Skip to content

Skip to table of contents

Bakamboni ba Jehova

Amusale mwaambo Chitonga

Matayo 18:1-35

18  Aciindi eeco basikwiiya bakaboola afwaafwi a Jesu akumubuzya kuti: “Ino nguni mupati kwiinda boonse mu Bwami bwakujulu?”  Mpoonya wakaita mwana musyoonto akumwiimika akati kabo  akuti: “Ncobeni ndimwaambila kuti: Ccita kuti mwasanduka akuba mbuli bana basyoonto, tamukanjili pe mu Bwami bwakujulu.  Aboobo kufwumbwa uulicesya mbuli mwana musyoonto ooyu, ngomupati kwiinda boonse mu Bwami bwakujulu,  alimwi kufwumbwa uutambula mwana musyoonto mbuli yooyu muzyina lyangu, wanditambula andime.  Pele kufwumbwa uutyompya umwi wabasyoonto aaba basyoma mulindime, ncibotu kuti aangililwe ziyo munsingo mbuli leelyo lizingulusyigwa ambongolo akumunyikizya mulwizi lupati.  “Maawe kunyika akaambo kazilebyo! Inzya, zilebyo zileelede kuti ziboole, pele maawe kumuntu ooyo uubelesyegwa kuba cilebyo!  Lino ikuti janza naa kuulu kwako kulakulebya, kukosole akukusowa; nkaambo ncibotu kuti ukanjile mubuumi kokosokede naa kolemene kwiinda kuti ukasowelwe mumulilo uutamani kojisi maanza naa maulu obilo.  Alimwi ikuti liso lyako kalikulebya, kolinonkola akulisowa; ncibotu kuti ukafwutuke koli sicimbolyo kwiinda kuti ukasowelwe mu Gehena muyaka mulilo kojisi meso obilo. 10  Amubone kuti tamusampauli umwi wabasyoonto aaba, nkaambo ndimwaambila kuti bangelo babo kujulu lyoonse balabubona busyu bwa Taata uuli kujulu. 11 * —— 12  “Ino muyeeya buti? Ikuti muntu umwi kajisi mbelele zili mwaanda eelyo yomwe yasweeka, sena takoozisiya mumalundu eezyo zili makumi aali fwuka afwuka akuunka kuyooyandaula yeeyo yasweeka? 13  Ncobeni ndimwaambila kuti, ikuti waijana ulakondwa kapati akaambo kanjiyo kwiinda zyeezyo zili makumi aali fwuka afwuka zyatasweekede. 14  Mbubonya oobo, Taata uuli kujulu tayandi kuti umwi wabasyoonto aaba alobe. 15  “Alimwi ikuti munyoko wakubisizya, koya ukamwaambile mpaalubizya kamuli nyobilo. Ikuti wakuswiilila, nkokuti wamupilusya munyoko. 16  Pele kuti takuswiilili, utolelezye muntu omwe naa bobilo kutegwa makani oonse akasinizyigwe kumilomo yabakamboni bobilo naa botatwe. 17  Ikuti naa tabaswiilili, ambila mbungano. Ikuti naa taiswiilili noiba mbungano, aabe kulinduwe mbubonya mbuli muntu wamasi alimwi ambuli simutelo. 18  “Ncobeni ndimwaambila kuti: Kufwumbwa zyintu nzyo-muyooanga anyika, zinooli zyakaangwa kale kujulu alimwi kufwumbwa zyintu nzyomuyooangununa anyika, zinooli zyakaangununwa kale kujulu. 19  Alimwi ncobeni ndimwaambila kuti: Ikuti bobilo akati kanu bazuminana anyika aano kulomba kufwumbwa ciyandika, Taata uuli kujulu uyoobacitila eeco. 20  Nkaambo ooko nkobabungene antoomwe bantu bobilo naa botatwe muzyina lyangu, nkondili andime akati kabo.” 21  Mpoonya Petulo wakaboola kulinguwe akwaamba kuti: “Mwami, ino mukwesu weelede kundibisyila ziindi zyongaye kandimulekelela? Sena nkusikila ziindi zili ciloba? 22  Jesu wakamwiingula kuti: “Nsikwaambili kuti ziindi zili ciloba pe, pele kusikila ziindi zili makumi aali ciloba aciloba. 23  “Nkakaambo kaako Bwami bwakujulu bwaba mbuli muntu imwami, iwakali kuyanda kuti bazike bakwe bapilusye zikwelete kulinguwe. 24  Naakatalika kubasesa, mwaalumi umwi wakaletwa iwakamukweletela matalenta aali 10,000.* 25  Pele akaambo kakuti tanaakajisi cakumujolela, simalelo wakwe wakalailila kuti walo, amukaintu wakwe, abana bakwe azyintu zyoonse nzyaakajisi zisambalwe akujola cikwelete. 26  Aboobo muzike wakafwugama akutalika kumukombelezya ulaamba, ‘Kondeengelela, ndiyookupilusizya zyoonse.’ 27  Aboobo mwami wamuzike ooyo wakeetela, mpoonya wakamuleka akumulekelela cikwelete. 28  Pele muzike ooyo wakaunka eelyo wakajana umwi wabazikenyina wakakweletede madinali aali mwaanda kulinguwe, aboobo naakamujata wakatalika kumusina akwaamba kuti, ‘Bbadela cikwelete coonse ncojisi kulindime.’ 29  Aboobo muzikenyina wakafwugama akutalika kumukombelezya ulaamba, ‘Kondeengelela, ndiyookupilusizya mali aako.’ 30  Pele walo wakakaka, amane wakaunka akupa kuti aangwe muntolongo kusikila akajole cikwelete ncaakakweleta. 31  Lino bazikenyina nobakabona cakacitika bakausa kapati, aboobo bakaunka akuyoomwaambila simalelo wabo zyintu zyoonse zyakacitika. 32  Mpoonya simalelo wakwe wakamwiita akumwaambila kuti: ‘Omuzike mubi, ndakakulekelela cikwelete coonse eeciya nookandikombelezya. 33  Sena ayebo tonooyelede kumufwida luse muzikenyoko mbubonya mbundakakufwida luse?’ 34  Aboobo simalelo wakwe, kakalede, wakamutola kuli basintolongo kusikila akajole cikwelete coonse. 35  Mbubonya buyo Taata uuli kujulu awalo mbwayoomucitila kuti umwi aumwi wanu katalekeleli munyina camoyo woonse.”

Bupanduluzi buyungizyidwe

Kujatikizya majwi aatako, amubone bupanduluzi buyungizyidwe kuli Mt 17:21.
Matalenta aansiliva aali 10,000 akaleelene amadinali aali 60,000,000.