Skip to content

Skip to table of contents

Bakamboni ba Jehova

Amusale mwaambo Chitonga

Tito 3:1-15

3  Kozumanana kubayeezya kuti kabalibombya akuti kabazimvwida mfwulumende abaabo bajisi nguzu zyabweendelezi, kabali bantu balibambilide kucita mulimo mubotu uuli woonse,  batanoosampauli muntu uuli woonse, batabi basinkazi, pele kabanyoneka, kabatondezya kubomba moyo cakumaninina kubantu boonse.  Nkaambo notuba ndiswe aciindi cimwi twakali bafwubafwuba, bataswiilili, twakali kweenwa, twakali bazike bazisusi ziindene-indene akulikondelezya, twakali kucita zibi alimwi twakali amunyono, twakali kusesemya, alimwi twakali kusulana.  Nokuba boobo, iluzyalo lwa Mufwutuli wesu, Leza, alimwi aluyando ndwajisi kubantu nozyakatondezyegwa,  (ikutali akaambo kamilimo iiluleme njotwakacita, pele akaambo kaluse lwakwe mwini) wakatufwutula kwiinda mukusanzyigwa ooko ikwakatuleta kubuumi alimwi akwiinda mukutusandula kuba bantu bapya amuuya uusalala.  Wakatila muuya ooyu alindiswe camaanza obilo* kwiinda muli Jesu Kilisito Mufwutuli wesu,  ikutegwa twaakwaambwa kuti tuliluleme kwiinda muluzyalo lwayooyo, tukabe basikukona kweelana abulangizi bwabuumi butamani.  Majwi aaya alasyomeka, alimwi ndiyanda kuti lyoonse kosinizya kwaamba makani aaya, ikutegwa aabo ibamusyoma Leza babikkile maano kukuzumanana kucita milimo mibotu. Zyintu eezyi nzibotu alimwi zilabagwasya bantu.  Pele koikaka mibandi yakukazyanya yabufwubafwuba alimwi akuyandisya kuzyiba milongo yamazyalani akuzwangana alimwi akulwana kujatikizya Mulawo, nkaambo tazigwasyi alimwi nzyabuyo. 10  Alimwi kujatikizya muntu uukulwaizya njiisyo zyakubeja, komusosoloka wamana kumulaya ciindi comwe acabili; 11  mbwaanga ulizyi kuti muntu uuli boobo waleya munzila alimwi ulabisya, alimwi ulipa mulandu mwini. 12  Ndaakutuma Atema naa Tukiko kuboola kulinduwe, ukasoleke munzila iili yoonse kuboola kulindime ku Nikopoli, nkaambo nkundasala kuyookkala ciindi camupeyo. 13  Zena, walo ooyo uuzyi kabotu Mulawo, alimwi a Apolo ubabambile kabotu zyintu zyoonse nzyobayandika mulweendo lwabo. 14  Pele bantu besu abalo abaiye kuzumanana kucita milimo mibotu kuti kabajana nzyobabulide, kutegwa batabi bantu batazyali micelo. 15  Boonse mbotuli limwi balakwaanzya. Kondaanzyila boonse aabo ibatuyanda mulusyomo. Iluzyalo lwa Leza alube andinywe nyoonse.

Bupanduluzi buyungizyidwe

Naa, “cabuuya, imunji.”