2 Samuele 12:1-31

  • Natani wasinsa Davida (1-15a)

  • Mwana wa Bati-seba wafwa (15b-23)

  • Bati-seba wazyala Solomoni (24, 25)

  • Munzi wabana Amoni wa Raba wazundwa (26-31)

12  Aboobo Jehova wakatuma Natani+ kuli Davida. Eelyo wakaunka kulinguwe+ akumwaambila kuti: “Kwakali baalumi bobilo ibakali kukkala mumunzi omwe, umwi wakali muvwubi, eelyo umwi wakali mucete.  Ooyu muvwubi wakalijisi mbelele aŋombe zinji;+  pele ooyo mucete wakajisi buyo kabelele komwe kapwizi nkaakaulide.+ Wakali kukabamba alimwi kakali kukomenena antoomwe abana bakwe. Cakulya cisyoonto ncaakajisi akalo kakali kulya akunywida munkapu yakwe alimwi kakali kulala mumaanza aakwe. Kakaba mbuli mwanaakwe musimbi.  Kumane ooyo muvwubi wakaswaigwa mweenzu, pele tanaakabweza niiba yomwe yambelele naa ŋombe zyakwe kuti ajaile mweenzu wakwe. Muciindi caboobo wakabweza kabelele kamucete akukajaila mweenzu wakwe.”+  Amvwe boobu Davida wakanyema kapati kujatikizya mwaalumi ooyo, eelyo wakaambila Natani kuti: “Masimpe mbubonya Jehova mbwali muumi,+ mwaalumi ooyo iwakacita boobo weelede kujaigwa!  Akaambo kakuti wakacita boobu alimwi tanaakatondezya lubomba, weelede kubbadela mbelele zyone+ akaambo kakabelele aako kapwizi.”  Mpoonya Natani wakati kuli Davida: “Yebo ndonduwe mwaalumi ooyo! Lino mboobu mbwaamba Jehova Leza wa Israyeli: ‘Mebo ndakakunanika kuba mwami wa Israyeli+ alimwi ndakakuvwuna kujanza lya Saulo.+  Ndakakupa ŋanda yasimalelaako+ alimwi bamakaintu bakwe+ ndakababikka mumaanza aako alimwi ndakakupa ŋanda ya Israyeli aya Juda.+ Ikuti naa eezyo zyakuceela, ndalilibambilide kukuyungizizya azimbi.+  Ino nkaambo nzi ncowakanyansya jwi lya Jehova kwiinda mukucita cintu cibi mumeso aakwe? Wakamujaya Uriya muna Heti apanga!+ Mpoonya wakabweza mukaintu wakwe kuti abe mukaintu wako+ nookamana kumujaya apanga lyabana Amoni.+ 10  Lino panga talikooyoozwa muŋanda yako,+ nkaambo wakandisampaula kwiinda mukubweza mukaintu wa Uriya muna Heti kuti abe mukaintu wako.’ 11  Mboobu mbwaamba Jehova: ‘Ndilakuletela mapenzi kuzwa muŋanda yako omwini;+ alimwi ndiyoobweza bamakaintu bako kolangilila, ndiyoobapa kumwaalumi uumbi,*+ eelyo uyakoona abamakaintu bako zuba kalibala.*+ 12  Nokuba kuti yebo wakacita cintu eeci cakusisikizya,+ mebo cintu ncenditiicite ndilacicita kumbele lyabana Israyeli boonse zuba kalibala.’”* 13  Mpoonya Davida wakati kuli Natani: “Ndamubisizya Jehova.”+ Natani wakaingula Davida kuti: “Awalo Jehova wakulekelela cibi cako.*+ Tokoofwa pe.+ 14  Nokuba boobo, akaambo kakuti wasampaula Jehova kwiinda mukucita cintu eeci, mwana uuyoozyalwa uyoofwa.” 15  Kumane Natani wakaunka kuŋanda yakwe. Lino Jehova wakapa kuti mwana ooyo mukaintu wa Uriya ngwaakazyala kuli Davida aciswe. 16  Davida wakatalika kukombelezya Leza mwini-mwini kujatikizya mwana mulombe ooyo. Mpoonya Davida wakaliimya kulya alimwi wakanjila muŋanda yakwe akoona ansi busiku boonse.+ 17  Aboobo baalu bamuŋanda yakwe bakaboola mpaakalede akusoleka kuti bamunyamune kuzwa ansi, pele wakakaka alimwi tanaakalya cakulya ambabo. 18  Lino mubuzuba bwaciloba mwana wakafwa, pele babelesi ba Davida bakayoowa kumwaambila kuti mwana wafwa. Bakati: “Mwana naakacili muumi twakali kwaambaula anguwe, pele tanaakatuswiilila pe. Aboobo ino inga twamwaambila buti kuti mwana wafwa? Ambweni inga wacita cintu cibi.” 19  Lino Davida naakabona babelesi bakwe kabavwiya-vwiya, wakazyiba kuti mwana wafwa. Aboobo wakababuzya babelesi bakwe kuti: “Sena mwana wafwa?” Mpoonya bakati: “Inzya wafwa.” 20  Aboobo Davida wakabuka ansi. Wakasamba akunana mafwuta,+ amane wakasama zisani zimbi akuunka kuŋanda+ ya Jehova kuyookomba. Naakamana, wakaunka kuŋanda* yakwe akulomba kuti aletelwe cakulya, eelyo bakamubikkila cakulya kumane wakalya. 21  Mpoonya babelesi bakwe bakamubuzya kuti: “Ino nkaambo nzi ncoocitila boobu? Mwana naakacili kupona wakali kuliimya kulya alimwi wakali kulila lyoonse; pele mbwaafwida buyo wabuka akutalika kulya.” 22  Davida wakaingula kuti: “Naakacili kupona mwana, ncobeni ndakali kuliimya kulya+ alimwi ndakali kulila lyoonse, nkaambo ndakali kuti, ‘Ambweni Jehova ulandifwida luzyalo akuti mwana ulapona.’+ 23  Lino mbwaanga wafwa, ino nkaambo nzi ncondeelede kuliimya kulya? Sena inga ndakonzya kumubusya?+ Ndiyakuunka kucuumbwe nkwabede,+ pele walo takapiluki kulindime pe.”+ 24  Mpoonya Davida wakaumbulizya Bati-seba+ mukaintu wakwe. Kumane wakoona anguwe. Mukuya kwaciindi wakazyala mwana musankwa eelyo wakaulikwa zina lyakuti Solomoni.*+ Lino Jehova wakali kumuyanda,+ 25  alimwi wakatumya jwi kwiinda mumusinsimi Natani+ kuti akamuulike zina lyakuti Jedidaya,* nkaambo Jehova wakali kumuyanda. 26  Lino Joabu wakazumanana kulwana Raba,+ munzi wabana Amoni+ akuubweza munzi wabwami.+ 27  Aboobo Joabu wakatuma batumwa kuli Davida kuyoomwaambila kuti: “Ndaulwana munzi wa Raba+ alimwi ndaubweza munzi wamaanzi.* 28  Lino bunganya basikalumamba basyeede akuulwana munzi ooyu, muubweze. Ikuti naa kutabi boobo, ndime nditiiubweze munzi ooyu, eelyo ulaulikwa zina lyangu.”* 29  Aboobo Davida wakabunganya basikalumamba boonse akuunka ku Raba, eelyo bakaulwana munzi ooyu akuubweza. 30  Mpoonya wakabweza musini iwakali kumutwe wa Malikamu. Musini ooyu wakali kulema talenta* lyangolida lyomwe, alimwi wakalijisi amabwe mayandisi, eelyo Davida wakasamikwa musini ooyo kumutwe. Alimwi wakabweza zisaalo zinji kapati+ kuzwa mumunzi ooyu.+ 31  Bantu ibakali kukkala mumunzi ooyu wakabatola akubabikka kuti babe basikubeza mabwe, basikubelesya zibelesyo zibosya zyabutale, basikubelesya tweembe twabutale alimwi akuba basikuuma zitina. Oobu mbwaakacita kuminzi yoonse yabana Amoni. Kumane Davida abasikalumamba boonse bakapiluka ku Jerusalemu.

Bupanduluzi buyungizyidwe

Naa “kumweenzinyoko.”
Mu Chihebrayo, “mumeso aazuba eeli.”
Mu Chihebrayo, “kumbele aazuba.”
Naa “walekela cibi cako kuti ciinde.”
Naa “kuŋanda yabwami.”
Kuzwa kubbala lya Chihebrayo lyaamba kuti “Luumuno.”
Nkokwaamba kuti “Uuyandwa a Jehova.”
Ambweni caamba masena nkwaakali kuzwa maanzi aamumunzi ooyu.
Mu Chihebrayo, “eelyo zina lyangu linakwiitwa alinguwo.”
Talenta lyomwe lyakali kulema makkilogilamu aali 34.2. Amubone Makani Aayungizyidwe B14.