Skip to content

Skip to table of contents

Bakamboni ba Jehova

Amusale mwaambo Chitonga

Milimo 8:1-40

8  Saulo awalo wakakuzuminizya kujaigwa kwa Sitefano. Ibuzuba oobo imbungano yakali mu Jelusalemu yakatalika kupenzyegwa kapati; alimwi basikwiiya boonse bakamwaikila muzyooko zyoonse zyamu Judaya a Samaliya, kwakasyaala buyo batumwa.  Pele baalumi bamwi bakombi bakamubweza Sitefano akuyoomuzikka, alimwi bakamulila kapati.  Pele Saulo wakatalika kupenzya mbungano ciyoosya. Wakali kunjila muŋanda aŋanda kayaabukwelaanya baalumi abamakaintu akubatola kuntolongo.  Pele aabo bakamwaikide bakainda koonse-koonse kabaya bwaambilizya makani mabotu aajwi lya Leza.  Filipo walo wakaselemukila kumunzi wa Samaliya akutalika kubakambaukila makani aa Kilisito.  Lino makamu aabantu oonse akali kubikkila maano kuzyintu nzyaakali kwaamba Filipo kumwi kabaswiilila akulangilila zitondezyo nzyaakali kucita.  Nkaambo bantu banji bakajisi myuuya iisofweede, alimwi eeyi yakali koompolola ajwi pati akuzwa mulimbabo. Kunze lyaboobo, ibanji bakalebukide mubili abalemene bakaponesyegwa abalo.  Aboobo bantu bakakondwa kapati mumunzi ooyo.  Lino mumunzi ooyo kwakali mwaalumi umwi uutegwa Simoni, ooyo musyule wakali simasalamuzi, alimwi wakali kubagambya bantu bamucisi ca Samaliya, kalikankaizya kuti wakali muntu mupati. 10  Boonse buyo, kutalikila kumwana akusikila kumupati, bakali kubikkila maano kulinguwe akwaamba kuti: “Ooyu muntu Ninguzu zya Leza, eezyo izitegwa Nzipati.” 11  Aboobo bakali kubikkila maano kulinguwe nkaambo kwaciindi cilamfwu wakali kubagambya amasalamuzi aakwe. 12  Pele nobakamusyoma Filipo iwakali kwaambilizya makani mabotu aa Bwami bwa Leza azyina lya Jesu Kilisito, bakatalika kubbapatizyigwa, ibaalumi alimwi abamakaintu. 13  Naba Simoni wakasyoma awalo, alimwi naakabbapatizyigwa, lyoonse buyo wakali kuyanzana a Filipo; alimwi wakali kugambwa naakali kubona zitondezyo amilimo mipati yanguzu yakali kucitika. 14  Lino ibatumwa mu Jelusalemu nobakamvwa kuti bana Samaliya bakalitambula jwi lya Leza, bakabatumina Petulo a Johane; 15  eelyo aaba bakaselemuka kuya nkuko akuyoobapailila kuti batambule muuya uusalala. 16  Nkaambo kunyina naba omwe akati kabo wakatambwide kale muuya uusalala, pele bakabbapatizyidwe buyo muzyina lya Mwami Jesu. 17  Mpoonya bakabaampa, eelyo bakatalika kutambula muuya uusalala. 18  Lino Simoni naakabona kuti muuya wakali kupegwa ibatumwa nobakali kwaampa bantu, wakasyomezya kubapa mali, 19  kati: “Amundipe nguzu eezyi andime, kutegwa kufwumbwa ngondibikka maanza aangu atambule muuya uusalala.” 20  Pele Petulo wakati kulinguwe: “Mali aako aansiliva aafwidilile antoomwe anduwe, nkaambo uyeeya kuti cipego ca Leza cabuyo inga caulwa amali. 21  Unyina cibeela nociba caabilo mumakani aaya, nkaambo moyo wako taululeme pe mumeso aa Leza. 22  Aboobo empwa kububi bwako oobu, akukombelezya Jehova kutegwa ambweni inga walekelelwa kukuyeeya kubi kwamoyo wako; 23  nkaambo ndabona kuti uli ndulwe iijaya alimwi amuzike wakutalulama.” 24  Aboobo Simoni wakati: “Nobaalumi, amundikombelezyezye kuli Jehova kutegwa kutabi cintu cili coonse akati kazyintu nzyomwaamba citiindicitikile.” 25  Aboobo nobakapa bumboni cakulomya akubandika jwi lya Jehova, bakapiluka ku Jelusalemu alimwi bakali kuyaabwaambilizya makani mabotu muminzi minji yabana Samaliya. 26  Pele mungelo wa Jehova wakaambila Filipo kuti: “Nyamuka uunke kumusanza kunzila iiselemuka kuzwa ku Jelusalemu kuya ku Gaza.” (Eeyi ninzila yiinda mucimpayuma.) 27  Eelyo wakanyamuka akuunka, lino ooko wakajana muntu umwi uulemekwa muna Etiyopiya, imwaalumi wakajisi cuuno cipati mubwami bwa Kandake mwami mukaintu wabana Etiyopiya alimwi nguwakali kulanganya lubono loonse lwa Mwami mukaintu ooyu. Wakaunkide ku Jelusalemu kuyookomba, 28  pele lino wakali kupiluka kwabo alimwi wakalikkede munkalaki yakwe kabala bbuku lyamusinsimi Izaya cakupozya. 29  Aboobo muuya wakaambila Filipo kuti: “Koya afwaafwi weende limwi ankalaki eeyi.” 30  Filipo wakabalikila kumbali ankalaki alimwi wakamumvwa kabala bbuku lyamusinsimi Izaya cakupozya, eelyo wakati: “Sena mubwini ulicizyi eeco ncobala?” 31  Wakati: “Mubwini mbuti mbondinga ndacizyiba ikuti kakunyina umwi wakundipandulwida?” Eelyo wakalomba Filipo kuti atante munkalaki akukkala anguwe. 32  Lino cibalo ca Magwalo ncaakali kubala cakupozya nceeci: “Mbubonya mbuli mbelele wakaletwa kukujaigwa, alimwi mbuli mwana wambelele uutalili sikugela namugela boya, awalo tabbamuni mulomo wakwe. 33  Naakali kusampaulwa taakabetekwa bweelede. Ino nguni uuyoolungulula makani aazyalani lyakwe? Nkaambo uyoojaigwa anyika.” 34  Mpoonya muntu ooyo uulemekwa wakati kuli Filipo: “Ndakulomba ndaambile, Ino nguni ngwaamba musinsimi kujatikizya zyintu eezyi? Sena ulyaamba lwakwe mwini naa waamba muntu uumbi?” 35  Filipo wakabbamuna mulomo wakwe, alimwi kutalikila a Lugwalo oolu, wakaambilizya makani mabotu aa Jesu kulinguwe. 36  Lino nobakali kuyaabweenda munzila, bakasika aakali maanzi, eelyo muntu uulemekwa ooyo wakati: “Bona! Ndeeli zyiba lyamaanzi; ino ncinzi cindikasya kubbapatizyigwa?” 37 * — 38  Mpoonya muntu ooyo uulemekwa wakaimika nkalaki, eelyo boonse bobilo, Filipo amuntu ooyo uulemekwa bakaseluka akunjila mumaanzi; mpoonya Filipo wakamubbapatizya. 39  Nobakazwa mumaanzi, cakufwambaana muuya wa Jehova wakamutola kumbi Filipo, alimwi muntu ooyo uulemekwa tanaakamubona limbi Filipo, nkaambo wakazumanana mulweendo lwakwe kakondedwe kapati. 40  Pele Filipo wakaakulijana ku Asidodi, alimwi wakainda mucilawo coonse eeco akuzumanana kwaambilizya makani mabotu muminzi yoonse mane waakusika ku Kaisaleya.

Bupanduluzi buyungizyidwe

Kujatikizya majwi aatako, amubone bupanduluzi buyungizyidwe kuli Mt 17:21.