Luka 4:1-44

  • Diabolosi wasunka Jesu (1-13)

  • Jesu watalika kukambauka mu Galilaya (14, 15)

  • Jesu wakakwa mu Nazareta (16-30)

  • Mucikombelo ku Kapernauma (31-37)

  • Banyinazyala Simoni antoomwe abamwi baponesyegwa (38-41)

  • Makamu aabantu amujana Jesu kali alikke (42-44)

4  Mpoonya Jesu kazwide muuya uusalala wakazwa ku Jordano, eelyo wakasololelwa amuuya munkanda+  kwamazuba aali 40 kasunkwa a Diabolosi.+ Alimwi kwamazuba aayo kunyina ncaakalya, aboobo naakamana mazuba aayo wakafwa nzala.  Aboobo Diabolosi wakamwaambila kuti: “Ikuti naa uli mwana wa Leza, ambila bbwe eeli kuti libe cinkwa.”  Pele Jesu wakamwiingula kuti: “Kulilembedwe kuti, ‘Muntu teelede kuponena acinkwa cilikke pe.’”+  Eelyo wakamutola atala aacilundu akumutondezya mami oonse aamunyika mukaindi kaniini buyo.+  Mpoonya Diabolosi wakati kulinguwe: “Ndilakupa bweendelezi boonse oobu abulemu bwambubo, nkaambo ndakapegwa mbubo,+ alimwi kufwumbwa ngwendiyanda kupa mbubo, ndilamupa.  Aboobo ikuti undikombe ciindi comwe buyo, boonse bulaba bwako.”  Mukumwiingula Jesu wakamwaambila kuti: “Kulilembedwe kuti, ‘Ngu Jehova* Leza wako ngoelede kukomba, alimwi ngonguwe alikke ngoelede kubelekela mulimo uusetekene.’”+  Kumane wakamutola ku Jerusalemu waakumwiimika atala aabwaanda bwaatala* lyatempele akumwaambila kuti: “Ikuti naa uli mwana wa Leza, koliwaala ansi kuzwa waano,+ 10  nkaambo kulilembedwe kuti, ‘Uyoolailila bangelo bakwe kujatikizya nduwe, kuti bakukwabilile,’ 11  alimwi ‘Bayookutemba amaanza aabo, kutegwa utakalinontoli abbwe.’”+ 12  Mukumwiingula Jesu wakamwaambila kuti: “Kwaambidwe kuti, ‘Utasunki Jehova* Leza wako.’”+ 13  Aboobo Diabolosi naakamanizya masunko aakwe oonse, wakamuleka kusikila aciindi cimbi ceelede.+ 14  Lino Jesu munguzu zyamuuya wakapiluka ku Galilaya.+ Eelyo mpuwo yakwe mbotu yakamwaika mucisi coonse. 15  Wakatalika kuyiisya muzikombelo zyabo, alimwi wakalemekwa abantu boonse. 16  Mpoonya wakaunka ku Nazareta+ nkwaakakomenena, alimwi kweelana acilengwa cakwe mubuzuba bwa Sabata, wakanjila mucikombelo+ mpoonya wakanyamuka kutegwa abale. 17  Aboobo wakapegwa bbuku lyamusinsimi Isaya, eelyo wakalivwungulula akujana aakalembedwe kuti: 18  “Muuya wa Jehova* ulaalindime, nkaambo wakandinanika kuti ndaambile bacete makani mabotu. Wakandituma kuti ndaambilizye kwaangununwa kubaange akupona kuboofwu, ikwaangununa badyaaminidwe,+ 19  kukambauka mwaka mubotu wa Jehova.”*+ 20  Eelyo wakalivwunga bbuku, walipilusya kumugwasyi, akukkala ansi; lino boonse ibakali mucikombelo bakamulangisisya. 21  Mpoonya wakatalika kubaambila kuti: “Sunu oolu lugwalo ndomwamvwa lwazuzikizyigwa.”+ 22  Lino boonse bakatalika kumulumbaizya akugambwa akaambo kamajwi mabotu ngaakali kubaambila,+ eelyo bakatalika kubuzya kuti: “Sena ooyu tali mwana wa Josefa?”+ 23  Mpoonya wakabaambila kuti: “Cakutadooneka muyoondaambila kaambyo aaka kakuti, ‘Omusilisi, kolisilika omwini. Zintu nzitwakamvwa kazicitika ku Kapernauma,+ kozicita amomuno mumunzi okwanu.’” 24  Aboobo wakati: “Ncobeni ndimwaambila kuti kunyina musinsimi uutambulwa mumunzi okwabo.+ 25  Mucikozyanyo, ndimwaambila camasimpe kuti: Kwakali bamukabafwu banji mu Israyeli kumazuba aa Elija imvwula noyatakali kuwa kwamyaka yotatwe amyezi iili cisambomwe, cakuti kwakaba nzala mpati mucisi coonse.+ 26  Nokuba boobo Elija kunyina naakatumwa kuli umwi wabamakaintu aabo, pele wakatumwa buyo kuli mukamufwu wamu Zarefati mucisi ca Sidoni.+ 27  Alimwi kwakali basicinsenda banji mu Israyeli kuciindi camusinsimi Elisha; pele kunyina naba omwe wabo wakasalazyigwa* ccita buyo Naamani muna Siriya.”+ 28  Lino boonse ibakali kumvwa zintu eezyi mucikombelo bakanyema kapati,+ 29  aboobo bakanyamuka akumutola cakufwambaana anze aamunzi, eelyo bakaunka anguwe atala aacilundu aawo aakayakidwe munzi wabo, kuti bakamutonkele mujeleele. 30  Pele walo wakaandulula akati kabo ngooyo waunka.+ 31  Mpoonya wakaselemukila ku Kapernauma, munzi waku Galilaya. Eelyo wakali kubayiisya mu Sabata,+ 32  alimwi bakagambwa kapati ambwaakali kuyiisya,+ nkaambo wakali kwaambaula canguzu. 33  Lino mucikombelo mwakali muntu wakanjidwe daimona, imuuya uusofweede, eelyo wakoompolola ajwi pati kati:+ 34  “Aa! Ino tujisi kaambo nzi anduwe Jesu omuna Nazareta?+ Sena walonda kutunyonyoona? Ndilikuzyi kabotu kuti uli Musalali wa Leza.”+ 35  Pele Jesu wakalikalalila kati: “Umuna, kozwa mumuntu ooyu.” Eelyo nolyakamuwisyila ansi muntu ooyo kabalangilila, daimona eelyo lyakazwa mulinguwe kakunyina kumucisa. 36  Babone boobo bantu boonse bakagambwa kapati akutalika kulyaambauzya akati kabo kabati: “Ino majwi aali buti aaya? Nkaambo cabwami acanguzu ulalailila myuuya iisofweede, eelyo ilazwa!” 37  Aboobo mpuwo yakwe yakamwaika koonse-koonse mucisi eeco. 38  Naakazwa mucikombelo, wakaakunjila muŋanda ya Simoni. Lino banyinazyala Simoni bakalicisidwe, bakali kupya mubili kapati, aboobo bantu bakamulomba kuti abagwasye.+ 39  Aboobo wakaima aawo mpobakalede akulailila bulwazi kuti buzwe, eelyo bwakazwa. Ndilyonya bakanyamuka akutalika kubakutaukila. 40  Pele nolyakali kuyanda kubbila zuba, boonse aabo ibakajisi bantu baciswa malwazi aaindene-indene bakabaleta kulinguwe. Kwiinda mukubikka maanza aali umwi aumwi wabo wakabaponya.+ 41  Alimwi madaimona akazwa mubantu banji, kaaongolola akwaamba kuti: “Uli Mwana wa Leza.”+ Pele wakali kwaakalalila, tanaakali kwaazumizya kwaambaula,+ nkaambo akalimuzyi kuti ngu Kristo.+ 42  Pele nobwakaca, wakazwa akuya kubusena bunyina bantu.+ Pele makamu aabantu akatalika kumuyandaula mane aakusika ooko nkwaakabede, eelyo bakasoleka kumukasya kuti atabasiyi. 43  Pele wakabaambila kuti: “Akwalo kuminzi iimbi ndileelede kwaambilizya makani mabotu aa Bwami bwa Leza, nkaambo eeci ncindakatuminwa.”+ 44  Aboobo wakaunka kayaabukambauka muzikombelo zyamu Judaya.

Bupanduluzi buyungizyidwe

Naa “ansonje.”
Naa “wakaponesyegwa.”