Luka 18:1-43

  • Cikozyanyo camukamufwu uulaakazumanana (1-8)

  • Mupailo wamu Farisi awasimutelo (9-14)

  • Jesu abana (15-17)

  • Mubuzyo wamuleli muvwubi (18-30)

  • ufwu lwa Jesu lwasinsimwa alimwi (31-34)

  • Moofwu sikulombelela watalika kubona alimwi (35-43)

18  Mpoonya wakabaambila cikozyanyo citondezya mbobakali kuyandika kuti kabapaila lyoonse akutaleka,+  ulaamba: “Mumunzi umwi kwakali mubetesi iwatakali kuyoowa Leza nokuba kulemeka muntu.  Mumunzi mumonya oomo mwakali amukamufwu ooyo iwakali kuunka kulinguwe lyoonse akwaamba kuti, ‘Ukabone kuti akosolwa cabululami makani ngendijisi asitwaamboma.’  Kwaciindi cili mbocibede mubetesi wakali kukaka, pele kumbele wakalyaambauzya wati, ‘Nokuba kuti tandimuyoowi Leza naa kulemeka muntu uuli woonse,  akaambo kakuti mukamufwu ooyu wazumanana kundipenzya, ndilamukosweda cabululami makani aakwe kutegwa atazumanani kuboola akundikatazya akulomba kwakwe.’”*+  Mpoonya Mwami wakati: “Amumvwe ncaakaamba mubetesi ooyo nokuba kuti taluleme!  Aboobo sena Leza takaboni kuti basale bakwe ibamukwiilila isyikati amasiku+ bakoswedwa cabululami makani nokuba kuti ulabakkazikila moyo?+  Ndimwaambila kuti, uyoobona kuti bakoswedwa makani cabululami alimwi cakufwambaana. Nokuba boobo, Mwanaamuntu aakuboola, sena masimpe uyoolujana lusyomo oolu* anyika?”  Alimwi wakaamba cikozyanyo eeci kuli bamwi ibakali kulisyoma kuti bakaliluleme akubona bamwi kuti mbabuyo: 10  “Bantu bobilo bakatanta kuunka kuyoopaila mutempele, umwi wakali mu Farisi, umbi wakali simutelo. 11  Imu Farisi wakaimikila akutalika kupaila kuti, ‘O Leza, ndilakulumba kuti tandili mbuli bantu bamwi—ibabbi, bataluleme, basimamambe—naa mbuli simutelo ooyu. 12  Ndilaliimya kulya ziindi zyobilo ansondo; ndilapa cakkumi cazintu zyoonse nzyondijana.’+ 13  Pele simutelo, kaimvwi alaale tanaakali kuyanda nokuba kulanga kujulu, pele wakali kwiide kulyuuma acamba kaamba kuti, ‘O Leza, kondeengelela* mebo ndesizibi.’+ 14  Ndimwaambila kuti, muntu ooyu wakaunka kuŋanda yakwe kabonwa kuti uliluleme kwiinda mu Farisi.+ Nkaambo kufwumbwa muntu uulisumpula uyoocesyegwa, pele ooyo uulicesya uyoosumpulwa.”+ 15  Lino abalo bantu bakali kumuletela abana babo basyoonto kuti abikke maanza aakwe alimbabo, pele basikwiiya nobakabona boobo bakatalika kubakalalila.+ 16  Pele Jesu wakaita bana basyoonto kulinguwe, ulaamba: “Amubaleke bana baboole kulindime, mutabakasyi pe, nkaambo Bwami bwa Leza mbwabaabo bali mbuli baaba.+ 17  Ncobeni ndimwaambila kuti, kufwumbwa uutatambuli Bwami bwa Leza mbuli mwana musyoonto, takanjili pe mulimbubo.”+ 18  Mpoonya muleli umwi wakamubuzya, ulaamba: “O Mwiiyi mubotu, ino ncinzi ncondeelede kucita kutegwa ndikajane buumi butamani?”+ 19  Jesu wakamubuzya kuti: “Nkaambo nzi ncondaamba kuti omubotu? Taakwe mubotu ccita buyo Leza alikke.+ 20  Tee uliizyi milawo yakuti: ‘Utaciti bumambe,+ utajayi,+ utabbi,+ utapi bumboni bwakubeja,+ lemeka bauso abanyoko.’”+ 21  Mpoonya wakati: “Eeyi yoonse ndali kwiitobela kuzwa kubwana.” 22  Naakamvwa boobo, Jesu wakamwaambila kuti, “Kucili cintu comwe ncocibulizyide: Sambala zintu zyoonse nzyojisi akupa bacete, aboobo uyooba alubono kujulu; wamana uboole ube sikunditobela.”+ 23  Naakamvwa majwi aaya, wakatyompwa kapati, nkaambo wakalivwubide kapati.+ 24  Jesu wakamulanga akwaamba kuti: “Eelo kaka ciyooba cintu ciyumu kubantu bajisi mali kunjila mu Bwami bwa Leza!+ 25  Mubwini, ncuuba-uba kunkamela ikwiinda mukapulo kanyeleti yakusumya kwiinda mbocibede kumuvwubi kunjila mu Bwami bwa Leza.”+ 26  Aabo bakamvwa majwi aaya bakabuzya kuti: “Ino nguni mubwini uukonzya kufwutuka?”+ 27  Wakati: “Izintu zitakonzyeki kubantu zilakonzyeka kuli Leza.”+ 28  Pele Petro wakati: “Bona! Twasiya zintu zyesu akutobela nduwe.”+ 29  Wakabaambila kuti: “Ncobeni ndimwaambila kuti, taakwe wakasiya ŋanda, mukaintu, banabokwabo, bazyali, naa bana akaambo ka Bwami bwa Leza+ 30  uutakajani zintu azimwi zinji muciindi cino, eelyo mubweende bwazintu buboola,* ibuumi butamani.”+ 31  Mpoonya wakatola bali Kkumi Ababili kumbali akubaambila kuti: “Amubone! Tuunka ku Jerusalemu, eelyo zintu zyoonse zyakalembwa abasinsimi kujatikizya Mwanaamuntu ziyoozuzikizyigwa.*+ 32  Mucikozyanyo, uyakwaabwa kubantu bamasi+ alimwi uyoofwubaazyigwa+ akusampaulwa akuswidwa mate.+ 33  Alimwi baakumana kumukwibbaula bayoomujaya,+ pele mubuzuba bwatatu uyoobuka.”+ 34  Nokuba boobo, tiibakamvwisya ncozyakali kwaamba zintu eezyi zyoonse, nkaambo majwi aaya akasiswa kulimbabo, alimwi tiibakazimvwisya zintu nzyaakali kwaamba. 35  Lino Jesu naakalondelela ku Jeriko, muntu umwi moofwu wakalikkede mumbali aanzila kalombelela.+ 36  Naakamvwa nkamu yabantu ibakali kwiinda, wakatalika kubuzya cakali kucitika. 37  Bakamwaambila kuti: “Jesu waku Nazareta ulainda!” 38  Naakamvwa boobo, wakoongolola, ulaamba: “Jesu, O Mwana wa Davida, kondifwida luse!” 39  Mpoonya aabo ibakali kumbele bakatalika kumukalalila kabamwaambila kuti aumune, pele walo wakazumanana koongololesya kati: “Akaka O Mwana wa Davida, kondifwida luse!” 40  Mpoonya Jesu wakaima akulailila kuti muntu ooyo aletwe kulinguwe. Naakasika afwaafwi, Jesu wakamubuzya kuti: 41  “Ncinzi ncoyanda kuti ndikucitile?” Wakati: “O Mwami, ndilomba kuti nditalike kubona.” 42  Aboobo Jesu wakamwaambila kuti: “Kotalika kubona; lusyomo lwako lwakuponya.”+ 43  Eelyo mpoonya aawo wakatalika kubona, alimwi wakatalika kumutobela,+ katembaula Leza. Kunze lyaboobo, bantu boonse nobakabona ceeci, bakatembaula Leza.+

Bupanduluzi buyungizyidwe

Naa “akundipenzya cakumaninina.”
Naa “lusyomo luli boobu.”
Naa “kondifwida luse.”
Naa “muciindi ciboola.” Amubone Bupanduluzi Bwamabala.
Naa “ziyoocitika.”