Skip to content

Skip to table of contents

Bakamboni ba Jehova

Amusale mwaambo Chitonga

Matayo 26:1-75

26  Lino Jesu naakamanizya kwaamba zyintu zyoonse eezyi, wakaambila basikwiiya bakwe kuti:  “Mulizyi kuti kwainda mazuba obilo kuzwa sunu kuyooba Pobwe lya Kwiindilila, alimwi Mwana wamuntu uyooabwa kutegwa akagagailwe acisamu.”  Mpoonya basilutwe babapaizi abapati babantu bakabungana antoomwe mulubuwa lwamupaizi mupati wakali kwiitwa kuti Kayafa  alimwi boonse bakamvwana kuti bamujate Jesu cabucenjezu akumujaya.  Pele bakazumanana kwaamba kuti: “Ikutali ciindi capobwe kutegwa kutakabi manyongwe aakonzya kubuka akati kabantu.”  Lino Jesu naakali ku Betaniya muŋanda ya Simoni sicinsenda,  imukaintu umwi wakajisi nsazi yamafwuta aanunkila aadula, wakaboola kulinguwe akutalika kumutila mafwuta amutwe naakakkede kutebulu.  Lino nobakabona boobu, basikwiiya bakanyema akwaamba kuti: “Ino nkaambo nzi ncaanyonyoonwa mafwuta aaya?  Nkaambo mafwuta aaya naasambalwa mali manji eelyo mali aayo naapegwa kubantu bacete.” 10  Kazyi nzyobakali kwaamba, Jesu wakati kuli mbabo: “Ino nkaambo nzi ncomumukatazya mukaintu ooyu? Wandibelekela mulimo mubotu. 11  Nywebo muli limwi abacete lyoonse, pele tamunooli andime lyoonse pe. 12  Imukaintu ooyu naatila mafwuta aaya amubili wangu, wacita oobo kutegwa ndilibambile kuzikkwa. 13  Ncobeni ndimwaambila kuti: Kufwumbwa makani mabotu aaya nkwaayookambaukwa munyika yoonse, ncaacita mukaintu ooyu acalo ciyooambwa mukwiibaluka nguwe.” 14  Mpoonya umwi wabali kkumi ababili, uutegwa Judasi Isikaliyote, wakaunka kuli basilutwe babapaizi 15  akwaamba kuti: “Ino mulandipa nzi ndamwaaba kulindinywe?” Bakamusyomezya kumupa mali aansiliva aali makumi otatwe. 16  Aboobo kuzwa leelyo, wakatalika kuyandaula ciindi cibotu cakumwaaba. 17  Mubuzuba bwakusaanguna bwamikamu iitakwe bumena, basikwiiya bakaboola kuli Jesu akumwaambila kuti: “Ino nkuli nkoyanda kuti tukubambile kutegwa ukalide nkuko Pobwe lya Kwiindilila?” 18  Wakati: “Kamuya mumunzi kuli Ndaba mukamwaambile kuti, ‘Mwiiyi waamba kuti: “Ciindi cangu cibikkidwe cili afwaafwi; ndilacita Pobwe lya Kwiindilila abasikwiiya bangu muŋanda yako.”’” 19  Mpoonya basikwiiya bakacita mbwaakabalailila Jesu, eelyo bakabamba zyintu zyoonse zya Pobwe lya Kwiindilila. 20  Lino nikwakaba kumangolezya, wakalikkede kutebulu abasikwiiya bakwe bali kkumi ababili. 21  Nobakali kulya, wakati: “Ncobeni ndimwaambila kuti: Umwi akati kanu ulandaaba.” 22  Mbwaanga akabapa kuusa makani aaya, aumwi wabo wakatalika kumubuzya kuti: “Mwami, sena ndime?” 23  Lino mukwiingula wakati: “Ooyo ngotusunsa limwi mumutiba omwe ngonguwe utiindaabe. 24  Masimpe, Mwana wamuntu ulamusiya nyoonse mbubonya mbokulembedwe kujatikizya nguwe, pele maawe kumuntu ooyo waaba Mwana wamuntu! Nicakainda kubota ikuti muntu ooyo naatakazyalwa buyo.” 25  Lino Judasi ooyo wakali kuyanda kumwaaba wakaingula kuti: “Labbi, sena ndime?” Wakati kulinguwe: “Yebo omwini walyaambilila.” 26  Lino nobakacili kulya, Jesu wakabweza mukamu, eelyo naakamana kulumba wakaukomoona akuupa basikwiiya bakwe kati: “Amubweze mulye. Eeci ciiminina mubili wangu.” 27  Alimwi wakabweza nkomeki, amane kulumba, wakabapa kati: “Amunywe mulinjiyo nyoonse, 28  nkaambo eeci ciiminina ‘bulowa bwangu bwacizuminano,’ ibuyootilwa akaambo kabanji kutegwa zibi zilekelelwe. 29  Pele ndimwaambila kuti: Tandikanywi kabili cakunywa cili coonse cizwa kumusaansa kuzwa lino kusikila buzuba oobo mbondiyoonywa waini mupya antoomwe andinywe mu Bwami bwa Taata.” 30  Mpoonya nobakamana kwiimba nyimbo zyakutembaula Leza, bakaunka ku Cilundu ca Maolifa. 31  Lino Jesu wakati kuli mbabo: “Nywebo nyoonse mulalebwa masiku aano akaambo kandime, nkaambo kulilembedwe kuti: ‘Ndiyoojaya mweembezi eelyo mbelele mutanga ziyoomwaika.’ 32  Pele ndaakubusyigwa, ndiyoosika ku Galilaya nywebo kamutanasika.” 33  Pele mukwiingula Petulo wakati kulinguwe: “Nokuba kuti boonse aaba balebwa akaambo kanduwe, mebo tandikoolebwa pe!” 34  Jesu wakati kulinguwe: “Ncobeni ndikwaambila kuti: Sunu masiku, mukombwe katanalila, ulandikaka ziindi zyotatwe.” 35  Petulo wakati kulinguwe: “Nokuba kuti caamba kufwida antoomwe anduwe, kunyina nenditiikukake pe.” Basikwiiya boonse abalo bakaamba mbubonya. 36  Mpoonya Jesu wakasika abasikwiiya bakwe kubusena butegwa Getesemane eelyo wakabaambila kuti: “Amukkale aano, ndaya waalya kuyoopaila.” 37  Lino wakabwezelezya Petulo abana ba Zebedayo bobilo, eelyo wakausa akupenga kapati mumoyo. 38  Mpoonya wakabaambila kuti: “Ndapenga kapati mumoyo cakuti inga ndafwa. Amukkale aano, mulinde antoomwe andime.” 39  Alimwi naakeenda aniini kuya kumbele, wakafwugama, wakotama akupaila kati: “Taata, ikuti naa cilakonzyeka, nkomeki eeyi aizwe kulindime. Pele ikutali kweelana akuyanda kwangu pe, pele kweelana akuyanda kwako.” 40  Mpoonya wakaboola kuli basikwiiya akubajana baloona, mpoonya wakabuzya Petulo kuti: “Sena nywebo nobaalumi tiimwali kukonzya kulinda kwawoola lyomwe antoomwe andime? 41  Amulinde akuzumanana kupaila kutegwa mutanjili mumusunko. Moyo ncobeni ulapya pele mubili unyina nguzu.” 42  Alimwi lwabili wakaunka kuyoopaila kati: “Taata, ikuti kacitakonzyeki kuti eeci ciinde ccita kuti mane ndicinywe, akucitike kuyanda kwako.” 43  Wakaboola alimwi akubajana baloona nkaambo meso aabo akalilemede. 44  Aboobo wakabasiya, wakaunka alimwi kuyoopaila lwatatu, akwaamba kaambo nkeena. 45  Mpoonya wakaboola kuli basikwiiya akubaambila kuti: “Aciindi mbuli ceeci muloona akulyookezya! Amulange! Ciindi caswena cakuti Mwana wamuntu aabwe mumaanza aabasizibi. 46  Amunyamuke; atweende. Amubone! Sikundaaba wasika afwaafwi.” 47  Lino naakacili kwaambaula, amulange! Judasi umwi wabali kkumi ababili wakaboola ankamu mpati yabantu kabajisi mapanga ankoli kuzwa kuli basilutwe babapaizi abapati babantu. 48  Lino sikumwaaba wakalibapede citondezyo, wakati: “Kufwumbwa ngondiyoomyonta, ngonguwe ooyo; amukamujate.” 49  Aboobo wakamugama Jesu akwaamba kuti: “Wabonwa, Labbi!” Mpoonya wakamumyonta. 50  Pele Jesu wakati kulinguwe: “Ino musa walonda nzi?” Mpoonya bakaboola bamujata Jesu akumwaanga. 51  Pele umwi wabaabo mbaakali limwi Jesu wakasomona panga lyakwe akuuma muzike wamupaizi mupati akumukwezyula kutwi kwakwe. 52  Mpoonya Jesu wakamwaambila kuti: “Pilusya panga lyako muciyobwedo calyo, nkaambo boonse aabo babweza panga bayoofwa kupanga. 53  Naa, sena uyeeya kuti tandikonzyi kulomba Taata kunditumina ndilyonya lino makamu-makamu aabangelo? 54  Kwaba boobu, ino Magwalo alazuzikizyigwa buti aamba kuti ceelede kucitika munzila eeyi?” 55  Aciindi eeco Jesu wakati kumakamu aabantu: “Nkaambo nzi ncimwaboola kuti mundijate amapanga alimwi ankoli mbuli kuti muboolela kujata mubbi? Abuzuba ndakali kukkala mutempele kuyiisya, pele tiimwakandijata pe. 56  Pele zyintu zyoonse eezyi zyacitika kutegwa nzyobakalemba basinsimi zizuzikizyigwe.” Mpoonya basikwiiya boonse bakamusiya akutija. 57  Aabo bakamujata Jesu bakamutola kuli Kayafa mupaizi mupati, ooko balembi abapati nkobakabungene antoomwe. 58  Pele Petulo wakazumanana kumutobela kulaale kusikila mulubuwa lwamupaizi mupati, alimwi naakanjila mukati wakalikkede ababelesi bamuŋanda kuti abone citiicitike. 59  Aciindi aawa, basilutwe babapaizi a Nkuta Mpati Yaba Juda yoonse bakali kuyandaula bakamboni ibakali kukonzya kumubejelezya Jesu kutegwa bamujaye, 60  pele kunyina kaambo nkobakajana nokuba kuti kwakali bakamboni bakubeja banji. Mukuya kwaciindi bobilo bakaboola 61  akwaamba kuti: “Muntu ooyu wakati, ‘Ndilakonzya kulimwaya tempele lya Leza akuliyakulula mumazuba otatwe.’” 62  Mpoonya mupaizi mupati wakanyamuka akumwaambila kuti: “Sena unyina bwiinguzi? Ino ncinzi aaba ncobakutamikizya?” 63  Pele Jesu wakaluumwine. Aboobo mupaizi mupati wakati kulinguwe: “Ndikwaambila kuti ukonke kuli Leza uupona kuti ulaamba masimpe akutwaambila naa nduwe Kilisito Mwana wa Leza!” 64  Jesu wakati kulinguwe: “Yebo omwini waamba. Pele nywebo nobaalumi ndimwaambila kuti: Kuzwa sunu muyoobona Mwana wamuntu kakkede kujanza lyalulyo lya Singuzuzyoonse alimwi kaboola mumakumbi aakujulu.” 65  Mpoonya mupaizi mupati wakazapaula zisani zyakwe zyaatala akwaamba kuti: “Wasampaula Leza! Ino tuciyandila nzi bakamboni bambi? Amulange! Lino mwalimvwida kasampaula Leza. 66  Ino muyeeya buti?” Bakamwiingula kuti: “Weelede kufwa.” 67  Mpoonya bakamuswida mate kubusyu akumuuma amfwaindi. Bamwi bakamuuma mbayi kubusyu, 68  kabati: “Yebo Kilisito, ikuti koli musinsimi kotwaambila wakuuma.” 69  Lino Petulo wakalikkede anze mulubuwa, eelyo mubelesi umwi musimbi wakaboola kulinguwe kati: “Ayebo mwakali limwi a Jesu waku Galilaya!” 70  Pele wakakaka boonse kabamvwide kati: “Tandicizyi ncoamba.” 71  Naakazwa akuya kukaanda kali kumulyango, aumwi musimbi wakamuzyiba akwaambila baabo bakali kooko kuti: “Muntu ooyu wakali limwi a Jesu muna Nazaleta.” 72  Alimwi lwabili wakakazya cakukonka buya kuti: “Tandimuzyi muntu ooyo!” 73  Nokwakainda kaindi kaniini, aabo bakaimvwi mumbali bakaboola akwaambila Petulo kuti: “Masimpe ayebo uli umwi wabo, nkaambo mwaambo wako ulakuyubununa.” 74  Pele wakatalika kulisinganya akukonka kuti: “Tandimuzyi pe muntu ooyo!” Mpoonya aawo mukombwe wakalila. 75  Aboobo Petulo wakaayeeya majwi ngaakaamba Jesu aakuti: “Mukombwe katanalila, ulandikaka ziindi zyotatwe.” Eelyo wakaya anze akulila kapati.

Bupanduluzi buyungizyidwe