Baroma 16:1-27

  • Paulo wamuzyibya Febi, imubelesi (1, 2)

  • Kwaanzya Banakristo baku Roma (3-16)

  • Kucenjezyegwa kujatikizya kwaandaana (17-20)

  • Kwaanzya kuzwa kubabelesinyina a Paulo (21-24)

  • Maseseke aa Leza azyibwa lino (25-27)

16  Ndiyanda kumuzyibya zya Febi mucizyi wesu, uubelekela mumbungano iili mu Kenkreya,+  kuti mumutambule kabotu mu Mwami munzila yeelede basalali, alimwi akuti mumugwasye mumakani aali woonse mwanga wayandika lugwasyo,+ nkaambo awalo wakagwasya bakwesu banji, kubikkilizya andime lwangu.  Amundaanzyile Purisika a Akula+ basimilimoma muli Kristo Jesu,  ibakalibambilide kukosolwa nsingo akaambo kandime,+ aabo ibalumbwa ikutali andime buyo pele ambungano zyoonse zyabamasi.  Alimwi amwaanzye mbungano iili muŋanda yabo.+ Amwaanzye muyandwa wangu Epeneto, ooyo uuli ngomucelo wakusaanguna wa Kristo mu Asiya.  Amumwaanzye Mariya, ooyo iwali kumubelekela canguzu.  Amumwaanzye Androniko a Juniya ibamukowa wangu+ alimwi baangema, ibaalumi bazyibidwe kapati abaapostolo alimwi ibali kutobela Kristo kwaciindi cilamfwu kwiinda ndime.  Amundaanzyile Ampiliyato, muyandwa wangu mu Mwami.  Amumwaanzye Uribano similimoma muli Kristo, amuyandwa wangu Sitaku. 10  Amumwaanzye Apele, uusyomeka muli Kristo. Amubaanzye aabo bamuŋanda ya Arisitobulo. 11  Amumwaanzye Herodiona wamukowa wangu. Amubaanzye basikwiiya ba Mwami bamuŋanda ya Narikiso. 12  Amubaanzye ba Turufena a Turufosa, bamakaintu ibabeleka canguzu mu Mwami. Amumwaanzye Pesisi imuyandwa wesu, nkaambo wakabeleka canguzu mu Mwami. 13  Amumwaanzye Rufo uusalidwe mu Mwami, alimwi abanyina ibali mbabamaama andime. 14  Amumwaanzye Asunikrito, Felego, Herme, Patroba, Herma abakwesu balaambabo. 15  Amumwaanzye Filologo a Juliya, Nerea amucizyi wakwe, a Olumpa, alimwi abasalali boonse bali ambabo. 16  Kamwaanzyanya akumyontana kusalala. Ibambungano zya Kristo boonse balamwaanzya. 17  Lino bakwesu ndimukulwaizya kuti mubacenjelele bantu aabo ibaleta kwaandaana azintu eezyo izinga zyalebya bamwi mukwiimpana anjiisyo nzyomwakaiya, alimwi amubatantamuke.+ 18  Nkaambo bantu bamusyobo ooyu tabali bazike ba Mwami wesu Kristo pe, pele mbazike bazisusi zyabo beni,* alimwi kwiinda mumajwi aalweeno alimwi aabumpelenge boongelezya myoyo yabantu batacenjede. 19  Kumvwida kwanu kwazyibwa abantu boonse, aboobo ndilakondwa akaambo kandinywe. Pele ndiyanda kuti mube bantu basongo kuzintu zibotu, pele ibanyina mulandu kuzintu zibi.+ 20  Eelyo Leza uupa luumuno ulapwayaula Saatani+ kunsi aamaulu aanu lino-lino. Iluzyalo lwa Mwami wesu Jesu alube andinywe. 21  Timoteyo, similimoma ulamwaanzya, abalo bamukowa wangu ba Lukiya, Jasoni alimwi a Sosipatero balamwaanzya.+ 22  Andime nde Tertio nendalemba lugwalo oolu ndamwaanzya mu Mwami. 23  Simeenzu wangu Gayo,+ mukamwini ŋanda oomo imuswaanganina mbungano yoonse, ulamwaanzya. Erasito sikuyobola mali* aamunzi ulamwaanzya, alimwi a Kwarito imwanookwabo. 24  * 25  Lino kuli Leza uukonzya kumuyumya kweelana amakani mabotu ngondaambilizya amukukambaukwa kwa Jesu Kristo, kweelana aciyubunuzyo camaseseke aa Leza+ aakasisidwe kwaciindi cilamfwu, 26  pele lino aayubununwa akuzyibisyigwa kwiinda mu Magwalo aabusinsimi kuli bamasi boonse, kwiinda mukulailila kwa Leza uutamani kutegwa kube kumvwida kwiinda mulusyomo; 27  kuli Leza ooyu uuli ngomusongo alikke,+ akube bulemu kwiinda muli Jesu Kristo mane kukabe kutamani. Ameni.

Bupanduluzi buyungizyidwe

Naa “bamada aabo beni.”
Naa “mubanzi.”