaakaambilwa.  Mpoonya Jesu wakabaambila kuti: “Andimubuzye boobu nywebo nobaalumi, Ncinzi cizumizyidwe kucita mu Sabata, sena nkucita cintu cibotu naa cibi, ikufwutula buumi naa kujaya?”+ 10  Amane kubalanga boonse, wakaambila mwaalumi ooyo kuti: “Kovwungulula janza lyako.” Wakacita oobo, eelyo janza lyakwe lyakaba kabotu. 11  Pele bakakalala kapati, eelyo bakatalika kulivwiya-vwiya kujatikizya ncobakeelede kumucita Jesu. 12  Buzuba bumwi mumazuba aaya ngoonya, wakaunka kucilundu kuyoopaila,+ alimwi wakapaila kuli Leza busiku boonse.+ 13  Mpoonya nobwakaca, wakaita basikwiiya bakwe akusala akati kabo bali 12, aabo alimwi mbaakaita kuti baapostolo:+ 14  Simoni ooyo alimwi ngwaakapa zina lyakuti Petro, Andreya imunyina, Jakobo, Johane, Filipo,+ Bartolomayo, 15  Matayo, Tomasi,+ Jakobo mwana wa Alifayo, Simoni walo uutegwa “musungu,” 16  Judasi mwana wa Jakobo, alimwi a Judasi Isikariote, ooyo iwakamwaaba. 17  Mpoonya wakaselemuka ambabo akwiima abusena buyalene, eelyo kwakali nkamu mpati yabasikwiiya bakwe, amakamu-makamu aabantu bazwa mu Judaya a Jerusalemu akucooko cili kumbali aalwizi ca Turo a Sidoni, ibakaboola kumuswiilila alimwi akuponesyegwa malwazi aakabajisi. 18  Nobaba baabo ibakali kupenzyegwa amyuuya iisofweede bakaponesyegwa. 19  Alimwi bantu boonse munkamu bakali kuyanda kumuguma, nkaambo nobakali kucita boobo nguzu zyakali kuzwa mulinguwe+ akubaponya boonse munzila yamaleele. 20  Eelyo wakalanga basikwiiya bakwe akutalika kwaamba kuti: “Mulikkomene nywebo nobacete, nkaambo Bwami bwa Leza mbubwanu.+ 21  “Mulikkomene nywebo nomufwa nzala lino, nkaambo muyookkuta.+ “Mulikkomene nywebo nomulila lino, nkaambo muyooseka.+ 22  “Mulikkomene nywebo kufwumbwa leelyo bantu nobamusula,+ nobamutanda akati kabo,+ nobamusampaula akumwaamba* kuti muli babi akaambo ka Mwanaamuntu. 23  Amukakondwe akusekelela mubuzuba oobo, nkaambo amubone! Bulumbu bwanu mbupati kujulu, nkaambo eezyo nzyezintu bamausyi nzibakali kucita kubasinsimi.+ 24  “Pele maawe kulindinywe nobavwubi,+ nkaambo mubutambwida limwi bulumbu bwanu bukkwene.+ 25  “Maawe kulindinywe nomukkutide lino, nkaambo muyoofwa nzala. “Maawe, nywebo nomusekelela lino, nkaambo muyoolila akoomoka.+ 26  “Maawe kufwumbwa leelyo bantu boonse nobamulumbaizya,+ nkaambo oobu mbombubo mbobakacita bamausyi kubasinsimi bakubeja. 27  “Pele nywebo nomuswiilila ndimwaambila kuti: Amuzumanane kuyanda basinkondonyoko, kucita zibotu kulibaabo bamusulide,+ 28  kubaleleka aabo bamusinganya akubapailila aabo bamutukila.+ 29  Ooyo uukuuma lubayi kusaya limwi, komupa alimbi; ayooyo uukunyanga cisani caatala, utamukasyi acisani camukati.+ 30  Komupa kufwumbwa uukulomba,+ ayooyo uubweza zintu zyako utamusesi. 31  “Alimwi mbubonya mbomuyanda kuti bantu bamucitile, andinywe amubacitile mbubonya.+ 32  “Ikuti kamuyanda buyo baabo ibamuyanda, ino mbubotu nzi mbomujana? Nkaambo abalo basizibi balabayanda aabo babayanda.+ 33  Alimwi ikuti mwacita zibotu kuli baabo bamucitila zibotu, ino mbubotu nzi mbomujana? Abalo basizibi balacita mbubonya oobo. 34  Ikuti kamukweletesya* baabo mbomusyoma kuti bayoomujolela, ino mbubotu nzi mbomujana?+ Nobaba basizibi balakweletesya basizibi kutegwa bakatambule mbubonya. 35  Muciindi caboobo, amuzumanane kubayanda basinkondonyoko akucita zibotu akukweletesya kakunyina kulangila kujolelwa cili coonse;+ eelyo bulumbu bwanu buyooba bupati alimwi muyooba bana ba Mupatikampatila, nkaambo ngusiluzyalo kubantu batalumbi ababi.+ 36  Amube aluse lyoonse mbubonya Uso mbwali aluse.+ 37  “Alimwi amuleke kubeteka, eelyo andinywe tamukabetekwi;+ amuleke kupa bamwi mulandu, eelyo andinywe tamukapegwi mulandu. Amuzumanane kulekelela* bamwi zibi zyabo eelyo andinywe muyoolekelelwa* zibi zyanu.+ 38  Amube baabi, abalo bantu bayoomwaabila.+ Bayoomutilila munkomwe zyanu zyaacamba ceelelo cibotu cisindaidwe, cuumidwe-umidwe alimwi cizwide pamu. Nkaambo cipimyo ncomubelesya kupimina bamwi, ncobayoobelesya kumupimina andinywe.” 39  Mpoonya wakabaambila cikozyanyo kati: “Sena moofwu ulakonzya kusololela moofwunyina? Sena boonse bobilo tabakoowida mumulindi?+ 40  Sicikolo* taindi mwiiyi wakwe, pele kufwumbwa uuyiisyigwa kabotu uyooba mbuli mwiiyi wakwe. 41  Aboobo, ino nkaambo nzi ncolanga kakwa kali muliso lyamunyoko pele toboni tanda lili muliso lyako?+ 42  Ino mbuti mbonga waambila munyoko kuti, ‘Mukwesu, atubone ndikugusye kakwa kali muliso lyako,’ kakuli yebo omwini tolibwene tanda lili muliso lyako? Osikuupaupa ameso! Kosaanguna kugusya tanda muliso lyako, mpoonya ulabona kabotu mbonga wagusya kakwa kali muliso lyamunyoko. 43  “Nkaambo kunyina cisamu cibotu cizyala micelo iibolede, alimwi kunyina cisamu cibolede cizyala micelo mibotu.+ 44  Nkaambo cisamu cili coonse cilazyibwa kumicelo yancico.+ Mucikozyanyo, bantu tabaceli nkuyu kucisamu camamvwa pe, nokuba kucela misaansa kucitewo camamvwa. 45  Muntu mubotu ulagusya zintu zibotu ziyobwedwe mumoyo wakwe, pele muntu mubi ulagusya zintu zibi ziyobwedwe mumoyo wakwe mubi; nkaambo mulomo waamba zintu zizwide mumoyo.+ 46  “Ino mundiitila nzi kuti ‘Mwami! Mwami!’ pele tamuciti zintu nzyondaamba?+ 47  Umwi aumwi uuboola kulindime akuswiilila majwi aangu akwaacita, ndilamutondezya mbwabede:+ 48  Uli mbuli muntu ooyo naakali kuyaka ŋanda iwakasya mulindi mulamfwu akuyaka ntalisyo amwala. Lino mulonga nowakazula, maanzi akapaya akuuma kuŋanda eeyo, pele tanaakakonzya kwiizungaanya nkaambo yakayakidwe kabotu.+ 49  Pele ooyo uuswiilila buyo pele kataciti cili coonse,+ uli mbuli muntu wakayaka ŋanda kakunyina ntalisyo. Maanzi akauma kuŋanda eeyo, mpoonya yakawa, eelyo yakanyonyooka kapati.”

Bupanduluzi buyungizyidwe

Naa “zinkwa zyacitondezyo.”
Naa “wakalebukide.”
Naa “uulebukide.”
Naa “akumutamikizya.”
Nkokuti, kakunyina kubbadela cinyonamucila.
Naa “kwaangununa.”
Naa “muyakwaangununwa.”
Naa “Sikwiiya.”