Isaya 29:1-24

  • Maawe kuli Arieli! (1-16)

    • Bukombi bwaamulomo buyo bwakakwa (13)

  • Basinkematwi bayoomvwa; boofwu bayoobona (17-24)

29  “Maawe kuli Arieli,* kuli Arieli, imunzi mwaakakkala Davida!+ Amucite mapobwe mwaka amwaka;Amwaatobelanye mapobwe.+   Pele ndiyoomuletela mapenzi Arieli,+Kuyooba koomoka alimwi akulila,+Eelyo kulindime uyooba mbuli cikko cacipaililo ca Leza.+   Koonse-koonse ndiyookubikkila nkambi kuti nkulwane,Alimwi ndiyookusinkila alubayaAkukuyakila mayake malamfwu aakukusinkila.+   Uyoofwiinsyigwa;Uyakwaambawida kunsi aanyika,Alimwi nzyonakwaambaula tazinoolimvwisyi kabotu akaambo kabulongo. Ijwi lyako linoozwida kunsi aanyika+Mbuli jwi lyamuntu waambaula amizimo,Alimwi kuzwa mubulongo nzyonakwaamba zinoolimvwisya mbuli kayuni kalila.   Nkamu yabasinkondonyoko* iyooba mbubonya mbuli musunkwindi,+Ayalo nkamu yabasilunya iyooba mbubonya mbuli buungu bupepululwa amuwo.+ Alimwi ciyoocitika mukulaba kwaliso, cakutayeeyelwa.+   Jehova wamakamu uyookucebukaAakuboola kulinduwe amuzumo, muzuzumo wanyika, kundindima kupati,Muwo uubbubbula canguzu, mvwula mpati yaguwo alimwi amabangabanga aamulilo uumpa cakumaninina.”+   Mpoonya nkamu yabantu bamasi oonse iilwana Arieli,+Nkokuti boonse aabo bamulwana,Ingazi zyakusinkilizya munzi nzyobamuyakilide,Alimwi abaabo bamuletela mapenzi,Iyakuba mbuli ciloto, mbuli cilengaano camasiku.   Masimpe, ciyooba mbuli leelyo muntu uufwide nzala nalota kuti ulalya,Pele nasinsimuka ujana kuti ucifwide nzala,Ambuli leelyo muntu uufwide nyota nalota kuti ulanywa,Pele nasinsimuka ujana kuti ulikatede alimwi nyota icimujisi. Aboobo eeci nceciyakucitikila nkamu yabantu bamasi oonseIilwana Cilundu ca Ziyoni.+   Amwaankamane akugambwa;+Amulyoofwaazye, moofwaale.+ Balikoledwe, pele ikutali awaini;Baladadalika, pele ikutali akaambo kabukoko. 10  Nkaambo Jehova wamutila muuya wakoona ŋonzi zyalufwu;+Wajala meso aanu, nkokuti basinsimi,+Alimwi waivwumba mitwe yanu, nkokuti basizilengaano.+ 11  Aboobo nywebo cilengaano cazintu zyoonse cimubeda mbuli majwi aabbuku linamatikidwe.+ Ciindi bantu nobapa muntu uucizyi kubala kabaamba kuti: “Nkooko, twalomba ubale cakupozya,” walo waamba kuti: “Nsikonzyi pe, nkaambo lilinamatikidwe.” 12  Alimwi bbuku eeli nobalipa muntu uumbi uutacizyi kubala kabaamba kuti: “Nkooko, twalomba ubale cakupozya,” walo waamba kuti: “Mebo nsicizyi kubala pe.” 13  Jehova waamba kuti: “Bantu aaba balandisikila amulomo wabo buyoAlimwi balandilemeka amilomo yabo buyo,+Pele myoyo yabo iili kule andime;Alimwi kuyoowa nkobandiyoowa kuyeeme amilawo yabantu njobayiisyigwa.+ 14  Aboobo ndendime alimwi nditiibacitile zintu zigambya bantu aaba,+Ndilabacitila zintu zigambya cakutobelanya;Busongo bwabantu babo basongo bulaloba,Aalo maano aabaalumi babo bacenjede taakoolibonya pe.”+ 15  Maawe kulibaabo basolekesya kumusisa makanze aabo Jehova.+ Micito yabo baicitila mumudima,Kabaamba kuti: “Ino nguni uutubwene? Ino nguni uuzyi ncotucita?”+ 16  Eelo kaka mwazipilinganya zintu!* Sena mubumbi weelede kubonwa kuti uleelene abulongo?+ Sena cintu cakapangwa ceelede kwaamba yooyo wakacipanga kuti: “Tanaakandipanga mebo pe”?+ Alimwi sena cintu cakabumbwa caamba yooyo wakacibumba kuti: “Tanaakabelesya maano pe”?+ 17  Mukaindi kaniini buyo Lebano uyoosandulwa kuba muunda wazisamu zyamicelo,+Awalo muunda wazisamu zyamicelo uyoobonwa mbuli syokwe.+ 18  Mubuzuba oobo, basinkematwi bayoomvwa majwi aabbuku,Alimwi meso aaboofwu ayoobona kuzwa mumusinze akuzwa mumudima.+ 19  Babombe myoyo bayoosekelela kapati muli Jehova,Abalo bacete bayookkomana muli Uusalala wa Israyeli.+ 20  Nkaambo silunya takabiko limbi,Awalo sikulidunda uyooloba,Alimwi boonse aabo balibambilide kucita zintu zibi bayoonyonyoonwa,+ 21  Aabo ibaamba zyakubeja akupa kuti bantu bamwi bapegwe mulandu,Ibateya muntu wiiminina bantu* kumulyango wamunzi,+Alimwi ibapa kuti mululami atacitilwi cabululami kwiinda mukwaamba twaambo twabuyo.+ 22  Aboobo mboobu Jehova, ooyo iwakanununa Abrahamu,+ mbwaamba kuli bamuŋanda ya Jakobo: “Jakobo takagunwi limbi pe,Alimwi takabi limbi abusyu buuside.*+ 23  Nkaambo aakubona bana bakwe,Imilimo yamaanza aangu, kabali mukati kakwe,+Bayoosalazya zina lyangu;Masimpe, bayoomusalazya Uusalala wa Jakobo,Alimwi bayoomuyoowa kapati Leza wa Israyeli.+ 24  Aabo bajisi muuya wabuzangi bayooba amaano,Alimwi aabo batongooka bayootambula malailile.”

Bupanduluzi buyungizyidwe

Izina eeli ambweni lyaamba “Cikko Cacipaililo ca Leza,” ambweni kwaamba Jerusalemu.
Mu Chihebrayo, “beenzu.”
Naa “Eelo kaka muli bampelenge!”
Mu Chihebrayo, “muntu uusinsa.”
Nkokuti, akaambo kakufwa nsoni alimwi akutyompwa.