Isaya 41:1-29

  • Sikuzunda uuzwa kumapaswido aazuba (1-7)

  • Israyeli wasalwa kuba mubelesi wa Leza (8-20)

    • “Abrahamu imulongwe wangu” (8)

  • Baleza abalitondezye kuti mbaleza ncobeni (21-29)

41  “Amundiswiilile kamuumwine,* nywebo nonsumbu;Misyobo yabantu aibe anguzu alimwi. Ababoole munsi-munsi; mpoonya abaambaule.+ Atuyaane kulubeta.   Ino nguni wabusya muntu kuzwa kumapaswido aazuba,*+Nguni wamwiita mubululami kuti amukutaukile kumaulu aakwe,Kuti amupe masiAkuti azunde bami?+ Ino nguni uubapa kuti babe mbuli lusuko kumbele lyapanga lyakwe,Kuti babe mbuli buungu bupepululwa amuwo kumbele lyabuta bwakwe?   Ulabatandila, kunyina cimulesya kwiindaMunzila eezyo mwaatanalyatide maulu aakwe.   Ino nguni ooyo wabweza ntaamu akucita boobu,Iwaita mazyalani kuzwa kumatalikilo? Mebo nde Jehova, ndendime Mutaanzi;+Alimwi akuli baabo basyaalizi ndili mbubonya oobo.”+   Insumbu zyabona akuyoowa. Magolelo aanyika akatalika kukankama. Balibunga akuboola.   Umwi aumwi ugwasya mweenzinyinaAkwaambila mwanookwabo kuti: “Koyuma.”   Aboobo syaabupampu uyumya-yumya mufwuzi;+Ooyo wuuma cibulo ansando kuti cipapalaleUyumya-yumya yooyo uufwulila aanjanji yakufwulila. Kujatikizya loto* wakaumpililwa waamba kuti: “Cabota.” Mpoonya cilagagailwa ampikili kutegwa citawi.   “Pele yebo O Israyeli, uli mubelesi wangu,+Yebo, O Jakobo, ngondasala,+Olunyungu lwa Abrahamu imulongwe wangu,+   Yebo, ngondakabweza kuzwa kumagolelo aanyika,+Inzya yebo ngondakaita kuzwa kumasena aanjiyo aali kulamfwu kapati. Ndakakwaambila kuti, ‘Yebo uli mubelesi wangu;+Ndakusala; tiindakukaka pe.+ 10  Utayoowi pe, nkaambo ndilaanduwe.+ Utalibiliki pe, nkaambo ndime Leza wako.+ Ndilakuyumya, inzya ndilakugwasya,+Ncobeni ndinookujatilide ajanza lyangu lyalulyo lyabululami.’ 11  Bona! Boonse aabo bakufwundilide bayoogunwa akusampuka.+ Bantu aabo bakulwana bayooba babuyo alimwi bayooloba.+ 12  Uyoobayandaula bantu aabo batingaana anduwe, pele tokabajani pe;Bantu aabo balwana anduwe bayooba buyo mbuli cintu citako alimwi cabuyo.+ 13  Nkaambo mebo nde Jehova Leza wako, ndilikujatide kujanza lyako lyalulyo,Ndendime Yooyo uukwaambila kuti, ‘Utayoowi pe. Mebo ndilakugwasya.’+ 14  Utayoowi pe yebo Jakobo onamula,*+Nywebo nobantu ba Israyeli. Mebo ndilakugwasya,” mbwaamba Jehova, Sikukunununa,+ Uusalala wa Israyeli. 15  “Bona! Ndakupanga kuba cilayi cakuumya maila,+Cibelesyo cipya cakuumya maila cijisi meno aabosya koonse-koonse. Yebo uyoolyatauka malundu akwaapwayaulaAtwalo tulundu-lundu uyootupa kuba buyo mbuli buungu. 16  Eezyi uyoozipupulula,Eelyo muwo uyoozitola;Guwo pati liyoozimwaya. Uyookondwa muli Jehova,+Alimwi uyoolidundila Uusalala wa Israyeli.”+ 17  “Bantu bapengede alimwi abacete bayandaula maanzi, pele taajaniki pe. Mulaka wabo wayuma akaambo kanyota.+ Mebo nde Jehova, ndiyoobaingula.+ Mebo nde Leza wa Israyeli, tandikabalekelezyi pe.+ 18  Ndiyoopa kuti milonga ikunke atala aatulundu tunyina cintu+Alimwi ndiyoosinkula tusensa twamaanzi muzibanda zyamumakkuti.+ Ndiyoopa kuti nkanda ibe cizyiba cijisi maanzi amateteAlimwi nyika iitakwe maanzi ndiyakwiipa kuba tusensa twamaanzi.+ 19  Mucimpayuma ndiyoosyanga cisamu cakkedari,Camuunga, misiwe alimwi acisamu camafwuta.+ Mucibanda camucimpayuma ndiyoosimpa cisamu camupulanga,Antoomwe amusikili alimwi amuzimbwa,+ 20  Kutegwa bantu boonse bakabone akuzyibaAkuti bakabikkile maano akumvwisyaKuti janza lya Jehova ndilyacicita eeci,Alimwi Uusalala wa Israyeli nguwakacilenga.”+ 21  “Amulete kaambo kanu kulubeta,” mbwaamba Jehova. “Amupe bumboni bwanu,” mbwaamba Mwami wa Jakobo. 22  “Amupe bumboni akutwaambila zintu iziyoocitika kumbele. Amutwaambile mbozyakabede zintu zyakaindi,*Kutegwa tuziyeeyesye mumyoyo yesu* akuzyiba citobela. Naa amutwaambile zintu ziboola kumbele.+ 23  Amutwaambile zintu iziyoocitika kumbele,Kutegwa tuzyibe kuti nywebo muli baleza ncobeni.+ Inzya, amucite cintu cimwi, cibotu naa cibi,Kutegwa tugambwe twacibona.+ 24  Amubone! Nywebo muli cintu buyo citako,Alimwi milimo yanu njabuyo.+ Kufwumbwa muntu uumusala ulasesemya.+ 25  Ndabusya muntu umwi kuzwa kunyika, eelyo uyooboola.+Kuzwa kumapaswido aazuba*+ uyakwiita zina lyangu. Baleli* uyoobalyatauka mbuli kuti mbulongo buyo,+Uyoobalyatauka mbuli mubumbi uulyatauka bulongo butete. 26  Ino nguni wakacaamba kale cintu eeci kuzwa kumatalikilo, kutegwa tuzyibe,Nokuba kuzwa kuziindi zyakaindi, kutegwa twaambe kuti, ‘Uliluzi’?+ Masimpe taakwe naba omwe wakacaambilizya! Kunyina naba omwe wakacaamba! Kunyina naba omwe wakamvwa cili coonse kuzwa kulindinywe!”+ 27  Ndime ndakasaanguna kwaambila Ziyoni kuti: “Bona! Ngaaya makani!”+ Alimwi kuli Jerusalemu ndiyootuma muntu uuleta makani mabotu.+ 28  Ndakazumanana kulanga, pele kwakanyina muntu;Akati kabo kwakanyina naba omwe wakali kukonzya kupa lulayo. Ndakazumanana kubabuzya kutegwa bavwiile. 29  Amubone! Boonse buyo mbabuyo.* Milimo yabo tiikwe mpindu. Zikozyanyo zyabo zifwulidwe muwo buyo alimwi nzyabuyo.+

Bupanduluzi buyungizyidwe

Naa “Amuumune kumbele lyangu.”
Naa “kujwe.”
Bamwi baamba kuti “lotwe.”
Nkokuti, muntu uutakonzyi kulikwabilila alimwi uupengede.
Mu Chihebrayo, “zyakusaanguna.”
Naa “tubikke myoyo yesu.”
Naa “kujwe.”
Naa “Baleli babili.”
Naa “bali mbuli cintu citako.”