Jona 4:1-11

  • Jona wanyema eelyo uyanda buyo kufwa (1-3)

  • Jehova wayiisya Jona luse (4-11)

    • “Sena cili kabotu kunyema boobo mboonyema?” (4)

    • Ciiyo kuzwa kucisyango cili mbuli ceeco cizyala myuungu (6-10)

4  Pele Jona wakabijilwa kapati, alimwi wakanyema kapati akaambo kamakani aaya.  Aboobo wakapaila kuli Jehova kuti: “Akaka, O Jehova, sena eeci tacisyi ncondakali kulibilika ciindi nondakali mucisi cangu? Nkakaambo kaako ndakasola kutijila ku Tarisi+ ciindi cakusaanguna; nkaambo ndakalizyi kuti yebo nduwe Leza silweetelelo* alimwi siluse, uumuka kukalala alimwi siluyando lupati ilutamani,+ uucinca mizeezo kuti utaleti mapenzi.  Aboobo lino, O Jehova, kondinyanga buyo buumi, nkaambo cilainda kubota kuti ndafwa buyo kwiinda kuti kandipona.”+  Mpoonya Jehova wakamubuzya kuti: “Sena cili kabotu kunyema boobo mboonyema?”  Kumane Jona wakazwa mumunzi akuyookkala kujwe lyamunzi. Ooko wakayaka kavwuka akukkala mucimvwule cankako kutegwa abone citiicitikile munzi.+  Mpoonya Jehova Leza wakapa kuti cisyango cili mbuli ceeco cizyala myuungu* cimene akukomena atala lya Jona, kutegwa cimubede cimvwule atala aamutwe wakwe, akuti cimuvwune kupenzi lyakwe. Aboobo Jona wakakondwa kapati akaambo kacisyango eeco.  Pele kubucedo ibuzuba bwakatobela Leza mwini-mwini wakatuma syaanyungwa, ooyo wakaluma cisyango eeco, kumane cakayuma.  Lino zuba nolyakatalika kubala, Leza wakatuma muwo wakujwe uupya kapati, alyalo zuba lyakamubala amutwe Jona cakuti wakanetuka. Wakali kwiile kulomba kuti afwe buyo, alimwi cakwiinduluka-induluka wakali kwaamba kuti, “Cilainda kubota kuti ndafwa buyo kwiinda kuti kandipona.”+  Mpoonya Leza wakabuzya Jona kuti: “Sena cili kabotu kunyema boobo mboonyema akaambo kacisyango eeci?”+ Eelyo walo wakati: “Ndileelede kunyema, alimwi ndilinyemede kapati cakuti ncondiyanda buyo nkufwa.” 10  Pele Jehova wakati: “Yebo wausa akaambo kacisyango eeci, ncootakabelekela nokuba kukomezya; cakakomena mubusiku bomwe akufwa mubusiku bomwe. 11  Sena mebo tandeelede kuufwida lubomba munzi mupati wa Nineve,+ oomo imuli bantu bainda ku 120,000 ibatacizyi nokuba kwiindanya cibi acibotu, antoomwe abanyama babo banji?”+

Bupanduluzi buyungizyidwe

Naa “silubomba.”
Naa ambweni, “ibbonobono.”