Skip to content

Skip to table of contents

Bakamboni ba Jehova

Amusale mwaambo Chitonga

Milimo 6:1-15

6  Lino mumazuba aayo, basikwiiya nobakali kuyaabuvwula, iba Juda baambaula Chigiliki bakatalika kutongooka ba Juda ibaambaula Chihebulayo nkaambo bamukabafwu bankobazwa tiibakali kupegwa zyakulya zyakali kwaabilwa abuzuba.  Aboobo bali kkumi ababili bakaita nkamu yabasikwiiya antoomwe akubaambila kuti: “Tacili cibotu pe kuti swebo tuleke kuyiisya Jwi lya Leza akutalika kwaabila bantu zyakulya.  Aboobo, nobakwesu amuyandaule baalumi bali ciloba akati kanu ibali ampuwo mbotu, ibazwide muuya abusongo, ikutegwa tubasale kulanganya mulimo ooyu uuyandika;  pele swebo tulazumanana kubikkila buyo maano kumipailo akumulimo wakuyiisya jwi lya Leza.”  Lino majwi ngobakaamba akababotela boonse munkamu, aboobo bakasala Sitefano, mwaalumi uuzwide lusyomo amuuya uusalala, Filipo, Pulokolo, Nikanola, Timoni, Pamena alimwi a Nikolayi mu Juda musandule waku Antiyokeya.  Bakabaleta kubatumwa, eelyo nobakamana kupaila, batumwa bakabaampa.  Aboobo ijwi lya Leza lyakazumanana kuyaambele, eelyo mweelwe wabasikwiiya wakali kuyaabukomena kapati mu Jelusalemu alimwi nkamu mpati yabapaizi abalo bakatalika kusyoma.  Lino Sitefano kazwide luzyalo lwa Leza anguzu, wakali kucita zyintu zigambya zipati azitondezyo akati kabantu.  Pele bantu bamwi bankamu ya Cikombelo ca Bantu Baangulukide bakaboola antoomwe abantu bamwi baku Kulene, ku Alekizandiliya alimwi abaabo bazwa ku Kilikiya aku Asiya kuti bamukazye Sitefano. 10  Nokuba boobo kunyina nobakakonzya kuzunda busongo amuuya nzyaakali kubelesya kwaambaula. 11  Mpoonya cakusisikizya bakoongelezya bantu bamwi kuti baambe kuti: “Twakamumvwa kaamba majwi aakusampaula Musa alimwi a Leza.” 12  Alimwi bakanyonganya bantu, bapati, alimwi abalembi, eelyo mpoonya aawo bakamujata akumukwelenkanya kumutola ku Nkuta Mpati Yaba Juda. 13  Mpoonya bakaleta bakamboni bakubeja ibakaamba kuti: “Imwaalumi ooyu taleki kwaamba majwi aakusampaula busena oobu busalala alimwi a Mulawo. 14  Mucikozyanyo, twakamumvwa kaamba kuti ooyu Jesu muna Nazaleta uyoonyonyoona busena oobu akucinca zilengwa nzyaakatupa Musa.” 15  Lino boonse aabo bakakkede mu Nkuta Mpati Yaba Juda nobakali kumulangisisya, bakabona kuti busyu bwakwe bwakali mbuli busyu bwamungelo.

Bupanduluzi buyungizyidwe