Baroma 7:1-25

  • Cikozyanyo cakwaangululwa ku Mulawo (1-6)

  • Mulawo wapa kuti cibi cizyibwe (7-12)

  • Nkondo yakulwana cibi (13-25)

7  Sena nkokuti bakwesu tamuzyi, (nkaambo ndaambila baabo ibazyi mulawo) kuti Mulawo ngosimalelo wamuntu kufwumbwa kuti muntu ooyo kacipona?  Mucikozyanyo, kweelana amulawo, imukaintu uukwetwe ulaangidwe kumulumaakwe nacipona; pele ikuti naa mulumaakwe wafwa, ulaangununwa kumulawo wamulumaakwe.+  Aboobo, ikuti wakwatwa kumwaalumi uumbi mulumaakwe kacipona, inga waambwa kuti ngusimamambe.+ Pele ikuti mulumaakwe wafwa, ulaangunuka kumulawo wakwe, eelyo takategwi ngusimamambe ikuti wakwatwa kumwaalumi uumbi.+  Aboobo nobakwesu, andinywe mwakafwa kujatikizya Mulawo kwiinda mumubili wa Kristo, kutegwa mube bamuntu uumbi,+ bayooyo wakabusyigwa kuzwa kubafwu,+ kutegwa tumuzyalile micelo Leza.+  Nkaambo notwakacili kutobela zisusi zyanyama, zisusi eezyo izyakali kuyubunuka akaambo ka Mulawo zyakali kubeleka mumibili yesu* kutegwa tuzyale micelo yalufwu.+  Pele lino twaangununwa ku Mulawo ooyo,+ nkaambo twafwa kuli ceeco cakatwaangide, kutegwa tube bazike munzila mpya kwiinda mumuuya,+ ikutali munzila yakaindi kwiinda mumulawo uulembedwe.+  Ino lino tulaamba nzi? Sena Mulawo ncibi? Peepe! Mubwini ikuti nokwakanyina Mulawo nindatakacizyiba cibi.+ Mucikozyanyo, nindatakazyiba kuti kunyonokela nkubi ikuti Mulawo nowatakaamba kuti: “Utanyonokeli.”+  Pele akaambo kamulawo, cibi cakajana nzila yakubusya kunyonokela kwamusyobo uuli woonse mulindime, nkaambo kayi eelyo nokwakanyina mulawo cibi cakalifwide.+  Aciindi cimwi ndakali muumi eelyo nokwakanyina mulawo. Pele mulawo nowakasika, cibi cakabukuluka, pele mebo ndakafwa.+ 10  Alimwi mulawo iwakeelede kunditola kubuumi,+ ndakajana kuti unditola kulufwu. 11  Nkaambo akaambo kamulawo nguwenya ooyu, cibi cakajana nzila yakundoongelezya akundijaya. 12  Aboobo, Mulawo kuugama ulasalala, awalo mulawo ooyu ulasalala, uliluleme alimwi mubotu.+ 13  Aboobo, sena nkokuti cibotu cakapa kuti ndifwe? Peepe! Pele cibi ncicakacita boobo, kutegwa citondezyegwe kuti ncecindiletela lufwu kwiinda mucintu eeco cibotu,+ kutegwa cibi ciindile kubija akaambo kamulawo.+ 14  Nkaambo tulizyi kuti Mulawo ngwamuuya, pele mebo ndili wanyama, iwakasambalwa kuba muzike wacibi.+ 15  Lino tandizizyi pe nzyondicita. Nkaambo ncondiyanda, tandiciciti pe, pele ncondisulide ncondicita. 16  Pele ikuti nconditayandi ncondicita, ndazumina kuti Mulawo mubotu. 17  Pele tandicili ndime ndicicita pe, pele ncibi cikkede mulindime.+ 18  Nkaambo ndilizyi kuti mulindime, nkokuti mumubili wangu, munyina cibotu ciliko; nkaambo walo moyo ulayanda kucita cibotu, pele tandijisi nguzu zyakucicita.+ 19  Nkaambo cibotu ncondiyanda kucita tandiciciti pe, pele cibi nconditayandi kucita ncencico ncondicita. 20  Lino, ikuti eeco nconditayandi ncondicita, ooyo uucicita tandicili ndime pe, pele ncibi cikkede mulindime. 21  Lino, kulindime ndijana mulawo ooyu wakuti: Ciindi nendiyanda kucita cibotu, icibi cilaandime.+ 22  Mumoyo wangu ndilaukkomanina kapati mulawo wa Leza,+ 23  pele mumubili wangu* ndibona mulawo uumbi uulwana mulawo uuli mumizeezo yangu,+ alimwi uundipa kuba mwaange wamulawo wacibi+ ooyo uuli mumubili wangu.* 24  Maawe ndemucaangu! Ino nguni utiindivwune kumubili ooyu uunditola kulufwu oolu? 25  Aalumbwe kaka Leza iwandivwuna kwiinda muli Jesu Kristo Mwami wesu! Aboobo, mumizeezo yangu mebo ndemwini ndili muzike kumulawo wa Leza, pele mumubili wangu ndili muzike kumulawo wacibi.+

Bupanduluzi buyungizyidwe

Mu Chigiriki, “muzizo zyesu.”
Mu Chigiriki, “muzizo zyangu.”
Mu Chigiriki, “muzizo zyangu.”