Skip to content

Skip to table of contents

Bakamboni ba Jehova

Amusale mwaambo Chitonga

Milimo 19:1-41

19  Lino Apolo naakacili ku Kolinto, Paulo wakainda muzyooko zyamalundu akuselemukila ku Efeso nkwaakajana basikwiiya bamwi;  eelyo wakati kuli mbabo: “Sena mwakatambula muuya uusalala nomwakaba basyomi?” Bakati kulinguwe: “Swebo tatunamvwide akuti kuli muuya uusalala.”  Alimwi wakabuzya kuti: “Ino mwakabbapatizyigwa alubbapatizyo luli?” Bakati: “Alubbapatizyo lwa Johane.”  Mpoonya Paulo wakati: “Johane wakabbapatizya alubbapatizyo lwacitondezyo cakweempwa, kaambila bantu kuti basyome yooyo iwakali kuboola musyule lyakwe, nkokuti muli Jesu.”  Nobakamvwa boobo, bakabbapatizyigwa muzyina lya Mwami Jesu.  Eelyo Paulo naakabikka maanza aali mbabo, bakatambula muuya uusalala, aboobo bakatalika kwaambaula mumyaambo imbi akusinsima.  Boonse antoomwe, kwakali baalumi batandila kukkumi ababili.  Kwamyezi yotatwe wakali kuboola kucikombelo akukanana cabusicamba. Wakali kubandika makani akupandulula cakusalazya kujatikizya Bwami bwa Leza.  Pele bamwi nobakayumya myoyo yabo akutasyoma, alimwi nobakasampaula Nzila Eeyi kumbele lyamakamu aabantu, wakabasiya akutolelezya basikwiiya. Buzuba abuzuba wakali kubandika makani muŋanda mpati yakuswaanganina yakali acikolo ku Tulano. 10  Wakali kucita oobo kwamyaka yobilo, cakuti aabo boonse bakali kukkala mucooko ca Asiya bakalimvwa jwi lya Mwami, iba Juda alimwi aba Giliki. 11  Alimwi Leza wakazumanana kucita milimo mipati yanguzu kwiinda muli Paulo, 12  cakuti notuba tutambala twakwe alimwi atusani ntwaakali kulikwabilizya kutombe twakali kutolwa kubantu baciswa, eelyo bantu bakali kupona kumalwazi aabo alimwi myuuya mibi yakali kuzwa. 13  Pele bamwi akati kaba Juda ibakali kweendeenda kabayaabutanda madaimona abalo bakasoleka kubelesya zyina lya Mwami Jesu kuli baabo bakajisi myuuya mibi; bakali kwaamba kuti: “Ndamulailila muli Jesu ooyo Paulo ngwakambauka kuti muzwe.” 14  Lino ibakali kucita boobo bakali bana basankwa basilutwe wabapaizi mu Juda umwi uutegwa Sikeva ibali ciloba. 15  Pele mukwiingula muuya mubi umwi wakati kuli mbabo: “Ndilimuzyi kabotu Jesu alimwi awalo Paulo ndilimuzyi; pele ino nywebo ndinywe bani?” 16  Mpoonya mwaalumi ooyo wakanjidwe muuya mubi wakamusotokela umwi aumwi akubazunda boonse, cakuti bakatija amantanda kabaliciside kuzwa muŋanda eeyo. 17  Makani aaya akazyibwa abantu boonse, iba Juda aba Giliki ibakali kukkala mu Efeso; alimwi boonse bakayoowa kapati, eelyo izyina lya Mwami Jesu lyakazumanana kulemekwa. 18  Alimwi banji akati kabaabo bakaba basyomi bakali kuboola kulyaambilila zibi akulungulula micito yabo caantangalala. 19  Kunze lyaboobo, bantu banji akati kabasimasalamuzi bakabungika mabbuku aabo akwaaumpa bantu boonse kabalangilila. Alimwi bakasanganya muulo woonse wamabbuku aayo, eelyo bakajana kuti akali kuulwa mali aansiliva aali 50,000. 20  Aboobo canguzu ijwi lya Jehova lyakazumanana kuyakumbele akuzunda. 21  Lino zyintu eezyi nozyakamana, Paulo wakakanza mumoyo wakwe kuti aakumana kwiinda ku Makedoniya aku Akaya, wakali kuyoounka ku Jelusalemu. Wakati: “Ndaakuzwa kooko ndeelede kuyookubona aku Loma.” 22  Aboobo wakatuma bobilo akati kabaabo bakali kumukutaukila kuya ku Makedoniya, nkokuti Timoteyo a Elasito, pele walo wakacilikkede kwaciindi cili mbocibede mucooko ca Asiya. 23  Aciindi eeco nciconya kwakaba lupyopyongano lupati kujatikizya Nzila Eeyi. 24  Nkaambo mwaalumi umwi uutegwa Demetiliyo, imufwuzi wansiliva, kwiinda mukupanga tukombelo twansiliva twa Atemi wakali kubapa kujana mpindu mpati basyaabupampu mukupanga zyintu; 25  eelyo wakababunganya antoomwe abamwi ibakali kupanga zyintu zili boobo akubaambila kuti: “Nobaalumi, mulizyi kabotu kuti buvwubi bwesu buzwa kumulimo ooyu. 26  Alimwi mulibwene akumvwa ooyu Paulo mbwaaongelezya nkamu yabantu mpati akubapa lusyomo lumbi ikutali buyo muno mu Efeso, pele alimwi uli afwaafwi kucita boobo amucooko coonse ca Asiya, kaamba kuti aaba baleza bapangwa amaanza aabantu tabali baleza beni-beni pe. 27  Kunze lyaboobo, cintu cimbi cibi ncakuti taali buyo makwebo eesu aaya aatiisampaulwe, pele alyalo tempele lyaleza mukaintu mupati Atemi lilabonwa kuti ndyabuyo, alimwi bulemu bwakwe ibukombwa mucooko coonse ca Asiya amunyika yoonse buli afwaafwi kumana.” 28  Nobakamvwa boobu bakanyema kapati, mpoonya baalumi aaba bakatalika koompolola kuti: “Atemi waba Efeso ngomupati!” 29  Aboobo kwakaba lupyopyongano mumunzi woonse alimwi caantoomwe bantu boonse bakaguumukila mubbuwa lyazisobano kabayaabukwelaanya Gayo a Alisitako, ibana Makedoniya bakali kweenda a Paulo. 30  Paulo walo wakalilisungwide kunjila mukati mwakali bantu, pele basikwiiya bakamukasya. 31  Nobaba beendelezi bamapobwe azisobano bamwi ibakali beenzinyina bakamutumina mulomo ikumukombelezya kuti atalibikki muntenda kwiinda mukunjila mubbuwa lyazisobano. 32  Mubwini, bamwi bakali koompolola cintu cimwi kakuli bambi bakali kwaamba cimbi; nkaambo nkamu yabantu yakali kwiide kwiilingana alimwi bunji bwabo tiibakakazyi kaambo ncobakabunganina antoomwe. 33  Aboobo bakagwisya Alekizanda munkamu alimwi ba Juda bakamutonkela kumbele; mpoonya Alekizanda wakatambika ajanza lyakwe alimwi wakali kuyanda kulyaambilila kubantu kuti unyina mulandu. 34  Pele nobakazyiba kuti wakali mu Juda, boonse bakatalika koongolola ajwi lyomwe kwamawoola aatandila kuli obilo kuti: “Atemi waba Efeso ngomupati!” 35  Lino kumamanino mupati wamunzi naakaumuzya nkamu yabantu wakati: “Nobaalumi bamu Efeso, nguni mubwini akati kabantu uutazyi kuti munzi wabana Efeso nguulanganya tempele lya Atemi mupati acikozyanyo cakawa kuzwa kujulu? 36  Aboobo mbwaanga makani aaya taakonzyi kukazyigwa, nywebo mweelede kukkalikana ikutali kucita zyintu cakwiintila. 37  Nkaambo mwaleta baalumi aaba kuno ibatali bafwumpi bamatempele naa basikusampaula leza wesu mukaintu. 38  Aboobo ikuti Demetiliyo abasyaabupampu mukupanga zyintu mbocili limwi bali akaambo amuntu umwi, imazuba aakubeteka milandu nkwaali, abeendelezi bacooko nkobali; abatolane kunkuta. 39  Pele ikuti kamuyandaula cimwi ciinda waawo, ceelede kukosolwa ambungano iizumizyidwe amulawo. 40  Nkaambo mubwini tuli muntenda yakupegwa mulandu wakutalisya manyongwe akaambo kaceeci cacitika sunu, mbwaanga tunyina kaambo kabotu kali koonse kakulitamizya kujatikizya nkamu yabantu aaba baide kwiilingana.” 41  Naakamana kwaamba zyintu eezyi, wakaambila bantu bakabungene kuti bamwaike.

Bupanduluzi buyungizyidwe