1 Bakorinto 9:1-27

  • Cikozyanyo ca Paulo mbwali mwaapostolo (1-27)

    • “Mutamwaangi kumulomo musune” (9)

    • ‘Maawe kulindime ikuti kanditakambauki!’ (16)

    • Kuba zintu zyoonse kubantu bamisyobo yoonse (19-23)

    • Kulilesya mumuzundano wakubalika kuya kubuumi (24-27)

9  Sena tandaangulukide? Sena tandili mwaapostolo? Sena tiindakamubona Jesu Mwami wesu?+ Sena nywebo tamuli mulimo wangu ngondakabeleka mu Mwami?  Nokuba kuti tandili mwaapostolo kuli bamwi, kulindinywe ndili mwaapostolo ncobeni! Nkaambo nywebo muli ciganto cisinizya bwaapostolo bwangu mu Mwami.  Bwiinguzi bwangu kuli baabo bandibeteka mbwakuti:  Sena tatwaangulukide kulya akunywa?  Sena notweenda munyendo zyesu tatwaangulukide kweenda antoomwe amukaintu uusyoma,*+ mbubonya mbobacita baapostolo bamwi boonse abanabokwabo+ Mwami alimwi a Kefasi?*+  Naa sena ndiswe buyo tolikke mebo a Barnaba+ notweelede kubeleka kutegwa tujane zintu zyakuligwasya?  Nguni sikalumamba uulibbadelela mumulimo wakwe? Nguni uusyanga muunda wamisaansa uutalyi micelo yanguwo?+ Naa nguni weembela butanga uutanywi mukupa umwi wabutanga?  Sena ndaamba zintu eezyi kweelana ambobazibona zintu bantu? Sena awalo Mulawo tauzyaambi zintu eezyi?  Nkaambo mu Mulawo wa Musa kulembedwe kuti: “Mutamwaangi kumulomo musune* ciindi nomuuma maila.”+ Sena mbasune mbabikkila maano Leza? 10  Naa sena mubwini waamba majwi aaya akaambo kandiswe? Mubwini akalembelwa ndiswe, nkaambo muntu uulima alimwi ayooyo uubuulula beelede kucita boobo kabajisi bulangizi bwakupegwa caabilo. 11  Ikuti twakasyanga zintu zyakumuuya akati kanu, sena nkumuminya ikuti twatebula zintu zyakumubili nzyotubulide kuzwa kulindinywe?+ 12  Ikuti bantu bamwi kabaangulukide kujana zintu kulindinywe, sena swebo tatweelede kwiinda mbabo? Nokuba boobo, tiitwalubelesya pe lwaanguluko lwesu oolu,+ pele tulaliyumya muzintu zyoonse, kutegwa munzila iili yoonse tutasinkilili makani mabotu aajatikizya Kristo.+ 13  Sena tamuzyi kuti bantu babeleka milimo iisetekene balya zintu zyamutempele, akuti aabo babelekela kucipaililo lyoonse balaabilwa zyakulya zyakucipaililo?+ 14  Mbubonya buyo, Mwami wakalailila kuti aabo baambilizya makani mabotu kabaponena mumakani mabotu.+ 15  Pele kunyina nindabelesya bubambe oobu buli boonse.+ Mubwini, tiindalemba zintu eezyi kutegwa ndicitilwe boobo pe, nkaambo inga cainda kubota kuti ndafwa buyo, ikwiinda kulekela muntu kuti andimanine twaambo tundipa kulidunda!+ 16  Lino ikuti kandaambilizya makani mabotu, aaka takali kaambo keelede kundipa kulidunda pe, nkaambo ngomukuli ngondakapegwa. Mubwini, maawe kulindime ikuti naa kanditaambilizyi makani mabotu!+ 17  Ikuti kandicita boobu cakulisungula, ndilijisi bulumbu; pele ikuti ndilisinikizya buya, alyalo eelyo ndilijisi bubanzi mbondakapegwa.+ 18  Aboobo ino bulumbu bwangu ninzi? Mbwakuti nendaambilizya makani mabotu ndaabile makani mabotu aaya kakunyina kubbadelwa, ikutegwa nditabelesyi lwaanguluko lwangu mumakani mabotu munzila mbyaabi. 19  Nkaambo nokuba kuti ndilaangulukide kubantu boonse, ndalicita kuba muzike kuli boonse, kutegwa ndigwasye bantu banji. 20  Kuba Juda ndakaba mbuli mu Juda, kutegwa ndigwasye ba Juda;+ kuli baabo beendelezyegwa amulawo ndakaba mbuli muntu weendelezyegwa amulawo ikutegwa ndigwasye baabo beendelezyegwa amulawo, nokuba kuti mebo lwangu tandeendelezyegwi amulawo.+ 21  Kuli baabo batajisi mulawo ndakaba mbuli muntu uutajisi mulawo, nokuba kuti mebo ndilijisi mulawo kuli Leza pele ndeendelezyegwa amulawo wa Kristo,+ ikutegwa ndigwasye baabo batajisi mulawo. 22  Kubantu batajisi nguzu ndakabula nguzu,+ kutegwa ndigwasye baabo batajisi nguzu. Ndaba zintu zyoonse kubantu bamisyobo yoonse kutegwa ziyume zitete ndibafwutule bamwi. 23  Pele ndicita zintu zyoonse akaambo kamakani mabotu, kutegwa ndaabile bamwi.+ 24  Sena tamuzyi kuti aabo batola lubazu mumuzundano wakubalika boonse balabalika, pele ngumwi buyo uupegwa bulumbu? Amubalike munzila iinga yamupa kuyoojana bulumbu.+ 25  Lino muntu woonse uutola lubazu mukuzundana* ulalilesya muzintu zyoonse. Lino balo balacita oobo kutegwa bajane musini uunyonyooka,+ pele swebo kutegwa tukajane musini uutanyonyooki.+ 26  Aboobo, tandibaliki mbuli kuti tandikuzyi nkondiya pe;+ tandifwusi mfwaindi zyangu ikuuma buyo muwo pe; 27  pele ndilaudinkaula* mubili wangu+ akuweendelezya mbuli muzike, ikutegwa ndamana kukambaukila bamwi, mebo lwangu nditajanwi amulandu uuli woonse.*

Bupanduluzi buyungizyidwe

Naa “amucizyi kali mukaintu.”
Alimwi wiitwa kuti Petro.
Mu Chigiriki, “mupoho.”
Naa “uubalika mumuzundano wakusiyana.”
Naa “ndilausubula; ndilaukasya.”
Naa “nditajanwi kuti tandeeleli.”