Skip to content

Skip to table of contents

Bakamboni ba Jehova

Amusale mwaambo Chitonga

Matayo 2:1-23

2  Naakazyalwa Jesu mu Betelehemu waku Judaya kumazuba aamwami Heloda, basikupandulula bweende bwanyenyeezi ibazwa Kujwe bakaboola ku Jelusalemu  akubuzya kuti: “Uli kuli ooyo wakazyalwa kali mwami waba Juda? Nkaambo twakabona nyenyeezi yakwe notwakali Kujwe, aboobo twaboolela kumufwugamina.”  Naakamvwa boobu, Mwami Heloda wakakopana ikubikkilizya abantu boonse bamu Jelusalemu.  Eelyo naakabunganya basilutwe babapaizi boonse abalembi, wakatalika kubabuzya nkwaakali kuyoozyalilwa Kilisito.  Bakamwiingula kuti: “Ku Betelehemu waku Judaya, nkaambo kwiinda mumusinsimi kulembedwe kuti:  ‘Yebo O Betelehemu wamucisi ca Juda toli munzi musyoonto akati kabeendelezi ba Juda, nkaambo mulinduwe muyoozwa mweendelezi uuyooembela bantu bangu bana Isilayeli.’”  Mpoonya Heloda wakabaita kumbali basikupandulula bweende bwanyenyeezi akubabuzya ciindi nyenyeezi noyakalibonya.  Eelyo naakabatuma kuya ku Betelehemu, wakabaambila kuti: “Kamuya mukamuyandaule mwana ooyu cakulomya, alimwi mwaakumujana muzyoondaambile kutegwa ambebo ndikaunke kuyoomufwugamina.”  Nobakamana kumuswiilila mwami, bakazumanana mulweendo lwabo, eelyo nyenyeezi njobakabona nobakali Kujwe yakaunka kumbele lyabo kusikila yaakwiima aawo mpaakabede mwana. 10  Nobakaibona nyenyeezi eeyo bakakondwa kapati. 11  Lino nobakanjila muŋanda bakamubona mwana kali a Maliya banyina, eelyo bakafwugama akumukotamina. Alimwi bakagusya lubono lwabo akumupa zipego zyangolida, atununkilizyo tutegwa libano amulo. 12  Pele akaambo kakuti bakacenjezyegwa a Leza muciloto kuti batapiluki kuli Heloda, bakajokela kucisi cokwabo anzila iimbi. 13  Nobakaunka, imungelo wa Jehova wakalibonya muciloto kuli Josefa akumwaambila kuti: “Buka, bweza mwana abanyina utijile ku Egepita, ukakkale okuya kusikila nkakwaambile kuti upiluke, nkaambo Heloda uyanda kutalika kuyandaula mwana kutegwa amujaye.” 14  Aboobo wakabuka masiku akubweza mwana abanyina akuunka ku Egepita, 15  mpoonya wakaakukkala okuya kusikila naakafwa Heloda. Eeci cakazuzikizya ceeco ncaakaamba Jehova kwiinda mumusinsimi wakwe naakati: “Kuzwa mu Egepita ndakaita mwanaangu.” 16  Lino Heloda naakabona kuti weenwa abasikupandulula bweende bwanyenyeezi, wakakalala kapati, mpoonya wakalailila kuti bana basankwa boonse mu Betelehemu amuzyooko zyanguwo zyoonse bajisi myaka yobilo akuyaansi bajaigwe kweelana aciindi basikupandulula bweende bwanyenyeezi ncobakamwaambilide kuti noyakalibonya nyenyeezi. 17  Eelyo akazuzikizyigwa aayo aakaambwa kwiinda mumusinsimi Jelemiya kuti: 18  “Ijwi lyakamvwugwa mu Lama, kulila akoomoka; ngu Lakele wakali kulila bana bakwe, alimwi tanaakali kuyanda kuumbulizyigwa, nkaambo bakaloba.” 19  Lino Heloda naakafwa, imungelo wa Jehova wakalibonya muciloto kuli Josefa mu Egepita 20  akumwaambila kuti: “Buka, bweza mwana abanyina uunke kucisi ca Isilayeli, nkaambo aabo bakali kuyandaula buumi bwamwana bakafwa.” 21  Aboobo wakabuka akubweza mwana abanyina akuunka kucisi ca Isilayeli. 22  Pele naakamvwa kuti Akelawo ngowakali mwami wakali kulela Judaya ikutali Heloda usyi, wakayoowa kuunka nkuko. Kunze lyaboobo, akaambo kakucenjezyegwa a Leza muciloto, wakaunka kucooko ca Galilaya 23  akukkala mumunzi uutegwa Nazaleta kutegwa azuzikizyigwe aayo aakaambwa kwiinda mubasinsimi kuti: “Uyootegwa muna Nazaleta.”

Bupanduluzi buyungizyidwe